អាមេរិច៖ ការប្រើថ្នាំសម្រាប់ព្យាបាលជំងឺគ្រុនចាញ់ ដែលលោកដូណាល់ ត្រាំ គាំទ្រ និងចាត់ទុកថាអាចជាការផ្លាស់ប្តូរ ក្នុងការប្រយុទ្ធប្រឆាំងនឹងវីរុសកូរ៉ូណា បានបរាជ័យជាថ្មីម្តងទៀត ដោយវាមិនបង្ហាញពីអត្ថប្រយោជន៍អ្វីឡើយទៅលើអ្នកជំងឺ COVID-19។ នេះបើតាមការចុះផ្សាយរបស់សេចក្តីប្រកាស កាលពីថ្ងៃព្រហស្បតិ៍។
ប្រធានក្រុមស្រាវជ្រាវ លោកវេជ្ជបណ្ឌិត Neil Schluger បានថ្លែងប្រាប់ទីភ្នាក់ងារសារព័ត៌មាន Reuters ថា “អ្នកជំងឺហាកមិនបានធូរស្រាលសោះ នៅពេលប្រើថ្នាំ”។
ក្នុងចំណោមអ្នកជំងឺដែលគេដាក់ថ្នាំព្យាបាលជំងឺគ្រុនចាញ់ Hydroxycholoquine មានអ្នកជំងឺ ៣២,៣ ភាគរយត្រូវការឧបករណ៍ដកដង្ហើម ឬជិតស្លាប់ ធៀបទៅនឹងអ្នកជំងឺ ១៤,៩ភាគរយ ដែលគេមិនដាក់ថ្នាំនោះ។
ប៉ុន្តែវេជ្ជបណ្ឌិតទំនងជានឹងផ្តល់ថ្នាំ Hydroxycholoquine ទៅដល់អ្នកជំងឺដែលឈឺធ្ងន់ ដូច្នេះអ្នកស្រាវជ្រាវនៅមន្ទីរពេទ្យក្រុងញូញ៉ក និងមជ្ឈមណ្ឌលវេជ្ជាសាស្ត្រនៃសកលវិទ្យាល័យ Columbia បានធ្វើការកែប្រែអត្រានោះ។ ពួកគេបានសន្និដ្ឋានថា ថ្នាំនោះប្រហែលជាមិនធ្វើឲ្យប៉ះពាល់ដល់អ្នកជំងឺឡើយ ប៉ុន្តែវាក៏មិនអាចជួយអ្នកជំងឺផងដែរ។
ថ្នាំគ្រុនចាញ់ Hydroxycholoquine មិនបង្ហាញពីប្រសិទ្ធភាពឡើយ នៅពេលគេដាក់វាផ្សំជាមួយនឹងថ្នាំ Azithromycin (ថ្នាំប្រឆាំងបាក់តេរី)។ ចំណែកការប្រើប្រាស់ថ្នាំ Azithromycin តែមួយមុខ ក៏មិនមានប្រសិទ្ធភាពដែរ។
កាលពីខែមុន វេជ្ជបណ្ឌិតនៅក្រសួងកិច្ចការអតីតយុទ្ធជនអាមេរិច បានប្រកាសថា Hydroxycholoquine មិនអាចជួយអ្នកជំងឺ COVID-19 ឡើយ ហើយវាប្រហែលជាធ្វើឲ្យអ្នកជំងឺប្រឈមខ្ពស់នឹងការស្លាប់។
ការវិភាគទិន្នន័យវេជ្ជសាស្ត្រនោះបានបង្ហាញថា អត្រាការស្លាប់មាន ២៨ភាគរយ នៅពេលគេផ្តល់ថ្នាំ Hydroxycholoquine ដល់អ្នកជំងឺបន្ថែមលើការព្យាបាលស្តង់ដារ ធៀបទៅនឹង ១១ភាគរយចំពោះការមិនប្រើថ្នាំ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia