ប៉ៃលិន៖ ឯកឧត្ដម ផាន់ ចាន់ធុល អភិបាលខេត្ដប៉ៃលិន បានជំរុញដល់កងកម្លាំងសមត្ថកិច្ចអនុវត្តច្បាប់ទាំងអស់ ត្រូវខិតខំយកចិត្ត
ទុកដាក់បំពេញភារកិច្ច ប្រកបដោយក្រមសីលធម៌ វិជ្ជាជីវៈនិងគោរពវិន័យរបស់កងកម្លាំង ដើម្បីធានាឱ្យបាននូវ សន្តិសុខ សុវត្ថិភាព សណ្តាប់ធ្នាប់សាធារណៈ ជូនប្រជាពលរដ្ឋ។
ការលើកឡើងនេះ ក្នុងពិធីប្រកាសផ្ទេរភារកិច្ច តែងតាំងមុខតំណែង ជូនមន្ត្រីនគរបាល នៃស្នងការដ្ឋាននគរបាលខេត្តប៉ៃលិន កាលពីរសៀលថ្ងៃទី៧ ខែឧសភា ឆ្នាំ២០២០។
ឯកឧត្ដម ផាន់ ចាន់ធុល អភិបាលខេត្ដប៉ៃលិន និងជាប្រធានគណៈបញ្ជាការឯកភាពខេត្ត បានមានប្រសាសន៍ថា យើងជាមន្ត្រីអនុវត្តច្បាប់ ដូច្នេះត្រូវគោរពឱ្យបានម៉ឺងម៉ាត់ នូវវិន័យរបស់កងកម្លាំង ដើម្បីក្លាយខ្លួនជាមន្ត្រីគំរូ មានរបៀបរបបការងារល្អ ដោយឆ្លើយតបបាននូវរាល់សំណូមពរ ការងារនាបច្ចុប្បន្ននេះ ជាពិសេសត្រូវពង្រឹងកិច្ចសហការល្អ ជាមួយអាជ្ញាធរគ្រប់ជាន់ថ្នាក់ ដោយយកច្បាប់ជាមូលដ្ឋាន ហើយត្រូវមានយុត្តិធម៌ និងមិនលម្អៀងចំពោះប្រជាពលរដ្ឋ។ កងកម្លាំង ទាំងអស់ ត្រូវ លុបបំបាត់ឱ្យអស់ នូវរាល់បាតុភាព អសកម្មនានា ពិសេស មន្ត្រី នគរបាលចរាចរណ៍ ចំពោះការអនុវត្តន៍ ច្បាប់ចរាចរណ៍ថ្មី ត្រូវមានអត្តចរិត សុភាពរាបសារជាមួយប្រជាពលរដ្ឋ ប៉ុន្តែត្រូវម៉ឺង មាត់ ចំពោះមុខច្បាប់ ដើម្បីឱ្យការអនុវត្តន៍ច្បាប់ មានប្រសិទ្ធភាព ដើម្បីធានានូវសុវត្ថិភាព និងសសណ្តាប់ធ្នាប់សាធារណៈ នៅដងផ្លូវជូនប្រជាពលរដ្ឋ។
គួរបញ្ជាក់ផងដែរថា មន្ត្រីនគរបាលជាតិ នៃស្នងការដ្ឋាននគរបាលខេត្តប៉ៃលិន ដែលបានប្រកាសផ្ទេរភារកិច្ច និងតែងតាំងមុខតំណែង និងបំពាក់ឋានន្តរស័ក្ដិ គឺមានចំនួន១៥រូប ក្នុងនោះមានថ្នាក់ឧត្តមសេនីយ៍ត្រី ១រូប ថ្នាក់វរសេនីយ៍ឯក ៣រូប ថ្នាក់វរសេនីយ៍ទោ ៧រូប និងថ្នាក់វរសេនីយ៍ត្រី ៤រូបផងដែរ៕ ដោយ ៖ អ៊ុងសារុំ
