បាត់ដំបង៖ ពលរដ្ឋរស់នៅក្នុងស្រុកមោងឫស្សីជាច្រើនគ្រួសារ បាននាំគ្នាចាប់យករបរចិញ្ចឹមចង្រិតលក់ ដើម្បីបង្កើនប្រាក់ចំណូលក្នុងគ្រួសារ ខណៈដែលទំនេរពីការធ្វើស្រែ។
ស្ត្រីម្នាក់ឈ្មោះ ជឿន ស៊ីណាត់ រស់នៅភូមិអង្គ្រង ឃុំជ្រៃ ស្រុកមោងឫស្សី បាននិយាយប្រាប់ឲ្យដឹងថា ក្នុងតំបន់ពួកគាត់រស់នៅស្ទើរតែ១០០ភាគរយ ប្រកបរបរធ្វើស្រែ ហើយការចិញ្ចឹមចង្រិត មិនប៉ះពាល់ដល់ការធ្វើស្រែនិងស្រួលថែទាំ ទើបពលរដ្ឋមួយចំនួននាំគ្នាចិញ្ចឹម។ សម្រាប់គ្រួសារគាត់ បានចិញ្ចឹមជាង១ឆ្នាំមកហើយ ដោយចិញ្ចឹមក្នុងទ្រុងទំហំទទឹង១ម៉ែត្រ និងបណ្ដោយជិត៦ម៉ែត្រ មានសរុប៨ទ្រុង ដោយក្នុងមួយទ្រុងៗ អាចប្រមូលផលបានចាប់ពី ៣០ ទៅ៤០គីឡូក្រាម។ ចង្រិតដែលពួកគាត់ចិញ្ចឹមនេះ ប្រភេទចង្រឹតក្រហម ស្រួលចិញ្ចឹម ធន់នឹងជំងឺ ងាយឲ្យចំណី ដោយរយៈពេល១ខែកន្លះ អាចចាប់លក់បាន ពេញមានពងឆ្ងាញ់ ហើយក្នុង១គីឡូក្រាម អាចលក់បានចាប់ពី ៥០០០ទៅ៨០០០រៀល និងសម្បូរអ្នកមកទិញមិនដែលទុកងាប់ចោលនោះទេ។
ចំណែកស្ត្រីម្នាក់ឈ្មោះ ជឿន ណុន រស់នៅភូមិឃុំជាមួយគ្នា បានឲ្យដឹងថា គ្រួសារគាត់ ទើបចាប់ផ្ដើមចិញ្ចឹម ដោយសារឃើញបងស្រីរបស់គាត់ ចិញ្ចឹមបានជោគជ័យបណ្ដើរៗ និងអាចរកចំណូលបានគួរសម ហើយងាយចិញ្ចឹមទៀត គាត់ក៏សម្រេចចិញ្ចឹមដែរ ហើយរំពឹងថា នឹងទទួលបានលទ្ធផលល្អ។
គួរបញ្ជាក់ផងដែរថា ក្រៅពីរបរចិញ្ចឹមចង្រិតនេះ ពលរដ្ឋនៅក្នុងតំបន់នោះ ក៏បានចិញ្ចឹមមាន់ ទា ទុកសម្រាប់បរិភោគផង និងលក់ដូរផង ដែលអាចជួយបង្កើនប្រាក់ចំណូលបន្ថែមដល់គ្រួសារ ក្នុងការដោះស្រាយ ក៏ដូចជាបានចំណូល សម្រាប់ផ្គត់ផ្គង់ជីវភាពប្រចាំថ្ងៃផងដែរ៕
ដោយ៖អ៊ុងសារុំ
