ស្ទឹងត្រែង៖ សមត្ថកិច្ចចម្រុះចុះបង្ក្រាបទីតាំងស្តុកឈើ លួចលាក់អត់ច្បាប់ នៅក្នុងព្រៃមួយកន្លែង និងបានដកហូតឈើ ជាច្រើនសន្លឹក។ ការចុះបង្ក្រាបនោះ សមត្ថកិច្ចដកហូត យកឈើ ដែលប្រទះឃើញត្រង់ចំណុចភូមិកោះកី ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង កាលពីល្ងាចថ្ងៃទី៨ ខែឧសភា ឆ្នាំ២០២០។
សមត្ថកិច្ចចុះបង្ក្រាប បាននិយាយថា ឈើដែលចុះប្រមូល ត្រូវបានយកទៅរក្សាទុក នៅនៅសង្កាត់រដ្ឋបាលព្រៃឈើដុងក្រឡ។ លោកស្វាយ ពុទ្ធារ៉ា អភិបាលរងស្រុកបុរីអូរស្វាយសែនជ័យ គឺជាអ្នកដឹកនាំកម្លាំងចុះបង្ក្រាប។
លោកហេង ណាន មេបញ្ជាការកងរាជអាវុធហត្ថ ស្រុកបុរីអូស្វាយសែនជ័យ បានឲ្យដឹងថា មុនធ្វើការបង្ក្រាបឈើស្តុបទុកខាងលើ ដោយមានការចង្អុលបង្ហាញពីពលរដ្ឋ ហើយមានការដឹកនាំកម្លាំងសមត្ថកិច្ចចម្រុះ ចុះបង្ក្រាបដល់ទីតាំងតែម្តង។ ដឹកនាំដោយលោកស្វាយ ពុទ្ធារ៉ា អភិបាលរងស្រុកបុរីអូរស្វាយសែនជ័យ ទើបឈានដល់ការបង្ក្រាប ឈើប្រភេទសុក្រំ ចំនួន១១៩សន្លឹក។ ឈើទាំងអស់នោះ នៅមិនទាន់ដឹងចំនួនម៉ែត្រគូបនៅឡើយ៕ ដោយ ៖ សុខុម