ខេត្តស្វាយរៀង៖ បុរសដែលជាអ្នកទិញអេតចាយម្នាក់ ត្រូវបានកម្លាំងសមត្ថកិច្ច នៃអធិការដ្ឋាននគរបាលក្រុងបាវិត ធ្វើការឃាត់ខ្លួនក្រោយពេលដែលទទួល បានពាក្យបណ្តឹងពីជនរងគ្រោះ កាលពីវេលាម៉ោង ១៤និង៣០នាទីរសៀល នៅថ្ងៃទី១១ខែឧសភាឆ្នាំ២០២០ ។
សមត្ថកិច្ចបានឱ្យដឹងថា ក្រោយពីកម្លាំងជំនាញអធិការដ្ឋាននគរបាលក្រុងបាវិត បានទទួលបណ្ដឹងផ្ទាល់មាត់ពីឈ្មោះ ចាំង ផឹង ភេទប្រុស អាយុ ៣០ឆ្នាំ ជនជាតិចិន មុខរបរប្រធានផ្នែកជាងភ្លើង ទីលំនៅខេត្តស៊ីឈួន ប្រទេសចិន អំពីករណីចោរលួចខ្សែភ្លើង នៅរោងចក្រផលិតកង់ (អេ វើហ្គ្រេន) ដែលទីតាំងស្ថិតក្នុងភូមិថ្នាញ សង្កាត់បាទី ក្រុងបាវិត ខេត្តស្វាយរៀងថា កាលពីអំឡុងថ្ងៃទី៥ ដល់ទី៩ ខែ ឧសភាឆ្នាំ២០២០ ហើយក៏បានចាប់ផ្ដើមស្រាវជ្រាវ រករហូតដល់ថ្ងៃទី១១ ខែឧសភា ឆ្នាំ២០២០ ក៏បានរកឃើញខ្សែភ្លើងនៅផ្ទះអ្នកទិញអេតចាយម្នាក់ មិនស្គាល់ឈ្មោះ ក្រោយពីទទួលបានបណ្ដឹងរួច សមត្ថកិច្ចយើងបានចុះដល់កន្លែងកើតហេតុ រួចក៏បាននាំខ្លួនជនសង្ស័យឈ្មោះ សុខ វិបុល ភេទប្រុស អាយុ ៣៧ឆ្នាំ មានទីលំនៅភូមិព្រៃខ្ជាយ ឃុំកំពង់ត្រាច ស្រុករមាសហែក ខេត្តស្វាយរៀង រួមទាំងវត្ថុតាង(ខ្សែភ្លើងចំនួន ១៩៣គីឡូក្រាម) យកមកអធិការដ្ឋាននគរបាលក្រុងបាវិតដើម្បីធ្វើការសាកសួរ ។
ប្រភពដដែលបានបន្តថា នៅចំពោះមុខសមត្ថកិច្ចជនសង្ស័យ បានឆ្លើយសារភាពថា៖ ខ្លួនបានទិញខ្សែភ្លើងនេះ ពីរឬបីដងរួចមកហើយ មានពេលខ្លះយប់ ពេលខ្លះថ្ងៃ ពីអ្នកលក់ ៤ទៅ៥នាក់ បានដឹកនឹងម៉ូតូយកមកលក់ឲ្យខ្លួន (តែមិនបានស្គាល់ឈ្មោះអ្នកយកមកលក់ទេ) ។
បច្ចុប្បន្នជនសង្ស័យ ត្រូវបានសមត្ថកិច្ចយើងឃាត់ខ្លួន ជាបណ្តោះអាសន្ននៅ អធិការរដ្ឋាននគរបាលក្រុងបាវិត ដើម្បីកសាងសំណុំរឿងបញ្ជូនទៅការរិយាល័យជំនាញខេត្ត ចាត់ការបន្ត៕ដោយ៖ វ៉ៃកូ