បន្ទាយមានជ័យ ៖ ជាសោកនាដកម្មក្នុងគ្រួសារមួយបណ្តាលមកពីគ្រោះថ្នាក់ចរាចរណ៍ ដោយប្រពន្ធនិងកូនតូចអាយុទើប៣ខែបានស្លាប់ ឯប្តី និងកូនប្រុស រងរបួស ដោយសាររថយន្តដឹកបន្លែ ផ្លែឈើនៃគ្រួសារខ្លួនដែលត្រូវចេញរកសុីទាំងអស់គ្នាដូច្នេះ បានបែកកង់ក្រឡាប់ ។
លោកវរសេនីយ៍ទោ សួន នីប៉ូ នាយរងការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តបន្ទាយមានជ័យបានប្រាប់ថា៖គ្រោះថ្នាក់ចរាចរណ៍នេះបានកើតឡើងកាលពីម៉ោង១១និង៤០នាទីយប់ថ្ងៃទី៦ ខែឧសភា ឆ្នាំ២០២០ លើកំណាត់ផ្លូវជាតិលេខ៦ ខាងលិចស្ពានស្ថិតក្នុងភូមិសាលាក្រៅ សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ ។
នៅមុនពេលកើតហេតុនោះមានរថយន្តរត់ឈ្នួល ម៉ាកសាំយ៉ុងពណ៌ ពណ៌សំបកឪឡឹក ពា2A5859 ធ្វើដំណើរពីលិចទៅកើត ដឹកបន្លែ ផ្លែឈើ ដោយ១គ្រួសារតែម្តងគឺប្តី ប្រពន្ធនិងកូន សរុប៤នាក់។
ពេលធ្វើដំណើរដល់ចំណុចកើតហេតុរថយន្តបានបែកកង់ក្រោយផ្នែកខាងឆ្វេងបណ្តាលឲ្យរេចង្កូតមកខាងស្តាំដៃធ្លាក់ពីលើថ្នល់ជាតិក្រឡាប់ទៅវាសស្រែផ្ងាជើង(កង់) ហើយបណ្តាលឲ្យស្លាប់២នាក់និងរបួស២នាក់។
លោកសួន នីប៉ូ បានបន្តថា ៖ ជនរងគ្រោះរបួសមាន ៖ ១-ឈ្មោះ អឿន សំអាត ភេទប្រុសអាយុ៣៤ឆ្នាំ អ្នកបើកបររថយនិងត្រូវជាប្តី ។ ២-ឈ្មោះ អាត ស៊ីវហួរ ភេទប្រុសអាយុ៨ឆ្នាំរបួស ។ និងជនរងគ្រោះរបួសធ្ងន់ ហើយបន្ទាប់មកបានស្លាប់មាន ៣-ឈ្មោះវុទ្ធី សូរិយា ភេទស្រីអាយុ២៨ឆ្នាំ ជាប្រពន្ធ ដែលរួមដំណើរ និង ៤ឈ្មោះអាត ស៊ីវមាន ភេទស្រីអាយុ៣ខែស្លាប់ភ្លាមៗនៅនឹងកន្លែង ។
គ្រួសារជនរងគ្រោះដ៏គួរឲ្យ អាណិតសង្វេគទាំងនេះ មានលំនៅរស់នៅភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។
កម្លាំងនគរបាលជំនាញចរាចរណ៍ខេត្ត បានចុះទៅដល់កន្លែងកើតហេតុ ធ្វើការត្រួតពិនិត្យ សង្គ្រោះនិងដឹកជនរងគ្រោះរបួសទៅមន្ទីរពេទ្យ។ ឯសពសពជនរងគ្រោះទៅគេហដ្ឋាននៃសពធ្វើបុណ្យ បញ្ជូនកុសល ៕
ដោយ ៖ បន្ទាយ
