ឆ្នាំជូត
រាសីខ្ពស់ត្រដែត។
ការងារ ៖ ក្នុងថ្ងៃនេះដោយសារយីអ៊ុនឡើងខ្ពស់ ម្ល៉ោះហើយបើទោះចង់ធ្វើអ្វីកុំគប្បីរង់ចាំយូរព្រោះថាផលល្អៗនោះតែងឆ្លើយតបដូចជាទីពេញចិត្តផង។
ជំនួញ ៖ របររកស៊ីជួញដូរវិញមានការទិញចូលលក់ចេញគ្រាន់បើ តែយ៉ាងណាលោកអ្នកទាល់តែខិតខំខ្លាំងទើបទទួលជោគជ័យជំនួញធំៗទៅរួច។ ការធ្វើដំណើរឆ្ងាយជិតជួបតែក្រុមមនុស្សជួយជ្រោមជ្រែងនិងយកចិត្តទុកដាក់។
ស្នេហា ៖ ប្រុសស្រីមានភាពត្រជាក់ត្រជុំនិងផ្អែមល្ហែមប្រពៃ៕
ឆ្នាំឆ្លូវ
រាសីល្អជាមធ្យម។
ការងារ ៖ នៅថ្ងៃនេះដំណើរជីវិតរបស់លោកអ្នកស្ថិតនៅលើកំណាត់ផ្លូវរដិបរដុបច្រើន ហេតុនេះទោះធ្វើអ្វីក៏តែងជួបបញ្ហាមិនល្អយាយីជាងនេះផង។
ជំនួញ ៖ របររកស៊ីជួញដូរក្នុងថ្ងៃនេះជួបបញ្ហាលំបាកក្នុងការរកផលចំណូលណាស់ ហើយការជួញជិតឆ្ងាយទៀតសោតជួបតែភាពរកាំរកូសមិនស្ទើរដែរទេ។ការធ្វើដំណើរចូរប្រយ័ត្នឧប្បត្តិហេតុយាយីបន្តិច។
ស្នេហា ៖ កំលោះក្រមុំមានរឿងរាវច្របូកច្របល់ហើយពិសេសឱ្យប្រយ័ត្នអ្នកទីបីចូលមកបង្កបញ្ហាដោយប្រការណាមួយ៕
ឆ្នាំខាល
រាសីស្រុតចុះ។
ការងារ ៖ នៅថ្ងៃនេះឃើញថាការប្រកបការងារអ្វីតែងជួបប្រទះបញ្ហារាំងស្ទះ និង រឿងរាវអុកឡុកយាយីនាំឱ្យមិនសូវស្រួលចិត្តនោះឡើយ។
ជំនួញ ៖ ការធ្វើជំនួញនៅថ្ងៃនេះជួបបញ្ហាលំបាកក្នុងការទាក់ទាញអតិថិជនបន្តិច ឯប្រាក់កម្រៃទៀតសោតទាល់តែខិតខំខ្លាំងទើបរកប្រាក់ចំណូលចិញ្ចឹមគ្រួសារគ្រាន់ធូរទៅរួច។
ស្នេហា ៖ គូស្នេហ៍កំលោះក្រមុំចូរប្រយ័ត្នការដើរពាសវាលកាលនាំកើតរឿងរ៉ាវអាក្រក់ណាមួយ ហើយជួបផលលំបាកនៅគ្រាខាងមុខមានតែទឹកភ្នែកជូតក្បាលជង្គង់៕
ឆ្នាំថោះ
រាសីល្អជាមធ្យម។
ការងារ ៖ នៅថ្ងៃនេះការប្រកបការងារអ្វីឃើញថាមានការជឿនលឿនទៅមុខយឺត ហើយពិសេសងាយកើតបញ្ហាជាមួយក្រុមមនុស្សក្បែរខ្លួនទៀតគប្បីមានការប្រយ័ត្នប្រយែង។
ជំនួញ ៖ ពុំសូវកាក់កបទេគឺលាភហេងច្រើនបោលហួសឬហោះរំលងជានិច្ច។ការធ្វើដំណើរឆ្ងាយជិតឃើញថាមានភាពរលូនល្អដូចសព្វមួយដង។
ស្នេហា ៖ ប្តីប្រពន្ធចូរប្រយ័ត្នជម្លោះវិវាទណាមួយហើយពិបាកក្នុងការផ្សះផ្សាគ្នាឡើងវិញ៕
ឆ្នាំរោង
រាសីខ្ពស់ត្រដែត។
