ភ្នំពេញ៖ ឯកឧត្តម ផាន អូន អគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ( ក.ប.ប.) បានទទួលជួបពិភាក្សាការងារជាមួយ សេនានុព័ន្ធស៊ើបអង្កេតសន្តិសុខមាតុភូមិ របស់ស្ថានទូតសហរដ្ឋអាមេរិកប្រចាំនៅកម្ពុជា ដើម្បីជំរុញកិច្ចសហប្រតិបត្តិការការងាររវាងអង្គភាពទាំងពីរ ដើម្បីឈានទៅកំណត់នូវមុខសញ្ញានៃបទល្មើស ដែលពាក់ព័ន្ធនឹងទំនិញក្លែងក្លាយ ទំនិញ និងសេវា។ ជំនួបនោះ បានធ្វើឡើងនៅថ្ងៃព្រហស្បតិ៍ ទី៧ ខែឧសភា ឆ្នាំ២០២០ នៅស្នាក់ការកណ្តាល អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ។
កិច្ចសហប្រតិបត្តិការនេះ គឺផ្តោតទៅលើការផ្លាស់ប្តូរព័ត៌មាន ដើម្បីឈានទៅកំណត់នូវមុខសញ្ញានៃបទល្មើស ដែលពាក់ព័ន្ធនឹងទំនិញក្លែងក្លាយ ទំនិញ និងសេវា ដែលមិនមានភាពអនុលោម ទៅតាមបទប្បញ្ញត្តិបច្ចេកទេស ស្តង់ដារ ឬពុំមានលិខិតអនុញ្ញាតពីស្ថាប័នមានសមត្ថកិច្ច ជាពិសេស ផ្តោតលើផលិតផលផ្សេងៗដែលបម្រើការដល់ជំងឺកូវីដ ១៩ (Unapproved Covid-19 Products) ដូចជាតេស្តបឋម (Test kits) ថ្នាំព្យាបាល ជាដើម។
ជាមួយគ្នានេះដែរ អង្គភាពទាំងពីរ ក៏បានពិភាក្សាគ្នាអំពីកិច្ចសហប្រតិបត្តិការដើម្បីពង្រឹងសមត្ថភាពមន្ត្រីអនុវត្តច្បាប់ តាមរយៈវគ្គបណ្តុះបណ្តាលផ្សេងៗ ដែលមន្ត្រីនៃអគ្គនាយកដ្ឋាន ក.ប.ប. នឹងទទួលបាននាថ្ងៃអនាគត ហើយដែលផ្តល់ដោយក្រសួងសន្តិសុខមាតុភូមិសហរដ្ឋអាមេរិច (U.S. Department of Homeland Security) តាមរយៈសេនានុព័ន្ធស៊ើបអង្កេតសន្តិសុខមាតុភូមិ របស់ស្ថានទូតសហរដ្ឋអាមេរិកប្រចាំនៅកម្ពុជា ៕ដោយ៖កូឡាប
