បរទេស៖ ស្ត្រីជនជាតិសិង្ហបុរីម្នាក់ដែលត្រូវបានគេថតមិនពាក់ម៉ាសនៅឯផ្សារ Shunfu និងបង្កជម្លោះប្រកែកគ្នាជាមួយអ្នកឡើងផ្សារ និងអាជីវករ បែកផ្សែង កំពុងស្ថិតក្នុងការស៊ើបអង្កេតពីបទបង្កហិង្សា បង្កឱ្យមានការរំខានជាសាធារណៈ និងរំលោភវិធានការឃ្លាតឆ្ងាយពីគ្នា ដើម្បីសុវត្ថិភាពពីកូវីដ១៩។ វីដេអូនៃការទាស់ទែងគ្នាត្រូវបានផ្សព្វផ្សាយតាមអ៊ិនធឺណិតចាប់តាំងពីរសៀលថ្ងៃអាទិត្យ ទី៣ ឧសភា ។
នៅក្នុងឃ្លីបមួយ ស្ត្រីរូបនេះបាននិយាយទៅកាន់មនុស្សពីរនាក់ផ្សេងទៀតថា “អ្នកមិនប្រាប់មនុស្សឱ្យធ្វើអ្វីទេ ទុកឲ្យច្បាប់ធ្វើការទៅ” ។
ខណៈម្នាក់ឆ្លើយតបថា នាងមិនគួរធ្វើកាយវិការមិនសមរម្យបែបនេះទេនោះ តែស្ត្រីរូបនេះក៏និយាយថា៖ “អ្នកគួរតែមានគំនិតទៅលើរឿងរកស៊ីផ្ទាល់ខ្លួនអ្នកទៅ មិនចាំបាច់ខ្វល់ខ្វាយ និងរស្រែកដាក់ខ្ញុំនោះទេ” ។
នៅក្នុងឃ្លីបមួយផ្សេងទៀតនៅទីតាំងផ្សេងគ្នា នាងអាចត្រូវបានគេឃើញយកដៃបាំងមុខរបស់នាង ហើយកាន់ទូរស័ព្ទជាប់នឹងស្ត្រីអាយុ ៤៧ ឆ្នាំម្នាក់ ដែលនាងត្រូវបានគេចោទប្រកាន់ថាបានបង្កហិង្សាលើ ខណៈដែលកំពុងតែឈ្លោះប្រកែកជាមួយមនុស្សមួយក្រុមផ្សេងទៀត។
នៅក្នុងនោះ នាងអះអាងថាខ្លួននាងជាអ្នក “ អធិបតេយ្យ” ដោយនិយាយថា “ខ្ញុំគ្មានអ្វីដែលត្រូវធ្វើជាមួយប៉ូលិសទេ វាមានន័យថា ពួកគេក៏គ្មានអ្វីត្រូវនិយាយមកលើខ្ញុំដែរ” ។
បុរសម្នាក់ដែលពុំបានមុខឲ្យឃើញក្នុងឃ្លីបបានឆ្លើយតបថា “វាមិនសមហេតុផលទេ។ ប្រសិនបើអ្នកជាមនុស្សនៅប្រទេសសិង្ហបុរី អ្នកត្រូវតែអនុវត្តតាមច្បាប់របស់ប្រទេសសិង្ហបុរី” ។
ប៉ូលិសបាននិយាយកាលពីថ្ងៃអាទិត្យថា ពួកគេបានទទួលការអំពាវនាវសុំជំនួយប្រហែលម៉ោង ១២ និង ១៥ នាទីថ្ងៃនោះ នៅផ្លូវ ៣២០ Shunfu ។
យោងតាមការស៊ើបអង្កេតបឋមបានឲ្យដឹងថា ស្ត្រីនៅក្នុងវីដេអូដែលជាជនជាតិសឹង្ហបុរីអាយុ ៤០ ឆ្នាំ រូបនេះ គឺពីមុនបានរំលោភលើវិធានការឆ្ងាយដើម្បីសុវត្ថិភាព ដោយមិនពាក់ម៉ាសមុខ ហើយបានចោទប្រកាន់ស្ត្រីអាយុ ៤៧ ឆ្នាំម្នាក់ ដែលបានណែនាំនាងឲ្យពាក់ម៉ាសទៀតផង ។
នៅក្នុងសេចក្តីថ្លែងការណ៍មួយ អ្នកនាំពាក្យប៉ូលិសបាននិយាយថា ប៉ូលីសយកចិត្តទុកដាក់ខ្ពស់ចំពោះឥរិយាបទរំលោភបំពាន និងមិនទទួលខុសត្រូវបែបនេះ ជាពិសេសនៅក្នុងស្ថានភាព Covid-19 បច្ចុប្បន្ន។
លោកបានមានប្រសាសន៍ថា “ យើងជំរុញឱ្យសាធារណៈជនចាត់វិធានទៅលើអ្នកបំពានបម្រាមឲ្យបានម៉ឺងម៉ាត់ និងអនុវត្តតាមវិធានការរក្សាការឃ្លាតឆ្ងាយប្រកបដោយសុវត្ថិភាព” ៕
ប្រែសម្រួល៖ លឹម ហុង (ប្រភព៖ stomp.straitstimes)