ប៉ៃលិន៖ ឯកឧត្តម ផាន់ ចាន់ធុល អភិបាលខេត្តប៉ៃលិន បានបន្តចុះសំណេះសំណាល សួរសុខទុក្ខ និងផ្សព្វផ្សាយ អំពីវិធានការបង្ការ និងទប់ស្កាត់ការរីករាលដាលជំងឺកូវីដ-១៩ តាមខ្នងផ្ទះ ព្រមទាំងឧបត្ថម្ភស្បៀងអាហារ ដល់ប្រជាពលរដ្ឋ ដែលមានជីវភាពខ្វះខាត និងរងផលប៉ះពាល់សេដ្ឋកិច្ចគ្រួសារ នៅក្នុងសង្កាត់ទួលល្វា និងសង្កាត់បរយ៉ាខា ក្រុងប៉ៃលិន ចំនួន ៦៩គ្រួសារ កាលពីថ្ងៃទី១២ ខែឧសភា ឆ្នាំ២០២០ ។
ឯកឧត្តម ផាន់ ចាន់ធុល អភិបាលខេត្តប៉ៃលិន បានមានប្រសាសន៍ថា នៅក្នុងប្រទេសកម្ពុជា ត្រូវបានគេរកឃើញមានអ្នកឆ្លងជំងឺនេះក៏ដោយ ប៉ុន្តែសម្រាប់ខេត្តប៉ៃលិន រហូតមកដល់ពេលនេះ នៅមិនទាន់រកឃើញមានអ្នកឆ្លងជំងឺនេះនៅឡើយទេ។ ប៉ុន្តែទោះបីជាយ៉ាងណា យើងមិនត្រូវធ្វេសប្រហែសនោះទេ គឺត្រូវរួមគ្នាបង្ការនិងទប់ស្កាត់ ការរីករាលដាលជំងឺកូវីដ ១៩ នេះ ដោយអនុវត្តវិធានការយ៉ាងម៉ឺងម៉ាត់ របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសេចក្តីណែនាំ របស់ក្រសួងសុខាភិបាល។
ដោយសារការព្រួយបារម្ភជាខ្លាំង ចំពោះជំងឺកូវីដ-១៩ ធ្វើឱ្យក្រុមហ៊ុន សហគ្រាស និងកន្លែងការងារមួយចំនួនត្រូវបានបិតទ្វារ បណ្តាលឱ្យប្រជាពលរដ្ឋមួយចំនួន អត់ការងារធ្វើ ហើយពលរដ្ឋខ្លះ ដែលធ្វើជាពលករនៅក្រៅប្រទេស ត្រូវបង្ខំចិត្តវិលត្រឡប់មកកាន់ស្រុកកំណើត និងលំនៅដ្ឋានវិញ ដូច្នេះធ្វើឱ្យប៉ះពាល់ដល់សេដ្ឋកិច្ចក្រុមគ្រួសារ ហើយជាក់ស្តែងនៅថ្ងៃនេះ អាជ្ញាធរខេត្តនិងក្រុមការងារ បាននាំយកអំណោយស្បៀងអាហារ មកឧបត្ថម្ភដល់បងប្អូននៅតាមខ្នងផ្ទះ ព្រោះមិនអាចធ្វើការប្រមូលផ្តុំមនុស្សច្រើនបាន។ បើទោះបីជាអំណោយស្បៀងអាហារទាំងនេះ មិនបានបំពេញតាមតម្រូវការ របស់បងប្អូនក៏ពិតមែន តែក៏អាចដោះស្រាយបានមួយកម្រិតផងដែរ។
សូមលោកតា លោកយាយ អ៊ុំពូមីង និងបងប្អូនទាំងអស់ ត្រូវខិតខំប្រឹងប្រែងប្រកបមុខរបរចិញ្ចឹមជីវិត ដើម្បីបង្កើនជីវភាព ឱ្យបានធូរធារជាងមុន។ ពិសេសត្រូវរស់នៅស្អាត ហូបស្អាត មានអនាម័យ ដោយត្រូវពាក់ម៉ាស នៅកន្លែងសាធារណៈ និងលាងសម្អាតដៃឱ្យបានជាប្រចាំ ក្នុងន័យចូលរួមបង្ការ និងទប់ស្កាត់ការរីករាលដាលនៃជំងឺ កូវីដ ១៩។
សូមបញ្ជាក់ថា ប្រជាពលរដ្ឋមានជីវភាពខ្វះខាត ដែលបានទទួលអំណោយស្បៀង អាហារពីអាជ្ញាធរខេត្ត មានចំនួន ៦៩គ្រួសារ ក្នុងនោះសង្កាត់បរយ៉ាខា ចំនួន ៣៥គ្រួសារ និងសង្កាត់ទួលល្វា ចំនួន ៣៤គ្រួសារ ដោយក្នុង ១គ្រួសារ ទទួលបាន អង្ករ ២៥គីឡូក្រាម ត្រីខ ១យួរ ទឹកត្រីទឹកស៊ីអ៊ីវ ១យួរ សាប៊ូ ១ដុំ និងទឹកអាលកុល សម្រាប់លាងសម្អាតដៃ ១ដប ផងដែរ៕
ដោយ ៖ អ៊ុងសារុំ