បាត់ដំបងៈប្រជាពលរដ្ឋប្រកបរបរចិញ្ចឹមសត្វមាន់នៅខេត្តបាត់ដំបង បានត្អូញត្អែរពីការធ្លាក់ចុះតម្លៃមាន់ស្រែនិងប្រភេទមាន់៣សាសន៍ មានការធ្លាក់ចុះជាបន្តបន្ទាប់ ព្រោះបញ្ហាជំងឺកូវីដ១៩ នៅតែអូសបន្លាយ ដែលតម្រូវការសាច់មាន់មានការថយចុះ និងធ្វើឲ្យមានការប្រឈមនឹងការខាតបង់ផងដែរ។
ប្រជាកសិករចិញ្ចឹមមាន់លក្ខណៈគ្រួសារ នៅភូមិដូនទ្រី ឃុំជ្រៃ ស្រុកមោងឫស្សី ខេត្តបាត់ដំបង បាននិយាយប្រាប់ថា ក្រៅពីធ្វើស្រែ ពលរដ្ឋមួយចំនួនចាប់យកមុខរបរមួយទៀត គឺការចិញ្ចឹមមាន់ប្រភេទ៣សាសន៍ ដោយអ្នកខ្លះចិញ្ចឹមបានជាង១ឆ្នាំនិងអ្នកខ្លះទៀត ទើបចាប់ផ្ដើមចិញ្ចឹមនៅឆ្នាំ២០២០នេះ។ ការចិញ្ចឹមពីដំបូងលក់បានតម្លៃគួរសម ចាប់ពី១២០០រៀល ទៅ១៣០០០រៀល និងពេលខ្លះឡើងដល់ ១៤០០០រៀល ក្នុងមួយគីឡូក្រាម។ ដោយឃើញថាការចិញ្ចឹមមាន់កសិករឆាប់ឲ្យផល និងបានតម្លៃគួរសមនោះ ពួកគេបានបង្កើនការចិញ្ចឹមពី១០០ក្បាល ទៅ៦០០ក្បាល ស្រាប់តែនៅដើមឆ្នាំ២០២០នេះ តម្លៃមាន់បានធ្លាក់ចុះជាបន្តបន្ទាប់ រហូតដល់បច្ចុប្បន្នត្រឹមតម្លៃ១០០០០រៀលប៉ុណ្ណោះ ។ តម្លៃប៉ុណ្ណេះ ពួកគាត់មិនអាចទប់ទល់នឹងការចំណាយបាននោះទេ ហើយស្នើឲ្យមានការជួយគាំទ្រ។
គួរបញ្ជាក់ផងដែរថា ចាប់តាំងពីកម្ពុជាមានការឆ្លងរាលដាលនៃជំងឺកូវីដ១៩ ធ្វើឲ្យសណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន ត្រូវបានបិទជាបណ្ដោះអាសន្ន ទាំងពិធីមង្គលការនិងបុណ្យទានផ្សេងៗ នៅតាមផ្ទះរបស់ប្រជាពលរដ្ឋនៅខេត្តបាត់ដំបង មានការផ្អាក អស់ជាច្រើនកម្មវិធីមកនោះ ធ្វើឲ្យតម្លៃកសិផលមួយចំនួន ដូចជាបន្លែ ត្រីសាច់ជាដើម មានការធ្លាក់ចុះ ដែលបញ្ហានេះធ្វើឲ្យកសិករមួយចំនួន មិនអាចទូទាត់នឹងការផលិតបាន អ្នកខ្លះបានបោះបង់ការចិញ្ចឹមឬដាំដំណាំក៏មានផងដែរ ៕
ដោយ៖អ៊ុងសារុំ
