ការិយាល័យស៊ើបអង្កេតសហព័ន្ធអាមេរិច (FBI) និងអ្នកជំនាញសន្តិសុខអ៊ីនធឺណេត ជឿជាក់ថា ហែកឃ័ររបស់ចិន (Hacker) ព្យាយាមលួចទិន្នន័យស្រាវជ្រាវអំពីការអភិវឌ្ឍវ៉ាក់សាំងប្រឆាំងនឹងវីរុសកូរ៉ូណា។ នេះបើតាមសារព័ត៌មានចំនួន ២បានចុះផ្សាយកាលពីថ្ងៃចន្ទ។
FBI និងក្រសួងសន្តិសុខមាតុភូមិ គ្រោងនឹងចេញការព្រមានអំពីការហែករបស់ចិន ខណៈដែលរដ្ឋាភិបាល និងក្រុមហ៊ុនឯកជនកំពុងតែប្រណាំងប្រជែងគ្នាអភិវឌ្ឍន៍វ៉ាក់សាំង COVID-19។ នេះបើតាមការចុះផ្សាយរបស់ Wall Street Journal និង New York Times។
ក្រុមហែកឃ័រក៏មានគោលដៅលួចព័ត៌មាន និងកម្មសិទ្ធិបញ្ញាអំពីការព្យាបាល និងការធ្វើតេស្តវីរុស COVID-19 ផងដែរ។
មន្ត្រីអាមេរិចបានធ្វើការចោទប្រកាន់ថា ហែកឃ័រទាំងនោះជាប់ទាក់ទងនឹងរដ្ឋាភិបាលចិន។ ការព្រមានជាផ្លូវការនឹងធ្វើឡើងក្នុងរយៈពេលប៉ុន្មានថ្ងៃខាងមុខនេះ។
នៅក្នុងទីក្រុងប៉េកាំង អ្នកនាំពាក្យក្រសួងការបរទេសចិនឈ្មោះ Zhao Lijian បានធ្វើការច្រានចោលការចោទប្រកាន់នោះ ដោយលើកឡើងថា ចិនប្រឆាំងដាច់ខាតចំពោះការវាយប្រហារតាមប្រព័ន្ធអ៊ីនធឺណិតទាំងអស់។
អ្នកនាំពាក្យរូបនោះថ្លែងថា “ពួកយើងកំពុងឈានមុខគេក្នុងការព្យាបាល COVID-19 និងស្រាវជ្រាវវ៉ាក់សាំង។ វាគឺជារឿងអសិលធម៌ដែលវាយប្រហារចិន ដោយពាក្យចចាមអារ៉ាម និងការមួលបង្កាច់ដោយគ្មានភស្តុតាង”។
សូមបញ្ជាក់ថា សហរដ្ឋអាមេរិចកំពុងតែងរងការវាយប្រហារយ៉ាងធ្ងន់ធ្ងរ ពីសត្រូវមើលមិនឃើញ គឺ វីរុស COVID-19 ហើយរហូតមកដល់ពេលនេះ អាមេរិចមានអ្នកស្លាប់ជាង ៨១.០០០នាក់ និងអ្នកឆ្លងជិត ១,៤លាននាក់។ អ្នកជាសះស្បើយមាន ២១៩.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia