ភ្នំពេញ៖ នាព្រឹកថ្ងៃចន្ទ ទី១១ ខែឧសភា ឆ្នាំ២០២០ ឯកឧត្តម កឹម សុខា បានទទួលជួប ឯកឧត្តម ឯកអគ្គរដ្ឋទូតអាល្លឺម៉ង់ ប្រចាំព្រះរាជាណាចក្រកម្ពុជា នៅគេហដ្ឋានរបស់លោក ក្នុងរាជធានីភ្នំពេញ។
បើតាមលោកម៊ុត ចន្ថា ជំនួយការលោកកឹម សុខា បានថ្លែងថា ជាកិច្ចចាប់ផ្តើម ឯកឧត្តម ឯកអគ្គរដ្ឋទូត បានសាទរចំពោះជំនួបរវាងឥស្សរជនខ្មែរទាំងពីរ គឺសម្តេចអគ្គមហាសេនាបតីតេជោ ហ៊ុន សែន និង ឯកឧត្តម កឹម សុខា នៅថ្ងៃទី៥ ខែឧសភា។ លោកឯកអគ្គរដ្ឋទូតក៏បានបង្ហាញនូវការគាំទ្រចំពោះការជួបនេះដោយចាត់ទុកថាជារឿងវិជ្ជមាន។
ក្នុងជំនួបនេះ ឯកឧត្តម កឹម សុខា និងឯកឧត្តម ឯកអគ្គរដ្ឋទូត បានពិភាក្សាគ្នា អំពីសុខទុក្ខ និងជីវភាពរបស់ប្រជាពលរដ្ឋខ្មែរ ក្នុងស្ថានភាពកូវីដ-១៩ និងអំពីស្ថានភាពអនាគតទៀត។
តាមរយៈផេកហ្វេសប៊ុកនៅថ្ងៃចន្ទទី ១១ ខែឧសភា ឆ្នាំ២០២០ លោកកឹម សុខា បានលើកឡើងថា ក្នុងសប្តាហ៍នេះ ខ្ញុំនឹងទទួលជួបជាមួយនឹងឯកអគ្គរដ្ឋទូត-ឯកអគ្គរាជទូត នៃប្រទេសកាន់លទ្ធិប្រជាធិបតេយ្យ សំខាន់ៗមួយចំនួន ដែលមានស្ថានទូតនៅភ្នំពេញ ដោយផ្ទាល់នៅគេហដ្ឋានរបស់ខ្ញុំជាបន្តបន្ទាប់។ ដោយឡែកឯកអគ្គរដ្ឋទូត-ឯកអគ្គរាជទូត នៃប្រទេសជាមិត្តប្រចាំព្រះរាជាណាចក្រកម្ពុជា មួយចំនួនទៀត ដែលមិនមានទីតាំងស្ថានទូតនៅក្នុងទឹកដីកម្ពុជា ស្របពេលមានជំងឺកូវីដ១៩ មិនអាចមកជួបខ្ញុំផ្ទាល់បាន ក៏បានផ្ញើសារ និងទំនាក់ទំនងតាមបណ្តាញសង្គមមកសួរសុខទុក្ខខ្ញុំផងដែរ។
០៦ ឧសភា ២០២០
សូមបញ្ជាក់ថា ឯកឧត្តម កឹម សុខា តែងតែប្រកាន់ខ្ជាប់នូវមនោសញ្ចេតនាប្រកបដោយភាតរភាព ព្រហ្មវិហារធម៌ និងស្មារតីខ្មែរតែមួយ ជាពិសេស ក្នុងកាលៈទេសៈដែលមានទុក្ខលំបាក។
ឯកឧត្តមបានអញ្ជើញអុជធូបគោរពវិញ្ញាណក្ខន្ធសពនៃអ្នកឧកញ៉ា ព្រឹទ្ធមហាឧបាសិកា ធម្មញ្ញាណវិវឌ្ឍនា ប៊ុន ស៊ាងលី មាតាក្មេកសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា និងជាមាតាបង្កើតសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅគេហដ្ឋានរបស់សម្តេចតេជោ ក្នុងរាជធានីភ្នំពេញ នៅរសៀល ថ្ងៃទី៥ ខែឧសភា ឆ្នាំ២០២០។
ឯកឧត្តមបានសម្តែងនូវសមានចិត្តដោយក្តីក្តុកក្តួល និងសោកស្តាយជាពន់ពេកជាមួយសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ក៏ដូចជាសាច់ញាតិ ចំពោះការបាត់បង់មាតាក្មេក ម្តាយបង្កើត និងជីដូន ប្រកបដោយព្រហ្មវិហារធម៌ខ្ពស់ និងជាទីគោរពស្រឡាញ់។ ឯកឧត្តមក៏បានចូលរួមរំលែកនូវមរណទុក្ខដ៏ក្រៀមក្រំជាមួយសម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំងសាច់ញាតិផងដែរ។ ឯកឧត្តមសូមឧទ្ទិសបួងសួងសូមឲ្យដួងវិញ្ញាណក្ខន្ធអ្នកឧញ៉ា ព្រឹទ្ធមហាឧបាសិកាធម្មញ្ញាណវីវឌ្ឍនា ប៊ុន ស៊ាងលី បានអញ្ជើញទៅសោយសុខក្នុងសុគតិភព កុំបីឃ្លៀងឃ្លាតឡើយ។
នាឱកាសនោះ សម្តេចតេជោ ហ៊ុន សែន និង ឯកឧត្តម កឹម សុខា បានជួបសំណេះសំណាលគ្នាអស់រយៈពេលជិត ៥០នាទី អំពីសុខទុក្ខ និងផលប្រយោជន៍ជាតិ និងប្រជាពលរដ្ឋខ្មែរ៕ដោយ៖កូឡាប