ខេត្តស្វាយរៀង៖ ដើម្បីកែលម្អសោភ័ណភាពស្រុករមាសហែក ខេត្តស្វាយរៀង ឱ្យរឹតតែមានភាពទាក់ទាញនោះឯកឧត្តម សៅ សុខា ប្រធានក្រុមការងារគណបក្សប្រជាជនកម្ពុជា ចុះជួយស្រុករមាសហែក បានឧបត្ថម្ភបង្គោលអំពូលភ្លើងសូឡាវ៉ាត់ធំចំនួន ៣០០ដើម សម្រាប់ដាក់បំភ្លឺសង្ខាងផ្លូវសាធារណៈ នៅទីរួមស្រុកដែលពីមុនពុំធ្លាប់មានទាល់តែសោះ និងក៏មានការជួយឧបត្ថម្ភ ពីសប្បុរសជន នូវបង្គោលភ្លើងចំនួន ៤៩៨ដើម បន្ថែមទៀត ដល់រដ្ឋបាលស្រុក ដើម្បីចាត់ចែងដាក់តាមគោលដៅសំខាន់ៗផងដែរ។
លោក ស៊ូ ម៉ុល អភិបាលស្រុករមាសហែក នៅព្រឹកថ្ងៃទី៨ ខែឧសភានេះ បានឱ្យក្រុមអ្នកសារព័ត៌មានដឹងថាៈ ថា ដោយមានការយកចិត្តដាក់ខ្ពស់ ពីឯកឧត្តម សៅ សុខា ជាប្រធានក្រុមការងារ ដើម្បីធ្វើឱ្យមូលដ្ឋានស្រុក មានការរីកចម្រើន ជាបន្តបន្ទាប់នោះ លោកប្រធានក្រុមការងារ ក៏បានជួយឧបត្ថម្ភគាំទ្រ ដល់ការកែលម្អសោភ័ណភាពទីរួមស្រុក ឱ្យមានភាពទាក់ទាញ និងមានភ្លើងបំភ្លឺនាពេលរាត្រី ផងដែរ។
លោក អភិបាលស្រុក បានបញ្ជាក់ថា បង្គោលអំពូលភ្លើងសូឡាខ្ពស់ ដែលមានវ៉ាត់ធំចំនួន ៣០០ដើម ដែលជាអំណោយរបស់ឯកឧត្តម សៅ សុខា និងក៏មានការជួយឧបត្ថម្ភបង្គោលភ្លើង ធម្មតាពីសប្បុរសជន៤៩៨ដើមទៀត សរុប៧៩៨ដើម ដល់រដ្ឋបាលស្រុក ដើម្បីដាក់អមសង្ខាងផ្លូវ កន្លែងសាធារណៈសំខាន់ៗដូចជា៖ សាលាឃុំ ផ្សារ សាលារៀន មណ្ឌលសុខភាព អធិការដ្ឋានសាលាស្រុកជាដើម។
លោកបានបន្ថែមទៀតថា រដ្ឋបាលស្រុករមាសហែក ពិតជាមានមោទនភាព ដែលបានទទួលសមិទ្ធផលថ្មីបន្ថែម លើសមិទ្ធផលជាច្រើនទៀត ហើយជួសមុខឲ្យប្រជាពលរដ្ឋក្នុងស្រុករមាសហែក សូមថ្លែងអំណរគុណយ៉ាងជ្រាលជ្រៅ ចំពោះឯកឧត្តម សៅ សុខា ដែលបានឧបត្ថម្ភគាំទ្រ ដល់រដ្ឋបាលស្រុក និងអរគុណដល់សប្បុរសជនទាំងអស់ ដែលបានចូលរួមសហការ និងផ្តល់ជាថវិកាព្រមទាំង សម្ភារផ្សេងៗផងដែរ ដើម្បីគាំទ្ររាល់គម្រោងអភិវឌ្ឍន៍របស់ស្រុក។
ប្រជាពលរដ្ឋ សង្ឃឹមថា ការចាប់ផ្តើមឱ្យមានបង្គោលភ្លើងបំភ្លឺផ្លូវសាធារណៈនាពេលនេះ នឹងបើកទំព័រថ្មីសម្រាប់ស្រុករមាសហែក ដើម្បីបន្តរៀបចំ ឱ្យរឹតតែមានសោភ័ណភាពទាក់ទាញ ទាំងសណ្តាប់ធ្នាប់ របៀបរៀបរយសង្គម ហើយក៏ជាការគិតគូរពីសុខទុករាស្ត្រ ពីលោកអភិបាលស្រុកវ័យក្មេង ដែលទើបតែឡើងកាន់តំណែងថ្មីៗ ប្រជាពលរដ្ឋតែងតែកោតសរសើរពេញៗមាត់ ក្នុងការដឹកនាំរបស់លោកផងដែរ៕ដោយ៖ វ៉ៃកូ
