ភ្នំពេញ ៖ អគ្គស្នងការរងនគរបាលជាតិ ឯកឧត្តម នាយឧត្តមសេនីយ៍ ហ៊ឹម យ៉ាន បានលើកឡើងថា ១សប្តាហ៍ នៃការរឹតបន្តឹងការអនុវត្តន៍ចរាចរណ៍ផ្លូវគោកកន្លងមកនេះ ស្ថានភាពចរាចរណ៍ មានភាពល្អប្រសើរជាងមុន ដោយសារបងប្អូនប្រជាពលរដ្ឋយ៉ាងច្រើនលើសលុបបានចូលរួមគោរពច្បាប់អនុវត្តច្បាប់ចរាចរណ៍ផ្លូវគោក និងគាំទ្រការរឹតបន្តឹងការអនុវត្តច្បាប់។
បើតាមសេចក្ដីប្រកាសព័ត៌មានរបស់គណៈកម្មការជាតិសុវត្ថិភាពចរាចរណ៍ផ្លូវគោក ស្ដីពីលទ្ធផលនៃការរឹតបន្តឹងអនុវត្តច្បាប់ស្ដីពីចរាចរណ៍ផ្លូវគោក ដែលចាប់អនុវត្តតាំងពីថ្ងៃទី ១ ឧសភាឆ្នាំ ២០២០។ ក្នុងរយៈពេលមួយសប្ដាហ៍កន្លងទៅនគរបាលចរាចរណ៍ផ្លូវគោកបានត្រួតពិនិត្យឃើញនូវបទល្មើសនឹងធ្វើការពិន័យចំពោះយានយន្តល្មើសច្បាប់សរុបចំនួន ១៣៩៦៨ករណីក្នុងនោះមានទោចក្រយានយន្តនិងត្រីចក្រយានយន្ត ចំនួន១០៨១៥ករណី ស្មើនឹង៧៧ភាគរយ និងរថយន្តគ្រប់ប្រភេទចំនួន ៣១៥៣ករណី ស្មើនឹង២៣ភាគរយ។ ជាមួយគ្នានេះស្ថានភាពចរាចរណ៍មានភាពល្អប្រសើរជាងមុនដោយគ្រោះថ្នាក់ចរាចរណ៍បានកើតឡើងចំនួន ៤៣ លើក ៩៥ លើកថយចុះ ៥២ លើកស្មើ ៤៤ភាគរយ ស្លាប់ ២៤ លើ ៤០នាក់ថយចុះ ១៦នាក់ ស្មើ ៤០ ភាគរយរបួស ៥៦ នាក់លើ ១១៥នាក់ថយចុះ ៥៩ នាក់ស្មើ ៥១,៣០ ភាគរយ ប្រៀបធៀបរយៈពេលដូចគ្នានៃខែឧសភា ឆ្នាំ ២០១៩។ បើប្រៀបធៀបជាមួយសប្តាហ៍ទី ៤ នៃខែមេសាឆ្នាំ ២០២០ មុននេះ គ្រោះថ្នាក់ចរាចរណ៍កើតឡើង ៤៣ លើកលើ ៥៥ លើកថយចុះ ១២ លើកស្មើ ២២ភាគរយ ស្លាប់២៤ នាក់លើ ៣៥ នាក់ថយចុះ ១១ នាក់ស្មើ ៣១ភាគរយ របួស៥៦លើ៥៨ ថយចុះ២នាក់ ស្មើ៣ភាគរយ។ ចំណុចកត់សម្គាល់នោះគឺអ្នកប្រើប្រាស់ផ្លូវយ៉ាងច្រើនលើសលប់នៅទូទាំងប្រទេសបានចូលរួមអនុវត្តច្បាប់ស្ដីពីចរាចរណ៍ផ្លូវគោកយ៉ាងផុលផុសដែលបានឆ្លុះបញ្ចាំងឲ្យឃើញអំពីការគោរពច្បាប់និងជាប្រភពលើកទឹកចិត្តដល់កងកម្លាំងអនុវត្តច្បាប់មានស្មារតីបន្តអនុវត្តភារកិច្ចកាន់តែសកម្មខ្លាំងក្លាថែមទៀត៕
ឯកឧត្តម នាយឧត្តមសេនីយ៍ ហ៊ឹម យ៉ាន បានថ្លែងក្នុងសន្និសីទសារព័ត៌មានស្តីពីការឹតបន្តឹងការអនុវត្តច្បាប់ចរាចរណ៍ផ្លូវគោក នាព្រឹកថ្ងៃទី៩ ខែឧសភា ឆ្នាំ២០២០នេះ នៅអគ្គស្នងការដ្ឋាននគរបាលជាតិ ថា ចំណុចកត់សម្គាល់នោះគឺ អ្នកប្រើប្រាស់ផ្លូវច្រើនលើសលប់នៅទូទាំងប្រទេស បានចូលរួមអនុវត្តន៍ច្បាប់ស្តីពីចរាចរណ៍ផ្លូវគោកយ៉ាងផុលផុស ដែលបានឆ្លុះបញ្ចាំងឲ្យឃើញ អំពីការគោរពច្បាប់ និងជាប្រភពលើកទឹកចិត្ត ដល់កងកម្លាំងអនុវត្តន៍ច្បាប់ មានស្មារតីបន្តអនុវត្តន៍ភារកិច្ច កាន់តែសកម្មខ្លាំងក្លាជាងមុន។
