តាកែវ៖ អាវុធហត្ថខេត្តតាកែវ បានបញ្ជាក់ពីដំណើរនេះថា រឿងហេតុគួរឲ្យសង្វេក នៃឆាកជីវិតក្មេងស្ទាវ បានបន្សល់ទុកត្រឹមទឹកភ្នែក និងសំឡេងយំទ្រហឹង ពីក្រុមគ្រួសារ ជាពិសេសឳពុកម្តាយ ក្រោយត្រូវគូរកន ដែលមានគំនុំនឹងគ្នា ជិះម៉ូតូតាមកាប់សម្លាប់យ៉ាងព្រៃផ្សៃ ដោយប្រើពូថៅ បណ្តាលជនរងគ្រោះម្នាក់ស្លាប់ នៅនឹងកន្លែង និងពីរនាក់រងរបួសធ្ងន់ បាក់ជើងទាំង២នាក់ ។
លោកវរសេនីយ៍ឯក ង៉ែត ចាន់ធី មេបញ្ជាការរងកងរាជអាវុធហត្ថខេត្តតាកែវ បានឲ្យដឹងថា ឈានមកដល់ការឃាត់ខ្លួនមុខសញ្ញាជនសង្ស័យ ដែលជាបានធ្វើសកម្មភាព កាប់សម្លាប់គូរគំនុំ នៅវេលាម៉ោង២៣នឹង២២នាទីយប់ ថ្ងៃទី៨ ខែឧសភា ឆ្នាំ២០២០នេះ គឺមានការសម្របសម្រួល នីតិវិធីដោយ លោក ជីវ ចាន់តារា ព្រះរាជអាជ្ញាអមសាលាដំបូងខេត្ត ធ្វើការឡោមព័ទ្ធជុំវិញផ្ទះជនសង្ស័យ រួចឈានចូលទៅចាប់ខ្លួនជនសង្ស័យឈ្មោះ ខាត់ សង្ហា ភេទប្រុស អាយុ ២៧ឆ្នាំ មានមុខរបរ ជាងផ្សារដែក រស់នៅភូមិតាឌូ សង្កាត់រកាក្រៅ ក្រុងដូនកែវ ទាំងយប់តែម្តង ។
ក្រោយឃាត់ខ្លួនជនសង្ស័យ បានសារភាពថា មូលហេតុដែលរូបគេ និងបក្ខពួក កាប់សម្លាប់ជនរងគ្រោះនោះ គឺដោយសារតែរឿងគំនុំគុំគួននឹងគ្នា ។
សូមបញ្ជាក់ផងដែរថា ជនរងគ្រោះដែលត្រូវគេកាប់មានគ្នា ៣នាក់៖ ១ ឈ្មោះប៉ុល រឿនមករា ភេទប្រុស អាយុ ១៧ឆ្នាំ មុខរបបរ កសិករ (ស្លាប់) នៅកន្លែងកើតហេតុ ២. ឈ្មោះ មុត ចិនមិថុនា ភេទប្រុស អាយុ ២១ឆ្នាំ កសិករ របួសធ្ងន់ និង៣. ឈ្មោះ ហេង ស៊ីណា ភេទប្រុស អាយុ ១៨ឆ្នាំ សិស្ស របួសធ្ងន់ អ្នកទាំងបីនាក់រស់នៅភូមិចក សង្កាត់រកាក្នុង ក្រុងដូនកែវ ខេត្តតាកែវ។
បច្ចុប្បន្ននេះ កម្លាំងជំនាញកំពុងស្រាវជ្រាវ តាមចាប់ខ្លួនបក្ខពួករបស់ជនសង្ស័យបន្ថែមទៀត ដើម្បីយកមកផ្ដន្ទាទោសតាមច្បាប់៕ ដោយ៖ តាកែវ