ឧបទ្វីបកូរ៉េ៖ ប្រទេសកូរ៉េខាងជើង បានធ្វើការរិះគន់ លើប្រទេសកូរ៉េខាងត្បូង ដោយហៅការធ្វើសមយុទ្ធ កាលពីពេលថ្មីៗ របស់កូរ៉េខាងត្បូងថា ជាការបង្ករឿងដ៏ធ្ងន់ធ្ងរ។
អ្នកតំណាងយោធាកូរ៉េខាងជើង បាននិយាយនៅថ្ងៃសុក្រនេះថា ការធ្វើសមយុទ្ធរបស់កូរ៉េខាងត្បូង គឺជាការបង្កហេតុដ៏ធ្ងន់ធ្ងរ ដែលទាមទារឲ្យមានប្រតិកម្ម។ នេះបើតាមការចុះផ្សាយ របស់ភ្នាក់ងារសារព័ត៌មានកូរ៉េខាងជើង KCNA។
“សមយុទ្ធកាលពីពេលថ្មីៗនេះ គឺជាឱកាសមួយ ដែលរំលឹកពួកយើងម្តងទៀត ចំពោះការពិតថា សត្រូវនៅតែជាសត្រូវគ្រប់ពេលវេលា”។
កូរ៉េខាងជើងបញ្ជាក់ថា សមយុទ្ធយោធា របស់កូរ៉េខាងត្បូង នៅថ្ងៃពុធ គឺរំលោភកិច្ចព្រមព្រៀងអន្តរកូរ៉េ ដែលកិច្ចព្រមព្រៀងនោះ មានគោលបំណង កាត់បន្ថយភាពតានតឹងផ្នែកយោធា។
សេចក្តីប្រកាសរបស់កូរ៉េខាងជើង និយាយថា “អ្វីៗគ្រប់យ៉ាង ឥឡូវនេះ បានវិលត្រឡប់ ទៅរកចំណុចចាប់ផ្តើម មុនពេលកិច្ចប្រជុំកំពូលក្នុងឆ្នាំ ២០១៨”។
សូមព្ជាក់ថា កាលពីថ្ងៃអាទិត្យកន្លងទៅនេះ កូរ៉េខាងត្បូង បាននិយាយថា ទាហ៊ានរបស់កូរ៉េខាងជើង បានធ្វើការបាញ់ជាច្រើន គ្រាប់មកលើបុស្តិ៍យាម របស់កូរ៉េខាងត្បូង ដែលស្ថិតនៅតំបន់គ្មានកងទ័ព។
ទាហ៊ានកូរ៉េខាងត្បូង បានធ្វើការឆ្លើយតបវិញ ដោយបានធ្វើការបាញ់ព្រមាន ប៉ុន្តែមិនមានសេចក្តីរាយការណ៍ ពីការស្លាប់នោះឡើយ។
រដ្ឋមន្ត្រីការបរទេសអាមេរិច លោក Mike Pompeo បាននិយាយថា ការបាញ់ពីភាគីកូរ៉េខាងជើង ទំនងជារឿងចៃដន្យ៕
អត្ថបទប្រែសម្រួលដោយ៖ សុភ័ក្រ
ប្រភព៖ CGTN
