ស្ត្រីវ័យ ១១៣ឆ្នាំម្នាក់ ដែលត្រូវគេជឿជាក់ថាជាមនុស្សមានវ័យចំណាស់បំផុតក្នុងប្រទេសអេស្ប៉ាញ បានយកឈ្នះលើវីរុសកូរ៉ូណា នៅមណ្ឌលចូលនិវត្តន៍ កន្លែងដែលមនុស្សជាច្រើននាក់បានស្លាប់ ដោយសារវីរុសដ៏កាចសាហាវនេះ។ នេះបើតាមការបញ្ជាក់របស់មណ្ឌល កាលពីថ្ងៃអង្គារម្សិលមិញនេះ។
លោកយាយ Maria Branyas ដែលកើតនៅអាមេរិច បានឆ្លងវីរុសកាលពីខែមេសា នៅមណ្ឌលមើលថែមនុស្សចាស់ ស្ថិតក្នុងទីក្រុង Olot។ គាត់បានរស់នៅទីនោះក្នុងរយៈពេល ២០ឆ្នាំចុងក្រោយ ហើយគាត់បានប្រយុទ្ធនឹងវីរុស នៅក្នុងបន្ទប់ដាច់ដោយឡែករបស់គាត់។
អ្នកនាំពាក្យមណ្ឌលមើលថែមនុស្សចាស់បាននិយាយថា “លោកយាយបានឆ្លងផុតពីជំងឺនោះ ហើយគាត់មានសុខភាពល្អ”។
“ឥឡូវនេះ គាត់មានអារម្មណ៍ល្អ គាត់បានធ្វើតេស្តកាលពីសប្តាហ៍មុន ហើយលទ្ធផលគឺអវិជ្ជមាន”។
លោកយាយ Maria Branyan ដែលមានកូន ៣នាក់ ត្រូវបានគេដាក់ឲ្យនៅដាច់ដោយឡែក ក្នុងបន្ទប់អស់រយៈពេលជាច្រើនសប្តាហ៍ ដោយមានបុគ្គលិកម្នាក់ប៉ុណ្ណោះ ត្រូវបានអនុញ្ញាតឲ្យទៅពិនិត្យគាត់។
សូមបញ្ជាក់ថា អេស្ប៉ាញគឺជាប្រទេសមួយក្នុងចំណោមប្រទេសផ្សេងៗទៀត ដែលរងគ្រោះខ្លាំងពីការវាយប្រហារ របស់វីរុសកូរ៉ូណា ឬ COVID-19 ចាប់តាំងពីវាផ្ទុះចេញពីប្រទេសចិន កាលពីចុងឆ្នាំ ២០១៩។
បើតាមតួលេខចុងក្រោយ អេស្ប៉ាញមានអ្នកឆ្លងវីរុសសរុបជាង ២២៨.០០០នាក់ និងស្លាប់ ២៦.៩២០នាក់។ អ្នកជាសះស្បើយមានជាង ១៣៩.០០០នាក់៕ប្រភព៖ Channelnewsasia/ Google
អត្ថបទប្រែសម្រួលដោយ៖ សុភ័ក្រ
