បាត់ដំបង៖ អាជ្ញាធរខេត្តបាត់ដំបង បានស្ដារប្រឡាយទឹកមួយខ្សែប្រវែងជាង ២០០០ម៉ែត្រ ដើម្បីក្នុងការនាំទឹកពីស្ទឹងសង្កែ សម្រាប់ប្រើប្រាស់ប្រចាំថ្ងៃ និងសម្រាប់ស្រោចស្រព ដំណាំកសិកម្មផ្សេងៗ និងបម្រើផលប្រយោជន៍ ដល់ប្រពលរដ្ឋចំនួន៥ភូមិ ក្នុងសង្កាត់ក្ដុលដូនទាវ។
ការស្ដារប្រឡាយនេះ គឺជាគម្រោងថវិកាមូលនិធិ របស់សាលាសង្កាត់ក្ដុលដូនទាវ រួមទាំងការចូលរួមរបស់អាជ្ញាធរខេត្ត ក្រុង ក្រុមការងារថ្នាក់ជាតិ ចុះជួយក្រុងបាត់ដំបង និងសប្បុរសជននានា ក្នុងការអភិវឌ្ឍហេដ្ឋារចនាសម្ព័ន្ធភូមិឃុំ និងជីវភាពពលរដ្ឋឲ្យកាន់តែមានភាពរីកចម្រើន។
លោក ផេង សិទ្ធី អភិបាលក្រុងបាត់ដំបង បានប្រសាសន៍ថា ប្រឡាយនេះមានប្រវែងជាង២០០០ម៉ែត្រ គឺមានអាយុកាលជាច្រើនឆ្នាំ គឺធ្លាប់បានស្ដាររួចម្ដងមកហើយ ប៉ុន្តែដោយយូរឆ្នាំពេក វាក៏គោករាក់មិនអាចផ្ទុកទឹកបានច្រើន ហើយពិបាកក្នុងការនាំទឹកពីស្ទឹងសង្កែ សម្រាប់ជាប្រយោជន៍ ដល់ពលរដ្ឋនៅក្នុងសង្កាត់ បានប្រើប្រាស់ប្រចាំថ្ងៃ ឬសម្រាប់ស្រោចស្រពដំណាំផ្សេងៗ ហើយសម្រា
ប់ទឹកទៀតសោត អាចហូរចូលមកដោយខ្លួនឯង ពីស្ទឹងសង្កែក្នុងរដូវវស្សារប៉ុណ្ណោះ និងនៅពេលរដូវប្រាំង ទាល់តែបូមដាក់បានមានទឹកឲ្យប្រើប្រាស់។
ប្រជាពលរដ្ឋដែលទទួលប្រយោជន៍ពីប្រឡាយនេះ បាននិយាយលើកឡើងថា តាំងពីប្រឡាយនេះ គោករាក់មក គឺផ្ទុកទឹកមិនបានយូរនោះទេ និងនៅពេលរដូវប្រាំងម្ដងៗ អាជ្ញាធរភូមិត្រូវដើរប្រមូលលុយតាមផ្ទះ ដើម្បីបូមទឹកដាក់ ទើបបានប្រើប្រាស់ដែលការប្រមូលនេះ ពេលខ្លះមានផលពិបាកផងដែរ ព្រោះអ្នកខ្លះឲ្យតិចនិងអ្នកខ្លះឲ្យច្រើន ដែលធ្វើឲ្យមានការច្រណែនគ្នា និងទិតៀនគ្នាទៅវិញទៅមក។ សម្រាប់ការនាំទឹកយកទៅស្រោចស្រព ដំណាំកសិកម្មវិញ ក៏មិនបានគ្រប់គ្រាន់ដែរ ព្រោះប្រឡាយរាក់មិនអាចផ្ទុកទឹកបានច្រើន ហើយពេលដែលនាំទឹកមកម្ដងៗ មានការដណ្ដើម មិនមានការចុះសម្រុងគ្នានោះទេ។
គួរបញ្ជាក់ថា ពលរដ្ឋស្ថិតនៅក្នុងសង្កាត់ក្ដុលដូនទាវនេះ នឹងទទួលផលប្រយោជន៍ផងដែរ ពីការស្ដារសាងសង់នៃទំនប់ស្ទាក់ទឹក សាលាតាអន នៅចំណុចដងស្ទឹងសង្កែ ស្ថិតក្នុងស្រុកឯកភ្នំ ដែលនឹងគ្រោងបញ្ចប់នៅចុងឆ្នាំ២០២១ខាងមុខ ដោយទំនប់នេះ នឹងអាចឲ្យពលរដ្ឋក្នុងក្រុងបាត់ដំបង និងស្រុកមួយចំនួន នៅជាប់នឹងដងស្ទឹង អាចមានទឹកសម្រាប់ធ្វើស្រែ ចាប់ពី ២ទៅ៣ដងក្នុងមួយឆ្នាំៗផងដែរ៕ដោយ៖អ៊ុងសារុំ