បន្ទាយមានជ័យ ៖ អំពើជួញដូរនិងប្រើប្រាស់គ្រឿងញៀន២ករណីនៅក្រុងប៉ោយប៉ែត ត្រូវបានសមត្ថកិច្ច បានបញ្ជូនជនសង្ស័យចំនួន៤នាក់ មកស្នងការដ្ឋាននគរបាលខេត្ត ដើម្បីកសាងសំណុំរឿង បញ្ជូនបន្តទៅតុលាការ។
យោងតាមបទបញ្ជារបស់លោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ និងមានការសម្របសម្រួល ពីលោកព្រះរាជអាជ្ញាអមសាលាដំបូងខេត្តបន្ទាយមានជ័យ មាស ច័ន្ទពិសិដ្ឋ លោកវរសេនីយ៍ឯកធិន ស៊ិនដេត អធិការនគរបាលក្រុងប៉ោយប៉ែត បានឲ្យដឹងថា៖ ជនសង្ស័យជួញដូរនិងប្រើប្រាស់គ្រឿងញៀន ត្រូវបានកម្លាំងនគរបាលក្រុងប៉ោយប៉ែត បង្ក្រាបចាប់ឃាត់ខ្លួនជាបន្តបន្ទាប់ ចំនួន២ករណីដោយឡែកពីគ្នា មានចំនួន៤នាក់។
ករណីទី១ មានឈ្មោះ ១-មាន រតនាហៅសួន ភេទប្រុសអាយុ៣៨ឆ្នាំ ស្នាក់នៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ , ២-ឈ្មោះសន វិច្ឆិកាហៅគួក ភេទប្រុសអាយុ២៩ឆ្នាំ នៅម្តុំបេនចាន ស្ថិតក្នុងភូមិប៉ាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ចំពោះវត្ថុតាងដែលដកហូតបានមាន ៖ ថ្នាំញៀនប្រភេទមេតំហ្វេតាមីនគ្រាប់ពណ៌ផ្កាឈូក មានអក្សរ WY ចំនួន១៣៥ និងពណ៌បៃតងចំនួន០១គ្រាប់ កូនជញ្ជីងថ្លឹងចំនួន១ ប្រដាប់ចូកថ្នាំញៀន១ កាំភ្លើងបាញ់ហ្គាស១ដើម កាំភ្លើងជ័រ១ ដបកែច្នៃសម្រាប់ជក់គ្រឿងញៀន២ កាំបិត១ និងសម្បកសម្រាប់វិចខ្ចប់មួយចំនួន។ ជនសង្ស័យទាំង២នាក់ ត្រូវបង្ក្រាបចាប់ឃាត់ខ្លួន នៅវេលាម៉ោង៩និង៥០នាទីព្រឹក ថ្ងៃទី៦ ខែឧសភា ឆ្នាំ២០២០ នៅក្នុងភូមិសាស្ត្រសង្កាត់ប៉ោយប៉ែត ។
ករណីទី២ មានឈ្មោះ ១-គី បារាំង ហៅហាប់ ភេទប្រុសអាយុ៤២ឆ្នាំ ស្នាក់នៅបណ្តោះអាសន្នភូមិប៉ាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត, ២-ឈ្មោះងុំ សុខៈ ភេទប្រុស អាយុ១៧ឆ្នាំ ស្នាក់នៅបណ្តោះអាសន្នវត្តស្រះត្រាច ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។ ចំពោះវត្ថុតាងដកហូតបាន ៖ ថ្នាំញៀនម្សៅក្រាមពណ៌សថ្លា ចំនួន១កូនថង់ធំល្មម ដបកែច្នៃសម្រាប់ជក់គ្រឿងញៀន១ បំពង់សម្រាប់ចូកថ្នាំញៀន១ ដែកកេះ៣ កូនកន្ត្រៃ១ និងទូរស័ព្ទចំនួន២គ្រឿង។ ជនសង្ស័យទាំ២នាក់នេះ ត្រូវបានឃាត់ខ្លួន នៅវេលាម៉ោង៥និង៣០នាទីល្ងាច ថ្ងៃទី៦ ខែឧសភា ឆ្នាំ២០២០ នៅក្នុងភូមិសាស្ត្រសង្កាត់ប៉ោយប៉ែត ។
លោកធិន ស៊ិនដេត បានបន្តថា៖ ជនសង្ស័យទាំង៤នាក់ និងវត្ថុតាង ត្រូវបានកម្លាំងនគរបាលជំនាញប្រឆាំងគ្រឿងញៀនក្រុង រៀបចំសំណុំរឿង បញ្ជូនទៅស្នងការដ្ឋាននគរបាលខេត្តបន្ទាយមានជ័យ នៅថ្ងៃទី៧ ខែឧសភា ឆ្នាំ២០២០នេះហើយ ៕ ដោយ ៖ បន្ទាយ