ខេត្តស្វាយរៀង៖ យ៉ាងហោចណាស់ បុរសម្នាក់ និងស្ត្រីម្នាក់ បានរបួសធ្ងន់និងស្រាល ដោយសារគ្រោះថ្នាក់ចរាចរណ៍ រវាងម៉ូតូនិងម៉ូតូ នៅថ្ងៃទី៩ ខែឧសភា ឆ្នាំ២០២០ វេលាម៉ោង១៧និង១០នាទី នៅ លើផ្លូវលំក្រាលក្រួសក្រហម ត្រង់ចំណុចផ្ទះ 400ខ្នង ស្ថិតក្នុងភូមិជីកដី ឃុំអណ្តូងត្របែក ស្រុករមាសហែក ខេត្តស្វាយរៀង។
សមត្ថកិច្ចបានឱ្យដឹងថា ជនរងគ្រោះទី១ ឈ្មោះពេជ ចន្ធូ ភេទស្រី អាយុ47ឆ្នាំ មុខរបរកសិករ រស់នៅភូមិជីកដី ឃុំអណ្តូងត្របែក ស្រុករមាសហែក ខេត្តស្វាយរៀង ជាអ្នកបើកបរម៉ូតូម៉ាក HONDA.C125 ស៊េរី 2008 ពណ៌ខ្មៅ ពាក់ផ្លាកលេខ តាកែវ1B.0326 បើកពីទិសខាងកើត មកលិច (ពុំពាក់មួកសុវត្ថិភាព)។ ទី២ ឈ្មោះ អាង ភារុំ ភេទប្រុស អាយុ២២ឆ្នាំ មុខរបរកសិករ រស់នៅភូមិជីកដី ឃុំអណ្តូងត្របែក ស្រុករមាសហែក ខេត្តស្វាយរៀង ជាអ្នកបើកម៉ូតូម៉ាក HONDA WAVE.C100 ពណ៌ក្រហម គ្មានផ្លាកលេខ បើកពីទិសខាងត្បូងមកជើង (ពុំពាក់មួកសុវត្ថិភាព)។
ប្រភពដដែលបានបន្តថា ករណីនេះគ្រោះថ្នាក់មនុស្ស២នាក់ ធ្ងន់ម្នាក់ គឺឈ្មោះ ពេជ ចន្ធូ រងរបួសបាក់កជើងខាងឆ្វេង ត្រូវបានបងប្អូនបញ្ជូនទៅ ព្យាបាលនៅមន្ទីរពេទ្យបង្អែកស្រុករមាសហែក។ ចំណែកឈ្មោះ អ៊ាង ភារុំ រងរបួសបាក់ម្រាមនាងដៃ ត្រូវបានបញ្ជូនទៅព្យាបាលនៅមណ្ឌលសុខភាពជីកដី បណ្តាលឱ្យខូចខាតម៉ូតូ២គ្រឿងស្រាល ។
បច្ចុប្បន្ន វត្ថុតាងបានយកមករក្សាទុក នៅប៉ុស្តិ៍នគរបាលរដ្ឋបាលអណ្តូងត្របែក។ មូលហេតុ គឺមកពីម៉ូតូម៉ាក HONDA WAVE ប្រើប្រាស់ល្បឿនលឿន ៕
ដោយ៖ វ៉ៃកូ
