ខេត្តកោះកុង ៖ កម្មករកម្មការិនីជិត ១០០នាក់ បំរើការងារនៅក្នុងរោងចក្រ KKN3 នៃតំបន់សេដ្ឋកិច្ចពិសេសខេត្តកោះកុង បានដួលសន្លប់ជាបន្តបន្ទាប់ នៅថ្ងៃអង្គារ ទី២៣ ខែមករា ឆ្នាំ២០១៨ ដោយមិនទាន់ដឹងមូលហេតុច្បាស់នោះទេ។
មន្ត្រីសម្របសម្រួល អង្គការលីកាដូ ប្រចាំខេត្តកោះកុង លោក អ៊ិន គង់ជិត បានឲ្យដឹងថា យ៉ាងហោចមានកម្មករកម្មការិនីជិត ១០០នាក់ បានដួលសន្លប់ជាបន្តបន្ទាប់ នៅក្នុងរោងចក្រ KKN3 នៃតំបន់សេដ្ឋកិច្ចពិសេសខេត្តកោះកុងកាលពីព្រឹកថ្ងៃអង្គារ ៧កើត ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី២៣ ខែមករា ឆ្នាំ២០១៨ ស្ថិតនៅក្នុងឃុំបាក់ខ្លង ស្រុកមណ្ឌលសីមា ខេត្តកោះកុង។
សមត្ថកិច្ចនគរបាលខេត្តកោះកុង បានអោយដឹងព័ត៌មានបឋមថា ករណីនេះ ទំនងជាអាចបណ្តាលមកពីបញ្ហាធុំក្លិនប្រេង ដែលបានសាយភាយនៅក្នុងទីតាំងតំបន់សេដ្ឋកិច្ចពិសេស ក៏ដូចជានៅក្នុងរោងចក្រ KKN3 នេះផ្ទាល់តែម្តង។
ទោះយ៉ាងណា នគរបាលខេត្តកោះកុង ឲ្យដឹងថា ការដួលសន្លប់កម្មករ នៅរោងចក្រខាងលើ នេះ ត្រូវបានមន្ត្រីស្ថាប័នជំនាញពាក់ព័ន្ធ បានស្រាវជ្រាវរកដើមហេតុ ដែលបណ្តាលអោយកម្មករកម្មការិនីនៅរោងចក្រ KKN3 ដួលសន្លប់ជាបន្តបន្ទាប់នេះរួចហើយ ប៉ុន្តែមិនទាន់បង្ហាញលទទ្ធផលនៅឡើយទេ៕ ដែន សីមា