ឥណ្ឌូណេស៊ី៖ វីដេអូដ៏គួរឱ្យរន្ធត់មួយ ដែលបង្ហាញឲ្យឃើញសត្វស្វាមួយក្បាល កំពុងជិះកង់សម្តែងនៅលើដងផ្លូវ បានចាប់ទាញ និងអូសកូនក្មេងចុះពីគែមចិញ្ចើមផ្លូវជាច្រើនម៉ែត្រ បានរាលដាលយ៉ាងលឿនកាលពីដើមសប្តាហ៍នេះ។ យោងតាមសារព័ត៌មាន Daily Mail បានឲ្យដឹងថា ហេតុការណ៍នេះបានកើតឡើងនៅក្នុងភូមិ Tanjungsari ប្រទេសឥណ្ឌូណេស៊ី។
នៅក្នុងវីដេអូដែលត្រូវបានបង្ហោះលើអ៊ីនធឺណិត ដោយអ្នកលេងបាល់បោះជនជាតិអាមេរិកឈ្មោះ Rex Chapman បានប្រាប់ឲ្យដឹងថា សត្វស្វា១ក្បាលដែលកំពុងនៅលើកង់ ត្រូវបានគេមើលឃើញថា កំពុងរត់យ៉ាងលឿន នៅលើផ្លូវតូចចង្អៀតមួយ (ឌឿងហែម) មុនពេលឈប់នៅពីមុខស្ត្រីម្នាក់ជាម្តាយ និងកូនស្រី៣នាក់ របស់នាងកំពុងអង្គុយ។ បន្ទាប់មក ស្វានេះបានចាប់ទាញក្មេងស្រីម្នាក់ ក្នុងចំណោមនោះ និងអូសនាងចម្ងាយជិត៣ម៉ែត្រ ពីកន្លែងដែលម្តាយនាងកំពុងអង្គុយ។
ខណៈពេលនោះ សាក្សីបានស្រែកដាក់សត្វស្វា ហើយគេបានឃើញបុរសម្នាក់ដើរឆ្ពោះទៅកាន់សត្វនេះ ដើម្បីបំភ័យវាឲ្យបញ្ឈប់សកម្មភាព។ ក្មេងស្រីរងគ្រោះដែលត្រូវបានឮយំ បានក្រោកឡើង និងរត់ទៅរកម្តាយរបស់នាងវិញ។
អ្នកប្រើប្រាស់បណ្តាញសង្គម Twitter ម្នាក់បានលើកឡើងថា ស្វានេះគឺជាផ្នែកមួយនៃគ្រោងការចាប់ពង្រត់។ រីឯអ្នកប្រើប្រាស់ម្នាក់ទៀត បានយល់ឃើញថា សត្វស្វានេះពុំត្រូវបានចងខ្សែនោះទេ ខណៈពេលកំពុងសម្តែងជិះកង់ ព្រោះប្រសិនបើចងខ្សែ នោះវានឹងអាចដួលបាន។
ទោះយ៉ាងណា អ្នកប្រើប្រាស់ម្នាក់ទៀត បានស្នើថា នេះជាសត្វស្វាសម្តែងនៅតាមដងផ្លូវ ហេតុនេះម្ចាស់គួរតែមានការប្រុងប្រយ័ត្ន ក្នុងការចងខ្សែ ដើម្បីបញ្ជៀសហេតុការណ៍ វាយប្រហាររបស់សត្វលើកុមារបែបនេះទៀត៕
ប្រែសម្រួល៖ លឹម ហុង (ប្រភព៖ nextshark)