ភ្នំពេញ៖ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ហាមមន្ត្រីនគរបាលអនុវត្ត រឹតបន្តឹងច្បាប់ចរាចរណ៍ទាំងអស់ ដាច់ខាតមិនត្រូវឃាត់អ្នកបើកបរ ដើម្បីត្រួតពិនិត្យឯកសារឡើយ លើកលែងតែមានអំពើល្មើសជាក់ស្ដែងប៉ុណ្ណោះ ដូចជាមិនមានស្លាកលេខ មិនពាក់មួកសុវត្ថិភាព មិនពាក់ខ្សែក្រវ៉ាត់ និយាយទូរស័ព្ទពេលបើកបរ ………។ ល ។
ឯកឧត្តម បានជំរុញ និងដាក់បទបញ្ជាឲ្យថ្នាក់ដឹកនាំ ពិសេសស្នងការនគរបាលរាជធានី-ខេត្ត យកចិត្តទុកដាក់ដឹកនាំដោយផ្ទាល់លើការងារនេះ និងណែនាំកម្លាំងក្រោមឱវាទដែលមានភារកិច្ចអនុវត្តការងារនេះគ្រប់គោលដៅក្នុងដែនសមត្ថកិច្ចរបស់ខ្លួន ហាមដាច់ខាតមិនត្រូវឃាត់អ្នកបើកបរយានយន្តដើម្បីត្រួតពិនិត្យឯកសារពាក់ព័ន្ធឡើយ លើកលែងតែមានអំពើល្មើសច្បាប់ នឹងត្រូវអនុវត្តតាមគោលការណ៍ថ្នាក់ដឹកនាំដែលបានកំណត់ “ម៉ូតូ០៧ចំណុច,ឡាន០៩ចំណុច” ក្នុងកិច្ចប្រតិបត្តិការបំពេញភារកិច្ចមន្ត្រីនគរបាលទាំងអស់ត្រូវគោរពក្រមសីលធម៌ ទន់ភ្លន់ ម៉ឺងម៉ាត់ យោគយល់ និងស្លៀកពាក់ឯកសណ្ឋានឲ្យបានត្រឹមត្រូវ ព្រមជាមួយនឹងការយកចិត្តទុកដាក់ទៅលើការអនុវត្តវិធានអនាម័យដើម្បីបង្ការជំងឺឆ្លងកូវីដ១៩។
ឯកឧត្តមបានសង្កត់ធ្ងន់ទៅលើមន្ត្រីនគរបាលទាំងឡាយណាដែលអនុវត្តខុសវិជ្ជាជីវៈ និងបទបញ្ជាទាំងឡាយរបស់ថ្នាក់ដឹកនាំ និងបានព្រមានចាត់វិធានការអនុវត្តវិន័យ។ ម្យ៉ាងទៀត ក្នុងនាមជាមន្ត្រីអនុវត្តត្រូវធ្វើជាគំរូសម្រាប់ប្រជាពលរដ្ឋក្នុងការគោរពច្បាប់ចរាចរណ៍ផ្លូវគោក។
នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ ថ្លែងប្រាប់ក្រុមអ្នកសារព័ត៌មាន ក្រោយបញ្ចប់កិច្ចប្រជុំ ផ្សព្វផ្សាយវិធានការ ពង្រឹងការអនុវត្តច្បាប់ស្ដីពីចរាចរណ៍ផ្លូវគោក ថា ក្នុងកិច្ចប្រជុំគណៈកម្មាធិការសុវត្ថិភាពចរាចរណ៍ផ្លូវគោក កាលពីពេលកន្លងទៅ អគ្គស្នងការដ្ឋាននគរបាលជាតិ បានស្នើទៅក្រសួងសាធារណការ និងដឹកជញ្ជូន ពិនិត្យឡើងវិញការបំពាក់ផ្លាកលេខលើយានយន្ដកែច្នៃ ព្រោះនៅពេលនេះយានយន្ដកែច្នៃ មិនទាន់មានបំពាក់ផ្លាកលេខត្រឹមត្រូវនោះទេ។
នាយឧត្តមសេនីយ៍ ហ៊ឹម យ៉ាន បានបញ្ជាក់ច្បាស់ថា មន្ដ្រីនគរបាលចរាចរណ៍ មិនផាកពិន័យ ចំពោះយានយន្ដដឹកកសិផលទាំងអស់នោះទេ។ ឯកឧត្តម នាយឧត្តមសេនីយ៍ អគ្គស្នងការបានបញ្ជាក់ហើយថា យើងមិនទាន់អនុវត្តរឹតបន្ដឹងទៅលើពួកគាត់ទេ យើងទុកពេលឲ្យក្រសួងសាធារណការ បន្ដការសិក្សា និងពិនិត្យលើការធ្វើផ្លាកលេខជូនពួកគាត់សិន។ ដូច្នេះយើងអនុគ្រោះប្រភេទ យានយន្ដកែច្នៃដឹកកសិផល របស់ប្រជាពលរដ្ឋ។
នៅព្រឹកថ្ងៃចន្ទ ទី១១ ខែឧសភា ឆ្នាំ២០២០នេះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ អញ្ជើញដឹកនាំកិច្ចប្រជុំផ្សព្វផ្សាយវិធានការពង្រឹងការអនុវត្តច្បាប់ស្តីពីចរាចរណ៍ផ្លូវគោក នៅអគ្គស្នងការដ្ឋាននគបាលជាតិ។
កិច្ចប្រជុំដ៏មានសារសំខាន់នេះ មានការចូលរួមពី អគ្គស្នងការរង ប្រធាន-អនុប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ស្នងការ-ស្នការរងទទួលផែនចរាចរណ៍ និងសណ្តាប់ធ្នាប់រាជធានី-ខេត្ត ៕ដោយ៖កូឡាប