ខេត្តកណ្តាល៖ ធនាគារអភិវឌ្ឍន៍ជនបទ និងកសិកម្ម បានដាក់កញ្ចប់ថវិកា ៥០លានដុល្លារ ដល់វិស័យកសិកម្មដូចជា ការចិញ្ចឹមសត្វ និងការដាំដុះបន្លែបង្ការជាដើម។
ក្នុងឱកាសចូលរួមធ្វើបទបង្ហាញ ស្តីពីលទ្ធភាពឥណទានអត្រាការប្រាក់ទាប នៅសាលាខេត្តកណ្តាល ឯកឧត្តម កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម បានបញ្ជាក់យ៉ាងដូច្នេះ ឲ្យដល់កសិករ សិប្បករ សហគ្រាសធុនតូច និងមធ្យមនៅទូទាំងខេត្តកណ្តាល។
ឯកឧត្តម បានប្រកាសជូនដំណឹងដល់ម្ចាស់សិប្បកម្ម ម្ចាស់សហគ្រាសធុនតូច និងមធ្យម ក្នុងវិស័យកែច្នៃផលិតផលកសិកម្ម វិស័យកសិ-ឧស្សាហកម្ម (លើកលែងតែសិប្បកម្ម សហគ្រាសធុនតូច និងមធ្យមក្នុងវិសយ័ស្រូវអង្ករ) ដែលមានតម្រូវការឥណទាន សម្រាប់ពង្រីកអាជីវកម្ម សូមទាក់ទងព័ត៌មានបន្ថែម តាមរយៈទូរសព្ទ័លេខ ០៧៧ ៧៥៩ ១៥៩,០១២ ៧០៦ ៦៣៦, ០៩៩ ៧១០ ៧៨៩។
បើតាមអគ្គនាយកធនាគារអភិវឌ្ឍន៍ជនបទ និងកសិកម្ម គោលបំណងដែលធនាគារ មកធ្វើបទបង្ហាញនាពេលនេះ គឺចង់ផ្សព្វផ្សាយអំពីគោលការណ៍ឥណទាន ដែលមានអត្រាការប្រាក់អនុគ្រោះចំនួន ៦ ភាគរយប្រចាំឆ្នាំ សម្រាប់ជាទុនបង្វិល (រយៈពេលខ្លី) ហើយ ៦,៥ភាគរយ ប្រចាំឆ្នាំ សម្រាប់ទុនវិនិយោគ (រយៈពេលវែង) និងលក្ខខណ្ឌសមស្របមួយចំនួន ដើម្បីទទួលបានឥណទានពីកម្មវិធី ហិរញ្ញប្បទានពិសេស របស់រាជរដ្ឋាភិបាលចំនួន ៥០លានដុល្លារ៕ដោយ៖សម្ផស្ស