ការងារ ៖ នៅថ្ងៃនេះដួងរាសីរបស់លោកអ្នកបានហក់លោតមកខ្ពស់វិញ ម្ល៉ោះហើយទោះធ្វើអ្វីឃើញថាមានការទទួលជោគជ័យនិងមានភាពសុខដុមគួរសម។ក្រៅពីនេះបើមានកិច្ចការអ្វីអាចសម្រុកពេញទីបានហើយដែរ។
ជំនួញ ៖ មានភាពកាក់កបគួរសមហើយបើមានជួញទីជិតឆ្ងាយទៀ់តសោតក៏អាចប្រមូលភោគផលចូលផ្ទះវិញយ៉ាងស្រួលចិត្តផងដែរ។ទាំងស្ត្រីបុរសលោកអ្នកគប្បីធ្វើបុណ្យដាក់ទានខ្លះដើម្បីសន្សំសេចក្តីសុខទៅគ្រាខាងមុខ។
ស្នេហា ៖ ប្តីប្រពន្ធកំលោះក្រមុំមានភាពផ្អែមល្ហែមនិងស្រស់ស្រាយចំពោះគ្នាគួរជាទីពេញចិត្ត៕
ឆ្នាំម្សាញ់
រាសីខ្ពស់ត្រដែត។
ការងារ ៖ នៅថ្ងៃនេះផ្តល់ផលល្អសម្រាប់លោកអ្នកចាត់ចែងការងារចាស់ថ្មី ព្រោះថាផលល្អៗតែងឆ្លើយតបមកវិញជានិច្ច។
ជំនួញ ៖ ទោះមានការជួញទីជិតឆ្ងាយតែងអាចប្រមូលភោគផលចូលផ្ទះវិញយ៉ាងត្រជាក់ចិត្ត។ការធ្វើដំណើរទីជិតឆ្ងាយជួបសេចក្តីសុខក្សេមក្សាន្តទាំងពេលទៅនិងត្រឡប់មកវិញ។
ស្នេហា ៖ ប្រុសស្រីមានផ្អែមល្ហែមនិងស្រស់ស្រាយចំពោះគ្នាប្រពៃ៕
ឆ្នាំមមី
រាសីល្អជាមធ្យម។
ការងារ ៖ នៅថ្ងៃនេះការប្រកបការងារក៏ដូច្នេះដែរ ត្រូវចេះរវាសរវៃប្រឹងប្រែងទើបក្តីប្រាថ្នាអ្វីមួយអាចឈោងចាប់បានទៅរួច។
ជំនួញ ៖ មានភាពរលូនល្អទៅមុខនិងការរកប្រាក់កម្រៃទៀតសោតក៏ហូរចូលខ្លះៗគ្រាន់កក់ក្តៅដែរ។ការធ្វើដំណើរឆ្ងាយជិតមិនសូវមានសុវត្តិភាពទេគប្បីបន្ថែមការប្រុងប្រយ័ត្នទើបប្រសើរ។
ស្នេហា ៖ ប្រុសស្រីជួបរឿងការយល់ខុសនិងភាពប្រចែប្រច័ណ្ឌចូលលុកលុយមិនស្ទើរដែរទេ៕
ឆ្នាំមមែ
រាសីល្អជាមធ្យម។
ការងារ ៖ នៅថ្ងៃនេះបើលោកអ្នកមានការប្រកបការងារមិនថាជាការងាររាជការឬក្រុមហ៊ុនឯកជនក្តីមានភាពប្រទាំងប្រទើសខ្លះៗផងដែរព្រោះតែក្រុមមនុស្សចាំចាប់កំហុសនិងព្យាបាទយាយី។
ជំនួញ ៖ មានដំណើរការទៅមុខយ៉ាប់យ៉ឺនបន្តិចពិតមែន តែក៏មានភាពសុខដុមប្រពៃណាស់ផង។
ស្នេហា ៖ មានការជឿនលឿនទៅមុខតិចតួច ឯបើថយក្រោយវិញនោះឆាប់រហ័សណាស់គប្បីមានការប្រយ័ត្នប្រយែង៕
ឆ្នាំវក
រាសីខ្ពស់ត្រដែត។
