បាត់ដំបង៖ កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បុរស៤នាក់ ជួញដូររក្សាទុកនិងថ្នាំម៉ាទឹកកក២ថង់ ម៉ូតូ២គ្រឿងនិងសម្ភារពាក់ព័ន្ធមួយទៀត កំពុងកសាងសំណុំរឿងតាមនីតិវិធី។
ហេតុការណ៍ចាប់ឃាត់ខ្លួនជនសង្ស័យ៤នាក់នេះ បានធ្វើឡើងកាលពីម៉ោង១២និង៥០នាទីថ្ងៃទី៨ ខែឧសភា ឆ្នាំ២០២០ នៅចំណុច ប្រឡាយចិន ស្ថិតក្នុងក្រុមទី៤ ភូមិរលួស ឃុំមោង ស្រុកមោងឫស្សី ខេត្តបាត់ដំបង។
លោកឧត្តមសេនីយ៍ត្រី កុយ ហៀង ស្នងការរងទទួលផែនការងារប្រឆាំងគ្រឿងញៀនខេត្តបាត់ដំបង បានឲ្យដឹងថា ជនសង្ស័យ៤នាក់ ដែលចាប់ឃាត់ខ្លួន ទី១ ឈ្មោះសឿង និរក្សា ភេទប្រុស អាយុ២០ឆ្នាំ រស់នៅភូមិកន្សៃបន្ទាយ ឃុំមោង ស្រុកមោងឫស្សី ខេត្តបាត់ដំបង។ ទី២ ឈ្មោះខែន អគ្នេ ភេទប្រុស អាយុ ២០ឆ្នាំ រស់នៅភូមិកន្សៃបន្ទាយ ឃុំមោង ស្រុកមោងឫស្សី ខេត្តបាត់ដំបង។ ទី៣ ឈ្មោះសឿម វុទ្ធី ភេទប្រុស អាយុ ៥៨ឆ្នាំ រស់នៅភូមិតាតុក២ ឃុំមោង ស្រុកមោងឫស្សី ខេត្តបាត់ដំបង។ ទី៤ ឈ្មោះឆោម លឿត ហៅឃ្លឿត ភេទប្រុស អាយុ២៣ឆ្នាំ រស់នៅភូមិកន្សៃបន្ទាយ ឃុំមោង ស្រុកមោងឫស្សី ខេត្តបាត់ដំបង (ម្នាក់នេះមានដីកាបង្គាប់ឲ្យនាំខ្លួនរបស់ចៅក្រមស៊ើបសួរ សាលាដំបូងខេត្តបាត់ដំបង)។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក២ថង់ ទម្ងន់៣,១៧ក្រាម ម៉ូតូចំនួន២គ្រឿង កញ្ចប់បារី១ និងសម្ភារសម្រាប់ប្រើប្រាស់គ្រឿងញៀនមួយចំនួនទៀត ហើយចាប់ឃាត់ខ្លួន កាលពីម៉ោង១២និង៥០នាទីថ្ងៃទី៨ ខែឧសភា ឆ្នាំ២០២០ នៅចំណុច ប្រឡាយចិន ស្ថិតក្នុងក្រុមទី៤ ភូមិរលួស ឃុំមោង ស្រុកមោងឫស្សី ខេត្តបាត់ដំបង។
លោកឧត្តមសេនីយ៍ត្រី កុយ ហៀង បានបញ្ជាក់ថា កម្លាំងបានសហការជាមួយកម្លាំងប៉ូលិសស្រុក ចុះបង្ក្រាបបានករណីរនេះ ហើយចាប់ឃាត់ខ្លួនជនសង្ស័យ៤នាក់ និងវត្ថុតាងបានភ្លាមៗជាក់ស្ដែងតែម្ដង។ បច្ចុប្បន្ននេះ កម្លាំងបានកំពុង សាកសួរកសាងសំណុំរឿង បញ្ជូនជនសង្ស័យ និងវត្ថុតាង ទៅតុលាការ ដើម្បីចាត់ការទៅតាមផ្លូវច្បាប់ហើយ៕ ដោយៈអ៊ុងសារុំ
