កំពត៖ ដំណើរការផលិតអំបិលក្នុងខេត្តកំពត នៅបន្ដដំណើរការទៅមុខ បេីទោះបីជាមានការលំបាកមួយចំនួនក៏ដោយ។រយៈពេល៤ខែ ឆ្នាំ២០២០នេះ ការផលិតអំបិលនៅក្នុងខេត្តកំពត បានចំនួន ២៧.៧៧៥តោន ក្នុងនោះបានផ្គត់ផ្គង់ទៅលើទីផ្សារ ចំនួន ១២.៣៣២តោន។
នៅ ព្រឹកថ្ងៃទី៨ ខែឧសភា ឆ្នាំ២០២០ រដ្ឋបាលខេត្តកំពត បានបើកកិច្ចប្រជុំ ស្ដីពីការពិនិត្យ ពិភាក្សា លើការងារផលិតអំបិលក្នុងខេត្ត ក្រោមធិបតីភាពឯកឧត្តម ជាវ តាយ អភិបាលនៃគណៈអភិបាលខេត្ត និងមានការចូលរួម ពី អភិបាលរងខេត្ត ថ្នាក់ដឹកនាំ អង្គភាពចំណុះសាលាខេត្ត មន្ទីរ និងអាជ្ញាធរក្រុង ស្រុក និងឃុំ សង្កាត់ ពាក់ព័ន្ធនៃក្រុងកំពត និងស្រុកទឹកឈូព្រមទាំងក្រុមអ្នកផលិតអំបិលផងដែរ។
កិច្ចប្រជុំបានផ្ដោតសំខាន់លើការងារពិនិត្យ ពិភាក្សា ពីបញ្ហាការ រកដំណោះស្រាយ ធ្វើយ៉ាងណា ឲ្យការងារផលិតអំបិលនៅក្នុងខេត្តកំពត បន្តបានដំណើរការល្អ ទាំងគុណភាព និងបរិមាណ និងការគ្រប់គ្រងដីស្រែផលិត ដើម្បី ឆ្លើយតប ការធានាឲ្យបានតម្រូវការផ្គត់ផ្គង់ បើប្រាស់លើទីផ្សារក្នុងទូទាំងប្រទេសកម្ពុជាប្រកបដោយនិរន្តរភាព ។
ឯកឧត្តម ជាវ តាយ អភិបាលខេត្ត បានចាត់ទុកកិច្ចប្រជុំពេលនេះ ពិតជាសំខាន់ ដើម្បី រួមគ្នាពិនិត្យ ពិភាក្សាអំពីវឌ្ឍនភាពនៃការផលិតអំបិលក្នុងខេត្តកំពតឆ្នាំ២០២០នេះ ដោយធ្វើយ៉ាងណាឲ្យការផលិតអំបិលបន្តធានាបានទាំងគុណភាពនិងបរិមាណឆ្លើយតបតម្រូវការផ្គត់ផ្គង់លើទីផ្សារប្រើប្រាស់ក្នុងប្រទេសកម្ពុជាឲ្យបានគ្រប់គ្រាន់ប្រកបដោយនិរន្តរភាពថែមទៀត។
ឯកឧត្តមអភិបាលខេត្ត ក៏បានលើកឡើងដែរថា បើទោះបីក្នុងរយៈកាល ឆ្នាំ២០១៨- ២០១៩កន្លងមកនេះ មានការប្រឈមខ្លះដែលពាក់ព័ន្ធនឹងការផលិតអំបិលដោយសារ កត្តាអាកាសធាតុ ស្រែអំបិលមួយចំនួនមិនបានអនុវត្តការផលិត និងមួយចំនួនទៀតអនុវត្តហើយខ្វះកម្លាំងពលកម្មផង ជាលទ្ធផលចុងផលិតផលអំបិលមានការខ្វះខាត ក្នុងការផ្គត់ផ្គង់ទីផ្សារក្នុងប្រទេស ។
ដូច្នេះនៅចំពោះមុខនេះ ឯកឧត្តមអភិបាលខេត្ត ក៏បានសំណូមពរស្នើដល់ ក្រុមអ្នកផលិត ក៏ដូចជាអ្នកផ្គត់ផ្គង់អំបិលលើទីផ្សារ ក្នុងប្រទេស ចាប់ពីពេលនេះតទៅ ត្រូវរួមគ្នា ពិនិត្យពិភាក្សា ធ្វើយ៉ាងណា សិក្សាត្រៀមបម្រុងអំបិល សម្រាប់ផ្គត់ផ្គង់ការប្រើប្រាស់លើទីផ្សារក្នុងប្រទេសឲ្យបានគ្រប់គ្រាន់ ព្រោះតម្រូវការអំបិលប្រើប្រាស់ បានត្រូវការប្រើប្រាស់ក្នុងវិស័យជាច្រើន ជាពិសេសការប្រើប្រាស់សម្រាប់ជីវភាពប្រចាំថ្ងៃរបស់ប្រជាពលរដ្ឋ។
ចំណែកលោក ភូ លិ អភិបាលរងខេត្តកំពត បានអះអាងថា ដំណើរការផលិតអំបិលក្នុងខេត្តកំពត នៅតែបន្ដដំណើរការទៅមុខដូចធម្មតា បើទោះបីកន្លងទៅ មានជួបការលំបាកមួយចំនួនដូចជាបញ្ហាបម្រែបម្រួលអាកាសធាតុ និងដើមទុនសម្រាប់ធ្វើអាជីវកម្មជាដេីម។
ថ្លែងក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋបាលខេត្តកំពត» ដែលរៀបចំដោយអង្គភាពអ្នកនាំពាក្យរាជរដ្ឋាភិបាល នៅថ្ងៃទី០៨ ឧសភានេះ លោក ភូ លិ បានបញ្ជាក់ថា ជាមោទនភាពសម្រាប់ខេត្តកំពត គឺជាកន្លែងផលិតអំបិល ហើយដែលបានចែកចាយជូនប្រជាពលរដ្ឋនៅទូទាំងប្រទេសកម្ពុជា ដែលជាអំបិលមានគុណភាពល្អ។
លោក ភូ លិ កន្លងមកពេលដែលសហគមន៍អំបិលកើតឡើង សហគមន៍អំបិលក៏មានការព្រួយបារម្ភថា ពេលដែលផលិតបានទៅច្រើន យើងពិបាករកទីផ្សារ ប៉ុន្ដែកន្លងទៅមកដោយសារតែបម្រែបម្រួលអាកាសធាតុផង, វិបត្តិផលទុនផង ធ្វើឲ្យអ្នកផលិតអំបិលមានការលំបាកបន្ដិច។
ពាក់ព័ន្ធនឹងបញ្ហាអំបិលនេះដែរ បច្ចុប្បន្នថ្នាក់ដឹកនាំក្រសួងឧស្សាហកម្ម វិទ្យាសាស្រ បច្ចេកវិទ្យា និងនវានុវត្តន៍ រួមជាមួយគណៈអភិបាលខេត្តកំពត កំពុងខិតខំធ្វើយ៉ាងរឹតត្បិតអំបិល ដែលមានសារធាតុគីមី នាំចូលមកពីប្រទេសជិតខាងយកមកចែកចាយក្នុងប្រទេសកម្ពុជា។ នេះបេីតាមការបញ្ជាក់របស់លោក ភូ លិ៕
ដោយ៖កូឡាប