ការងារ ៖ នៅថ្ងៃនេះដំណើរជីវិតរបស់លោកអ្នកឃើញថានៅតែល្អប្រសើរដែរទេ ម្ល៉ោះហើយធ្វើអ្វីនៅតែជឿនលឿនទៅមុខជានិច្ច។ ក្នុងថ្ងៃនេះដែរដោយសារដួងរាសីឡើងខ្ពស់ ដូចនេះបើលោកអ្នកចង់ណាត់ចរចាឬទំនាក់ទំនងការងារក៏តែងទទួលផ្លែផ្កាដូចសមប្រកបទៀតផង។
ជំនួញ ៖ បើមានការប្រឹងប្រែងរត់ឆ្វេងស្តាំមិនបង់កម្លាំងឡើយគឺតែងហុចផ្លែផ្កាមកវិញគ្រាន់គួរជាទីកក់ក្តៅផងដែរ។
ស្នេហា ៖ មានភាពស្រស់ស្រាយនិងផ្អែមល្ហែមប្រពៃ៕
ឆ្នាំរកា
រាសីល្អជាមធ្យម។
ការងារ ៖ នៅថ្ងៃនេះទោះធ្វើអ្វីមួយក៏ដោយលោកអ្នកគប្បីមានការប្រយ័ត្នប្រយែងបន្តិចហើយត្រូវចងចាំថាផ្លែផ្កាឆ្លើយតបមកវិញមិនដូចជាទីគាប់ចិត្តនោះឡើយ។ក្រៅពីនេះដំណើរចេញក្រៅផ្ទះលោកអ្នកប្រយ័ត្នក្រុមមនុស្សចាក់រុកឆ្កឹះឆ្គៀលពីបញ្ហាអ្វីមួយ ហើយបង្កើតជម្លោះវិវាទជាមួយសត្រូវចាស់ថ្មីហើយគេបែរជាលួចសើចចំអកដាក់មកវិញ។
ជំនួញ ៖ របររកស៊ីជួញដូរពេលព្រឹកមានភាពរកាំរកូសច្រើនតែថ្ងៃបន្តិចពេលព្រះអាទិត្យរះពេញអាកាសវេហាឧបទ្រពចង្រៃទាំងពួងនឹងវិនាសជាអហោសិកម្មអស់ ហើយការរកស៊ីគាប់ប្រសើរឡើងវិញ។
ស្នេហា ៖ មានការប្រែប្រួលប្តូរផ្លាស់ព្រោះជួនត្រូវរ៉ូវគ្នាជួនទាស់ទែងគ្នា៕
ឆ្នាំច
រាសីល្អជាមធ្យម។
ការងារ ៖ នៅក្នុងថ្ងៃនេះឃើញថាដំណើរជីវិតរបស់លោកអ្នកនៅតែទទួលរងការប៉ះទង្គិចមួយចំនួនយាយីផង ដូចនេះទោះធ្វើអ្វីក៏តោងប្រយ័ត្នប្រយែងដែរពីព្រោះថាផលអាក្រក់ងាយរត់ចូលជាងសព្វមួយដង។
ជំនួញ ៖ មានបញ្ហាមិនល្អនិងផលប៉ះទង្គិចច្រើនយាយីដូចនេះទោះធ្វើអ្វីត្រូវមានចិត្តអត់ធ្មត់ហើយធ្វើមិនដឹងមិនឮខ្លះទើបប្រសើរហោង។ការធ្វើដំណើរឆ្ងាយជិតមានតែក្រុមមនុស្សស្វាគមន៍រាក់ទាក់ជានិច្ច។
ស្នេហា ៖ មានការប្រឆាំងនិងប្រទាំងប្រទើសចំពោះគ្នាច្រើន៕
ឆ្នាំកុរ
រាសីស្រុតចុះ។
ការងារ ៖ នៅថ្ងៃនេះដំណើរជីវិតរបស់លោកអ្នកមិនសូវគាប់ប្រសើរទេ ពិសេសការធ្វើដំណើរឆ្ងាយមិនសូវល្អប្រសើរសោះឡើយ។ ការប្រកបការងារឃើញថាមានការជឿនលឿនទៅមុខយឺតពិសេសធ្វើច្រើនអាចខុសច្រើនថែមទៀត។
ជំនួញ ៖ ពេលនេះជួបរឿងចំណាយធំ ឯផលកម្រៃនោះហូរចូលមានកម្រិតធ្វើឱ្យរែកពន់ភាពលំបាកលំបិនមិនស្ទើរដែរទេ។
ស្នេហា ៖ ប្រុសស្រីមានភាពប្រទាំងប្រទើស ព្រោះតែការមិនចេះអត់ឱនឱ្យគ្នា៕