នាវាពិឃាតរបស់ប្រទេសអ៊ីរ៉ង់បានធ្វើការបាញ់សាកល្បងមីស៊ីល ខុសបច្ចេកទេស បណ្តាលឲ្យចំ និងលិចនាវាមួយទៀត បណ្តាលឲ្យមនុស្សយ៉ាងតិច ២០នាក់ស្លាប់បាត់បង់ជីវិត។
ការបាញ់ខុសបច្ចេកទេសនោះកើតឡើងក្នុងអំឡុងពេល ធ្វើសមយុទ្ធជើងទឹក កាលពីថ្ងៃអាទិត្យម្សិលមិញ នៅឈូងសមុទ្រពែក្ស។ នេះបើតាមសេចក្តីរាយការមិនផ្លូវការណ៍។
សេចក្តីរាយការណ៍បឋមបានអះអាងថា មីស៊ីល C-802 Noor ត្រូវបានបាញ់ចេញពីនាវាពិឃាតឈ្មោះ Jamaran និងបានហោះខុសបច្ចេកទេស ទៅចំនាវាឈ្មោះ Konarak។
របាយការណ៍បន្តទៀតថា មានមនុស្សចន្លោះ ៣០ ទៅ ៤០នាក់នៅលើនាវា Konarak មុនពេលវាលិច ដោយសារត្រូវគ្រាប់មីស៊ីល។
មេបញ្ជាការរបស់នាវា Konarak ក៏ស្ថិតក្នុងចំណោមអ្នកស្លាប់ផងដែរ។
ប្រភពពីកងបដិវត្តន៍អ៊ីស្លាមអ៊ីរ៉ង់បានចាត់ទុកហេតុការណ៍នោះ ជាកំហុសមនុស្ស បើទោះជាមិនទាន់មានសេចក្តីប្រកាសផ្លូវការ ណាមួយពីយោធាអ៊ីរ៉ង់ក្តី រហូតមកដល់ពេលនេះ។
ឧបទ្ទវហេតុនោះកើតឡើង បន្ទាប់ពីមានសកម្មភាពច្របូកច្របល់ នៅក្នុងឈូងសមុទ្រពែក្ស ក្នុងរយៈពេលប៉ុន្មានសប្តាហ៍នេះ ជាមួយនឹងភាពតានតឹងរវាងអ៊ីរ៉ង់ និងអាមេរិច។
សូមបញ្ជាក់ថា កាលខែកមរា ដើមឆ្នាំ ២០២០នេះ អ៊ីរ៉ង់រងការថ្កោលទោសយ៉ាងខ្លាំង ក្រោយយោធារបស់ខ្លួន បានបាញ់មីស៊ីលច្រឡំគោលដៅ បណ្តាលឲ្យចំ និងធ្លាក់យន្តហោះដឹកអ្នកដំណើរអ៊ុយក្រែនមួយគ្រឿង បណ្តាលឲ្យអ្នកដំណើរទាំងអស់ចំនួន ១៧៦នាក់ស្លាប់បាត់បង់ជីវិត។
ការបាញ់ច្រឡំគោលដៅរបស់យោធាអ៊ីរ៉ង់ កើតឡើង ក្រោយពេលកងទ័ពអាកាសរបស់អាមេរិច បានធ្វើការវាយប្រហារតាមដែនអាកាស ផ្តាច់ជីវិតមេបញ្ជាការជាន់ខ្ពស់ របស់អ៊ីរ៉ង់ឈ្មោះ Qasem Soleimani៕
អត្ថបទប្រែសម្រួលដោយ៖ សុភ័ក្រ
ប្រភព៖ trtworld