ឯកឧត្តម នាយឧត្តមសេនីយ៍ ហ៊ឹម យ៉ាន បញ្ជាក់ទៀតថា នគរបាលចរាចរណ៍បានកំណត់យកបទល្មើសអាទិភាពតែ១៦ប៉ុណ្ណោះ ដើម្បីមកអនុវត្ត ក្នុងនោះមានបទល្មើសម៉ូតូចំនួន៧ និងបទល្មើសបើកបររថយន្តចំនួន៩។ បទល្មើសម៉ូតូចំនួន៧ ដែលនឹងអនុវត្តរួមមាន៖ ទី១៖ មិនពាក់មួកសុវត្ថិភាព, ទី២៖ ស្រវឹង, ទី៣៖ មិនគោរពភ្លើង និងស្លាកសញ្ញា, ទី៤៖ ល្មើសការបត់ និងវ៉ាជែង, ទី៥៖ ដឹកលើចំណុះ, ទី៦៖ គ្មានស្លាកលេខ និងទី៧៖ ប្រើប្រាស់ទូរស័ព្ទដោយគ្មានកាស។ ដោយឡែកបទល្មើសរថយន្តទាំង៩ រួមមាន៖ ទី១៖ ល្បឿន, ទី២៖ ស្រវឹង, ទី៣៖ គ្មានបណ្ណបើកបរ, ទី៤៖ មិនគោរពភ្លើងសញ្ញា, ទី៥៖ ល្មើសក្នុងការបទ និងវ៉ាជែង, ទី៦៖ មិនពាក់ខ្សែក្រវ៉ាត់, ទី៧៖ ដឹកលើសចំណុះ, ទី៨៖ គ្មានស្លាកលេខ និងទី៩៖ និយាយទូរស័ព្ទដោយគ្មានឧករណ៍ភ្ជាប់សំឡេង។
ឆ្លៀតក្នុងឱកាសនេះ ឯកឧត្តមអគ្គស្នងការរង ក៏បានថ្លែងអំណរគុណ និងកោតសរសើរដល់សាធារណជនគ្រប់រូប ដែលបានចូលរួមគោរពច្បាប់ចរាចរណ៍ ធ្វើឲ្យអាត្រាគ្រោះថ្នាក់មានការថយចុះគួរឲ្យកត់សម្គាល់។ ជាមួយនឹងការថ្លែងអំគុណ និងកោតសរសើរ ឯកឧត្តមក៏បានបញ្ជាក់ជូនសាធារណជនដែរថា កងកម្លាំងអនុវត្តន៍ច្បាប់ស្តីពីចរាចរណ៍ផ្លូវគោក នឹងបន្តការរឹតបន្តឹងអនុវត្តច្បាប់ ស្តីពីចរាចរណ៍ផ្លូវគោក ប្រកបទៅដោយភាពម៉ឺងម៉ាត់ និងសិលធម៌វិជ្ជាជីវៈបន្តទៀត។ ដូចនេះ ដើម្បីបន្តពង្រឹងការអនុវត្តច្បាប់ និងលើកកម្ពស់សុវត្ថិភាពចរាចរណ៍ផ្លូវគោក គណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) សូមអំពាវនាវយ៉ាងទទូច ដល់សាធារណជនគ្រប់រូបដែលប្រើប្រាស់យានយន្ត សូមយកចិត្តទុកដាក់ទៅធ្វើប័ណ្ណបើកបរ យកយានយន្តទៅធ្វើការត្រួតពិនិត្យលក្ខណៈបច្ចេកទេស និងបំពេញកាតព្វកិច្ចផ្សេងទៀតដែលច្បាប់បានកំណត ប្រកបដោយស្មារតីភ្ញាក់រលឹកខ្ពស់។
ពាក់ព័ន្ធនឹងការរឹងបន្តឹងការអនុវត្តច្បាប់ចរាចរណ៍ផ្លូវនេះដែរ ឯកឧត្តម នាយឧត្តមសេនីយ៍ អគ្គស្នងការរងនគរបាលជាតិ នូវបានបានបញ្ជាក់ទៀតថា ចំពោះកងកម្លាំងនគរបាលចរាចរណ៍រូបណា ដែលប្រព្រឹត្ត ឬអនុវត្តន៍ច្បាប់ ខុសពីក្រមសីលធម៌វិជ្ជាជីវៈ ក្នុងពេលបំពេញភារកិច្ចរបស់ខ្លួន អគ្គស្នងការនគរបាលជាតិ នឹងដាក់ពិន័យទៅតាមច្បាប់កងកម្លាំង ឬចាត់វិធានការតាមផ្លូវច្បាប់ ព្រោះថាច្បាប់ចរាចរណ៍ក៏មានចែងច្បាស់ ប្រសិនបើនគរបាលចរាចរណ៍ណាប្រព្រឹត្តខុសឆ្គង ក្នុងការបំពេញភារកិច្ច គឺត្រូវទទួលទោសតាមច្បាប់ជាធរមាន។
ឯកឧត្តម នាយឧត្តមសេនីយ៍ ហ៊ឹម យ៉ាន បានបញ្ជាក់ថា ដើម្បីឆ្លើយតបព័ត៌មាន ក៏ដូចជាចម្ងល់របស់ប្រជាពលរដ្ឋ ពាក់ព័ន្ធនឹងការរឹតបន្តឹងការអនុវត្តន៍ច្បាប់ចរាចរណ៍ផ្លូវគោក អគ្គស្នងការដ្ឋាននគរបាលជាតិ បានរៀបចំប្រព័ន្ធព័ត៌មានទាន់ហេតុការណ៍ ១១៧ (Hotline 117) ដែលមានមន្ត្រីជំនាញប្រចាំការ ២៤ម៉ោង លើ ២៤ម៉ោង៕ដោយ កូឡាប
