កម្មករម្នាក់ដែលធ្វើការនៅក្នុងរោងចក្រកែច្នៃត្រី ស្ថិតក្នុងទីក្រុង Tema ប្រទេសហ្គាណា បានចម្លងវីរុសកូរ៉ូណាទៅដល់ កម្មករចំនួន ៥៣៣នាក់ដែលបំរើការក្នុងរោងចក្រជាមួយគ្នា។ នេះបើតាមការបញ្ជាក់របស់ប្រធានាធិបតីហ្គាណា Nana Akufo-Addo កាលពីថ្ងៃអាទិត្យ។
អាជ្ញាធរហ្គាណាបានធ្វើការរាយការណ៍ពីការផ្ទុះវីរុសនៅក្នុងរោងចក្រកាលពីថ្ងៃសុក្រ ប៉ុន្តែមិនបានផ្តល់ពត៌មានលំអិតឡើយ។
ប្រធានាធិបតីហ្គាណា ថ្លែងថា “មនុស្សទាំងអស់ចំនួន ៥៣៣នាក់ បានឆ្លងវីរុសក៉រូណាពីមនុស្សម្នាក់”។ លោកមិនបានផ្តល់សេចក្តីពីការផ្ទុះរាតត្បាតក្នុងរោគឡើយ ឬក៏ក្នុងរោងចក្រនោះមានវិធានការសុវត្ថិភាពយ៉ាងណាឡើយ។
លោកបន្តថា ចំនួនអ្នកឆ្លង ៥៣៣នាក់នោះ ស្មើនឹង ១១.៣ភាគរយនៃចំនួនអ្នកឆ្លងវីរុសសរុបក្នុងប្រទេសដែលមាន ៤.៧០០ករណី គិតត្រឹមថ្ងៃអាទិត្យពេលយប់។ វាគឺជាតួលេខឆ្លងសរុបដ៏ខ្ពស់បំផុតនៅក្នុងតំបន់អាហ្វ្រិចខាងលិច។
លោកក៏បានបញ្ជាក់ទៀថា មនុស្ស ២២នាក់បានស្លាប់ ខណៈដែលអ្នកជំងឺ ៤៩៤នាក់បានជាសះស្បើយ។
សូមបញ្ជាក់ថា វីរុសកូរ៉ូណា ឬ COVID-19 បានផ្ទុះឡើងដំបូងចេញពីទីក្រុងវូហាន ប្រទេសចិនកាលពីចុងឆ្នាំ ២០១៩។ រហូតមកដល់ពេលនេះ វីរុសមរណៈនេះបានផ្តាច់ជីវិតមនុស្សជាង ២៨២.០០០នាក់ និងឆ្លងទៅកាន់មនុស្សជាង ៤.១០០.០០០នាក់ទូទាំងពិភពលោក ៕