ខេត្តឧត្ដរមានជ័យ៖ បន្ទាប់បណ្តាញសង្គម បានបង្ហោះរូបថតជាច្រើនសន្លឹក ពាក់ព័ន្ធនឹងបុរសម្នាក់ ឈ្មោះ ផាណា បានកាច់ដៃកាច់ជើងកូនចុងរបស់ខ្លួន ដែលមានអាយុមិនទាន់បាន ១ឆ្នាំផង បណ្តាលឲ្យបាក់ជើង និងបាក់ដៃរួចមក ស្នងការនគរបាលខេត្តឧត្ដរមានជ័យបានអញ្ជើញឈ្មោះ ធួន ផាណា មកសាកសួរពាក់ព័ន្ធនឹងករណីកាច់ដៃកាច់ជើងកុមារម្នាក់នោះ ដែលមានទីលំនៅក្រុងសំរោង ខេត្តឧត្តរមានជ័យ។
លោកឧត្ដមសេនីយ៍ទោ ម៉ែន លី ស្នងការនគរបាលខេត្តឧត្ដរមានជ័យ បានឲ្យដឹងថា នៅព្រឹកថ្ងៃទី ១៣ ខែ ឧសភា ឆ្នាំ ២០២០ ដោយមានការអនុញ្ញាតិពីព្រះរាជអាជ្ញាអមសាលាដំបូងខេត្ត ឧត្តរមានជ័យ សមត្ថកិច្ចជំនាញរបស់ស្នងការដ្ឋាននគរបាលខេត្ត បានអញ្ជើញឈ្មោះ ធួន ផាណា មកសាកសួរពាក់ព័ន្ធនឹងករណីកាច់ដៃកាច់ជើងកុមារម្នាក់នៅក្រុងសំរោង ខេត្តឧត្តរមានជ័យ ។
បើតាមការផ្សាយរបស់ផេកហ្វេសប៊ុក Long Samnang កាលពីថ្ងៃទី១២ខែឧសភាឆ្នាំ២០២០នេះ បានឲ្យដឹងថា “អញថា មិនចង់ផុសរូបអាចុយម្រាយឯងទេ មិនចង់ជ្រលក់ តែអាចុយម្រាយឯង វាបំពានសិទ្ធិអញ មករហូត? បងប្អូនបើបាន ឃើញអា ផាន់ណា កន្លែងណា មេតា ជួយចាប់ខ្លួនរបស់វាជូនប៉ូលិសផង….. វានេះ ជាឃាតករ កាច់ដៃកាច់ជើងក្មេងប្រុស អាយុប្រាំពីខែ
ឬក៏អាចទាកទងមកលេខ របស់ខ្ញុំផ្ទាល់បាន។ បងប្អូនបើបានឃើញបុរសម្នាក់នេះឈ្មោះ ផាន់ណា កន្លែងណា សូមមេតា្តជួយឃាត់ខ្លួននិងរាយការណ៍ជូនសមត្ថកិច្ចផង ព្រោះជននេះបានប្រើប្រាស់អំពើហឹង្សា ធ្វើទារុណកម្មលើក្មេង ដោយកាច់ដៃកាច់ជើងក្មេងប្រុសអាយុប្រាំពីខែ កាលពីរថ្ងៃទី២៨ ខែមេសា ឆ្នាំ២០១៩ ហើយបច្ចុប្បន្នជនបង្កកំពុងរត់គេចខ្លួន”។
ហ្វេសប៊ុកមួយចំនួនបានបង្ហោះព័ត៌មានថា ឈ្មោះ ផាណានេះ បានកាច់ដៃកាច់ជើងកូនចុងរបស់ខ្លួន ដែលមានអាយុមិនទាន់បាន ១ឆ្នាំ ស្រួលបួលផង ។ ក្រោយកើតហេតុ ម្ដាយកុមាររងគ្រោះបាននាំកូនទៅពេទ្យ និងបានដាក់ពាក្យបណ្ដឹងនៅ ស្នងការដ្ឋាននគរបាលខេត្តឧត្ដរមានជ័យ ដើម្បីឲ្យចាត់ការឈ្មោះធួន ផាណា តាមផ្លូវច្បាប់ ៕
ដោយ៖កូឡាប
