ភ្នំពេញ៖ ធនាគារអភិឌ្ឍន៍អាស៊ី ADB គ្រោងនឹងផ្តល់ហិរញ្ញប្បទានប្រមាណ ១.៣០០ លានដុល្លារអាមេរិក ដែលនឹងចូលរួមយ៉ាងសកម្ម ក្នុងការធ្វើយ៉ាងណាឱ្យការអនុវត្តយុទ្ធសាស្ត្រ ភាពជាដៃគូសម្រាប់អភិវឌ្ឍន៍កម្ពុជា ឆ្នាំ២០១៩-២០២៣ របស់ ADB សម្រេចបានជោគជ័យ ក៏ដូចជាដើម្បីឆ្លើយតបទៅនឹងតម្រូវការ នៃកិច្ចអភិវឌ្ឍរបស់កម្ពុជា តាមរយៈកម្មវិធី/គម្រោងអភិវឌ្ឍន៍ និងជំនួយបច្ចេកទេស (COBP) ឆ្នាំ២០២១-២០២៣។ បើគិតទាំងសហហិរញ្ញប្បទានពីដៃគូអភិវឌ្ឍន៍ផ្សេងៗ រួមជាមួយថវិកាបដិភាគ របស់រាជរដ្ឋាភិបាល កម្មវិធី/គម្រោងអភិវឌ្ឍន៍ និងជំនួយបច្ចេកទេសឆ្នាំ២០២១-២០២៣ របស់ ADB មានទឹកប្រាក់ចំនួនប្រមាណ ១,៥ ពាន់លានដុល្លារ។
ឯកឧត្តម វង្សី វិស្សុត រដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ និងជាអនុប្រធានឧត្តមក្រុមប្រឹក្សាសេដ្ឋកិច្ចជាតិ បានថ្លែងអំណរគុណយ៉ាងជ្រាលជ្រៅចំពោះ ADB ដែលបានផ្តល់ការជឿទុកចិត្ត និងជឿជាក់លើការដឹកនាំរបស់រាជរដ្ឋាភិបាលកម្ពុជា តាមរយៈការអនុម័តផ្តល់ហិរញ្ញប្បទានសហប្រតិបត្តិការ សម្រាប់ការអភិវឌ្ឍន៍នានានៅកម្ពុជា កាន់តែច្រើនជាងមុន និងទាន់ពេលវេលា តាមសំណើរបស់កម្ពុជា ដែលនឹងរួមចំណែកយ៉ាងធំធេង ក្នុងការអភិវឌ្ឍកម្ពុជា សំដៅជំរុញសេដ្ឋកិច្ចកម្ពុជាឡើងវិញ នៅក្នុងបរិការណ៍ជំងឺកូវីដ-១៩ នេះ។ គិតចាប់ពីឆ្នាំ១៩៩២ រហូតដល់បច្ចុប្បន្ន ADB បានផ្តល់ហិរញ្ញប្បទានសហប្រតិបត្តិការ ដល់ប្រទេសកម្ពុជា សម្រាប់ហិរញ្ញប្បទានគម្រោងអភិវឌ្ឍន៍នានា មានទឹកប្រាក់សរុបចំនួនប្រមាណ ៣.៤៨៥ លានដុល្លារអាមេរិក ដែលក្នុងនោះ ឥណទានសម្បទានចំនួនប្រមាណ ២.៩៨៣ លានដុល្លារអាមេរិក និងហិរញ្ញប្បទានឥតសំណងចំនួនប្រមាណ ៥០២ លានដុល្លារអាមេរិក។
ឯកឧត្តម វង្សី វិស្សុត មានប្រសាសន៍ថា ក្នុងបរិការណ៍នៃការរីករាលដាលនៃជំងឺកូវីដ-១៩, រាជរដ្ឋាភិបាលបាន ផ្តល់នូវអាទិភាពខ្ពស់បំផុត លើកិច្ចការប្រយុទ្ធប្រឆាំងនឹងជំងឺកូវីដ-១៩ ដើម្បីទប់ស្កាត់ការឆ្លង, ការចម្លង និងការពារអាយុជីវិតរបស់ប្រជាជន។ ជាក់ស្តែងចំនួននៃការឆ្លងមានត្រឹមតែ ១២២ ករណីប៉ុណ្ណោះ ដែលភាគច្រើននៃការឆ្លងជំងឺនេះ គឺការនាំចូល ឬមានប្រភពខាងក្រៅ និងមួយចំនួនតូចជាការឆ្លងបន្តទៅប្រជាពលរដ្ឋក្នុងស្រុក។ ទន្ទឹមនឹងនេះ រាជរដ្ឋាភិបាលក៏ផ្តោតការយកចិត្តទុកដាក់ លើការជួយអន្តរាគមន៍ ដើម្បីការរក្សាលំនឹងជីវភាពប្រជាជន ពិសេសសម្រាប់ប្រជាជនក្រីក្រ និងក្រុមជនងាយរងគ្រោះ ព្រមទាំងអ្នកបាត់បង់ការងារតាមរយៈការដាក់ចេញ នូវគោលនយោបាយ និងកម្មវិធីជំនួយសង្គម, ការបន្តអនុវត្តគម្រោងសាច់ប្រាក់ពលកម្ម និងការរៀបចំវគ្គបណ្តុះបណ្តាលជំនាញទន់ និងការផ្តល់ប្រាក់ឧបត្ថម្ភដល់កម្មករ នៅពេលដែលរោងចក្រព្យួរអាជីវកម្ម។
ឯកឧត្តមមានប្រសាសន៍បន្តថា កម្មវិធី/គម្រោងអភិវឌ្ឍន៍ និងជំនួយបច្ចេកទេសនេះ គឺមួយផ្នែកជាសមិទ្ធផលនៃការពិភាក្សា ប្រកបដោយភាពគ្រប់ជ្រុងជ្រោយរួមគ្នា រវាងក្រសួងស្ថាប័នរបស់រាជរដ្ឋាភិបាល និង ADB កាលពីថ្ងៃទី៦ ខែមីនា ឆ្នាំ២០២០ និងមួយផ្នែកទៀត គឺជាការស្នើសុំរបស់រាជរដ្ឋាភិបាលបន្ទាន់ និងការវិវត្តថ្មីៗរបស់កម្ពុជាផ្ទាល់តែម្តង។ ជាក់ស្តែង កម្មវិធីគាំទ្រចំណាយ និងការឆ្លើយតបទៅនឹងជំងឺកូវីដ-១៩ ដែលមានទឹកប្រាក់សរុបចំនួន ២៥០ លានដុល្លារអាមេរិក ត្រូវបានផ្តល់ការអនុម័តដោយក្រុមប្រឹក្សាភិបាល ADB កាលពីពេលថ្មីៗនេះ តាមសំណើបន្ទាន់របស់កម្ពុជាផងដែរ។ បន្ថែមពីនេះ ក្នុងកិច្ចគាំទ្រដល់ការអភិវឌ្ឍសហគ្រាសធុនតូច-មធ្យម (SME) នៅកម្ពុជា, ក្រសួងសេដ្ឋកិច្ច និងហិរញ្ញវត្ថុក៏បានស្នើឱ្យ ADB ពិនិត្យមើលការបញ្ចូលនូវសមាសភាពនៃធានាឥណទាន សម្រាប់ SME ទៅក្នុងគម្រោងជំរុញការអភិវឌ្ឍកសិធុរកិច្ច ប្រកបដោយការប្រកួតប្រជែង ដែលមានទឹកប្រាក់សរុបចំនួនប្រមាណ ១១១ លានដុល្លារអាមេរិក ដែលនឹងជួយដោះស្រាយបញ្ហាប្រឈមជាគន្លឹះរបស់ SME។ ឯកឧត្តមក៏បានបន្ថែមទៀតថា សម្រាប់ការគាំទ្រដល់កិច្ចអភិវឌ្ឍន៍គម្រោងវិនិយោគសាធារណៈនៅកម្ពុជា ដូចមានចែងក្នុងអនុក្រឹត្យ ស្តីពីការគ្រប់គ្រងគម្រោងវិនិយោគសាធារណៈ (PIM) រាជរដ្ឋាភិបាលគ្រោងនឹងបង្កើតមូលនិធិអភិវឌ្ឍន៍គម្រោង ហើយហិរញ្ញប្បទានសម្រាប់មូលនិធិនេះ ក៏ត្រូវបានដាក់បញ្ចូលទៅក្នុង កម្មវិធី COBP នេះ ផងដែរ៕ដោយ៖សម្ផស្ស
