ប្រទេសថៃ៖ ព្រះសង្ឃក្លែងក្លាយមួយអង្គ ត្រូវបានចាប់ខ្លួនពីបទឆោកលុយថ្លៃឈ្នួលតាក់ស៊ីចំនួន ១.៨០៩ បាត (៥៥ ដុល្លារ) ពីបុរសជាអ្នករត់តាក់ស៊ីម្នាក់ម្នាក់ឈ្មោះ Kiatisak Subin អាយុ ៣៩ ឆ្នាំ ដែលបានមកប្តឹងប៉ូលិសនៅថ្ងៃទី២១ ខែមេសា ឆ្នាំ២០២០ ។ ខេត្ត។
Kiatisak បានប្រាប់ថា គាត់បានដឹកសង្ឃ១អង្គ ដែលមានចិញ្ចើមក្រាស់ឃ្មឹកគួរឲ្យចម្លែក ទៅកាន់វត្ត Wat Pha Suk Maneejun នៅ Muang Thong Thani ខេត្ត Nonthaburi ។ លោកបន្តថា ខណៈកំពុងធ្វើដំណើរនៅលើរថយន្ត សង្ឃក្លែងក្លាយរូបនេះបានប្រាប់គាត់ថា ទៅធ្វើអំពើល្អមួយចំនួនសម្រាប់អ្នកដទៃនៅក្នុងវត្ត ។ នៅពេលមកដល់ សង្ឃនេះក៏បានចុះចេញពីរថយន្តចូលវត្ត ប៉ុន្តែ ចាំបាត់ៗ ចុងក្រោយបាត់ស្រមោលឈឹងតែម្តង។
សង្ឃក្លែងក្លាយឈ្មោះ Daraswin Kambap អាយុ ៣២ ឆ្នាំ ជាអ្នកខេត្ត Petchabun ត្រូវបានចាប់ខ្លួននៅចំណុច Ladprao 91, ទីក្រុងបាងកក កាលពីថ្ងៃទី២៤ ខែមេសា ឆ្នាំ២០២០ រួមជាមួយភស្តុតាងស្បង់ចីវរ កាបូបយួរដៃពណ៌ខ្មៅ វ៉ែនតាខ្មៅ និងម៉ាស ។
ជនសង្ស័យរូបនេះបានអះអាងថា រូបគេបានចូលបួសជាព្រះសង្ឃ នៅក្នុងឆ្នាំ២០១១ និងបានសឹកមកវិញនៅក្នុងឆ្នាំ ២០១៧ ។ បច្ចុប្បន្ននេះ រូបគេពុំមានការងារធ្វើ និងស្នាក់នៅផ្ទះសាច់ញាតិនៅក្នុងទីក្រុងបាងកក។
Daraswin បានបន្តអះអាងថា រូបគេមិនមានបំណងឆបោក អ្នករត់តាក់ស៊ី ដែលបានជូនទៅកាន់វត្តជាច្រើននោះទេ ។ ប៉ុន្តែ នៅពេលមកដល់វត្តចុងក្រោយ Wat Pha Suk រូបគេក៏បានចូលទៅសម្ងំក្នុងវត្តយ៉ាងយូរ ហើយនៅពេលវិលត្រឡប់មកវិញ ក៏ពុំឃើញអ្នកតាក់ស៊ីនៅចាំ។ ហើយដោយគ្មានជម្រើស ក៏បានហៅតាក់ស៊ីផ្សេងតែម្តងទៅ។
ទោះយ៉ាងណា ទីបំផុត Daraswin បានសារភាពថា មូលហេតុដែលរូបគេទៅច្រើនវត្តយ៉ាងដូច្នេះ គឺដើម្បីទៅសុំលុយពីព្រះសង្ឃដទៃ ដែលធ្លាប់បានស្គាល់ពីមុន កាលពីនៅជាលោកដូចគ្នា។ Daraswin ក៏បានប្រាប់ត្រង់ៗថា អាចទទួលបានលុយសុំចន្លោះពី ២០០ ទៅ ៣០០ បាត ពីព្រះសង្ឃក្នុង១អង្គៗ ។ ប៉ុន្តែ លុយទាំងនោះពុំអាចគ្រប់គ្រាន់សម្រាប់បង់ថ្លៃឈ្នួលតាក់ស៊ីទេ ។ ទោះយ៉ាងណា ក្រោយករណីនេះបានកើតឡើង សាច់ញាតិរបស់ Daraswin ក៏បានចេញមុខបង់ថ្លៃឈ្នួលរថយន្ត ដើម្បីបញ្ចប់រឿង៕
ប្រែសម្រួល៖ លឹម ហុង (ប្រភព៖ Khaosod)