ព្រះវិហារសាសនាទាំងអស់ នៅក្នុងប្រទេសអ៊ីរ៉ង់ នឹងត្រូវធ្វើការបើកជាបណ្តោះអាសន្ន នៅថ្ងៃអង្គារនេះ ដែលវាគឺជាជំហានមួយ របស់រដ្ឋាភិបាលក្នុងគម្រោងបន្ធូរបន្ថយ ការរឹតបន្តឹងក្នុងគោលបំណង ទប់ស្កាត់ការរាតត្បាតនៃវីរុសកូរ៉ូណា។
សេចក្តីសម្រេចក្នុងការបើកដំណើរការ ព្រះវិហារបណ្តោះអាសន្ន ត្រូវបានធ្វើឡើងដោយ មានការប្រឹក្សាជាមួយនឹងក្រសួងសុខាភិបាល។ នេះបើតាមសារព័ត៌មាន IRIB បានដកស្រង់សម្តីរបស់ លោក Mohammad Qomi ប្រធានអង្ការអភិវឌ្ឍន៍អ៊ីស្លាម។
លោកបាននិយាយកាលពីថ្ងៃចន្ទថា ព្រះវិហារទាំងអស់នឹងធ្វើការបើក តែរយៈពេល ៣ថ្ងៃប៉ុណ្ណោះ ដើម្បីរំលឹកដល់ពេលរាត្រី សម្រាប់ខែពិសិដ្ឋនៃបុណ្យ រ៉ាម៉ាដាន (Ramadan) ហើយវាមិនច្បាស់ទេថាតើ វិហារនឹងត្រូវបន្តបើកទៀតឬយ៉ាងណាទេ។
ការសម្រេចចិត្តបើដំណើរការវិហារឡើងវិញ កើតឡើងទោះបីជានៅផ្នែកខ្លះនៃប្រទេសអ៊ីរ៉ង់ មានការកើនឡើងនៃចំនួន អ្នកឆ្លងវីរុសកូរ៉ូណាថ្មីយ៉ាងណាក្តី។
កាលពីថ្ងៃសុក្រកន្លងទៅនេះ មានការបន្តការជួបជុំបួងសួង នៅក្នុងទីក្រុងរហូតដល់ ១៨០ក្នុងប្រទេសអ៊ីរ៉ង់ដែលទីកន្លែងទាំងអស់នោះ ត្រូវបានគេមើលឃើញថា មានហនិភ័យទាបនៃការឆ្លងវីរុសកូរ៉ូណា ក្រោយពេលមានការផ្អាកពិធីអស់រយៈពេល ២ខែ។
សូមបញ្ជាក់ថា ប្រទេសអ៊ីរ៉ង់មានការរងគ្រោះយ៉ាងធ្ងន់ធ្ងរ ពីការរាតត្បាតរបស់វីរុសកូរ៉ូណា។ នៅថ្ងៃអង្គារនេះ នៅអ៊ីរ៉ង់ មានអ្នកឆ្លងវីរុសមរណៈនេះ សរុបទាំងអស់ចំនួន ១០៩.០០០នាក់ និងអ្នកស្លាប់ ៦.៦៨៥នាក់ ខណៈដែលអ្នកជាសះស្បើយមានជិត ៩០.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
