ឥណ្ឌា ៖ រថភ្លើងមួយគ្រឿង ក្នុងប្រទេសឥណ្ឌា បានបើកកិនកម្មករចំណាកស្រុកជាច្រើននាក់ ដែលកំពុងតែដេក នៅលើផ្លូវបណ្តាលឲ្យមនុស្សយ៉ាងតិច ១៤នាក់ស្លាប់បាត់បង់ជីវិត។ កម្មករទាំងនោះ ត្រូវបានគេដឹងថា កំពុងតែធ្វើដំណើរទៅកាន់ភូមិកំណើតវិញ។ នេះបើតាមការបញ្ជាក់របស់ក្រសួងផ្លូវដែក របស់ប្រទេសនេះ។
មនុស្សរាប់ម៉ឺននាក់ បានធ្វើដំណើរទៅផ្ទះពួកគេវិញ ដោយថ្មើរជើងចេញពីទីក្រុងធំៗ ក្នុងប្រទេសឥណ្ឌា ក្រោយពេលបាត់បង់ការងារ ដោយសារតែការបិទប្រទេស ដើម្បីទប់ស្កាត់ការផ្ទុះរាតត្បាតនៃវីរុសកូរ៉ូណា ចាប់តាំងពីខែមីនាមក។
អ្នកបើរថភ្លើងព្យាយាមបញ្ឈប់រថភ្លើងដែរ នៅពេលគាត់ឃើញកម្មករជាច្រើន នៅលើផ្លូវរថភ្លើង ស្ថិតក្នុងរដ្ឋ Maharashtra។ ក្រសួងផ្លូវដែក របស់ឥណ្ឌាបញ្ជាឲ្យមានការស៊ើបអង្កេត លើគ្រោះថ្នាក់ដ៏រន្ធត់នោះ។
រដ្ឋមន្ត្រីក្រសួងផ្លូវដែកឥណ្ឌាឈ្មោះ Piyush Goyal បានថ្លែងនៅលើបណ្តាញសង្គម Twitter ដូច្នេះថា “ខ្ញុំទើបតែបានទទួលព័ត៌មាន ដ៏សង្វេកពីគ្រោះថ្នាក់ ដែលកម្មករជាច្រើនត្រូវរថភ្លើងកិន”។
សូមបញ្ជាក់ថា ក្នុងអំឡុងពេលបិទប្រទេស មធ្យោបាយសាធារណៈទាំងអស់ ត្រូវបានផ្អាក ដូច្នេះកម្មករជាច្រើន បានធ្វើដំណើរទៅផ្ទះ ដែលជារឿយៗ ធ្វើដំណើរដោយថ្មើរជើង លើចម្ងាយផ្លូវដ៏ឆ្ងាយ ត្រឡប់ទៅផ្ទះ។
សូមបញ្ជាក់ថា ឥណ្ឌាមានអ្នកឆ្លងវីរុសកូរ៉ូណា សរុបទាំងអស់ចំនួន ៥៦.៣៤២នាក់ និងអ្នកស្លាប់ ១.៨៨៦នាក់ ព្រមទាំងអ្នកជាសះស្បើ ១៦.៥៤០នាក់។
ប្រទេសនេះមានប្រជាជនសរុបទាំងអស់ជាង ១៣ពាន់លាននាក់។ នេះបើតាមទិន្នន័យរបស់ Google គិតត្រឹមថ្ងៃទី ១ ខែមករា ឆ្នាំ ២០២០៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia