ខេត្តកែប៖ កែប នឹងក្លាយជាគោលដៅទេសចរណ៍ សម្រាប់ភ្ញៀវជាតិ និងអន្តរជាតិ ដែលមានភាពប្រកួតប្រជែង ទាំងក្នុងតំបន់ និងពិភពលោក។
រដ្ឋបាលខេត្តកែប បានឲ្យដឹងថា បច្ចុប្បន្ននេះ នៅខេត្តកែប មានឆ្នេរខ្សាច់កម្សាន្តប្រវែងតែ ៣៥០ម៉ែត្រប៉ុណ្ណោះ ដែលវាមានប្រវែងខ្លី ដែលនៅពេលប្រជាពលរដ្ឋ សម្រុកមកលេងកម្សាន្តម្តងៗ នៅរដូវបុណ្យទានផ្សេងៗ មានការកកស្ទុះណែនខ្លាំង។
ដោយសារមើលឃើញបញ្ហានេះ រដ្ឋបាលខេត្តកែប គ្រោងនឹងពង្រីកឆ្នេរខ្សាច់កម្សាន្តចំនួនពីរកន្លែងបន្ថែមទៀត ដែលកន្លែងទីមួយមានប្រវែង ៣គីឡូម៉ែត្រ និងកន្លែងទីពីរ មានប្រវែងប្រហែលជាង ៣គីឡូម៉ែត្រកន្លះ។
ឯកឧត្តម កែន សត្ថា អភិបាលខេត្តកែប បានឲ្យដឹងថា ដើម្បីគាំទ្រដល់ការសិក្សារៀបចំ ផែនការមេអភិវឌ្ឍន៍វិស័យទេសចរណ៍ខេត្តកែប រាជរដ្ឋាភិបាលបានបង្កើតគណៈកម្មការអន្តរក្រសួង ដើម្បីសិក្សារៀបចំផែនការមេសម្រាប់ ការអភិវឌ្ឍវិស័យទេសចរណ៍ខេត្តកែប និងខេត្តមណ្ឌលគិរី។
ក្រសួងទេសចរណ៍ កំពុងសិក្សារៀបចំផែនការមេអភិវឌ្ឍន៍ទេសចរណ៍ខេត្តកែប ដែលបានដំណើរការជាបណ្តើរៗហើយ ដោយជឿជាក់ថា ផែនការមេនេះ នឹងជួយឲ្យខេត្តកែប ក្លាយជាគោលដៅទេសចរណ៍ធម្មជាតិ ស្ងប់ស្ងាត់ ប្រណីតកម្រិតខ្ពស់ ប្រកបដោយភាពទាក់ទាញ និងភាពប្រកួតប្រជែង នៅក្នុងតំបន់ និងពិភពលោក។
បើតាមរដ្ឋបាលខេត្តកែប ដោយសារវិស័យទេសចរណ៍ ពាក់ព័ន្ធនឹងអន្តរវិស័យ ដូច្នេះការរៀបចំផែនការមេ ត្រូវគិតគូរជាអន្តរវិស័យ ដូចជា វិស័យរៀបចំដែនដី នគរូបនីយកម្ម និងសំណង់ បរិស្ថាន គមនាគមន៍ កសិកម្ម ប្រព័ន្ធទឹកស្អាត អគ្គិសនី ការគ្រប់គ្រងសំណល់រឹង-រាវ, ការបង្កើតផលិតផលទេសចរណ៍ថ្មីៗ ដែលចាំបាច់ត្រូវអនុលោមតាមសក្ដានុពល និងធនធានដែលមានជាក់ស្ដែង ដូចជា ធនធានធម្មជាតិ ផ្នែកសាសនា វប្បធម៌ កសិកម្ម និងវិស័យជាច្រើនទៀត ដែលមិនទាន់បានកែច្នៃ ធ្វើយ៉ាងណាឱ្យស្របតាមឯកសារបទដ្ឋានគតិយុត្ត និងឯកសារគាំទ្រដទៃទៀត សម្រាប់កំណើនវិស័យទេសចរណ៍៕ដោយ៖សម្ផស្ស