ភ្នំពេញ៖ បុរសសង្ហានារីរូបស្រស់ ពីអ្នកមិនដឹងថា ជាគូរសង្សារឬប្ដីប្រពន្ននោះទេ បើកបររថយន្តម៉ាកឡង់គ្រីស័រ នៅតាមបណ្តោយផ្លូវ 371 លុះមកដល់ត្រង់ចំណុចកន្លែងកើតហេតុ ស្រាប់តែម៉ូតូ 1 គ្រឿងបើកបរបញ្ច្រាសទិសគ្នា បានរេចង្កូតមកបុកពីមុខរថយន្ត យ៉ាងពេញទំហឹងបណ្ដាលឲ្យខាងម្ចាស់ម៉ូតូស្លាប់ ពេលបញ្ជូនទៅមន្ទីរពេទ្យ។
ហេតុការណ៍នេះ បានកើតឡើងកាលពីវេលាម៉ោង 11 និង 30 នាទីយប់ត្រូវថ្ងៃទី 12 ខែឧសភាឆ្នាំ 2020 ស្ថិតក្នុងសង្កាត់បឹងទំពុនទី 2 ខណ្ឌមានជ័យ រាជធានីភ្នំពេញ។
មុនពេលកើតហេតុ គេឃើញរថយន្តម៉ាកឡង់គ្រីស័រ បើកបរតាមបណ្តោយផ្លូវ៣៧១ ពីលិចមកកើត ស្រាប់តែមកដល់ត្រង់ចំណុចកើតហេតុ គេឃើញម៉ូតូ 1 គ្រឿងទៀត បើកបរពីកើតមកលិច ស្រាប់តែម៉ូតូនោះ បើករេចង្កូតមកបុកចំពីមុខ រថយន្តបណ្ដាលឱ្យបោកក្បាល នឹងថ្នល់ឈាមដាបពេញថ្នល់។
ប្រជាពលរដ្នខំទាក់ទងហៅឡានពេទ្យ មកជួយសង្គ្រោះដែរ តែអកុសលបានស្លាប់ លើឡានពេទ្យបាត់ទៅហើយ រីឯខាងម្ចាស់ម៉ូតូស្គុបពីនោះ នៅមិនទាន់ស្គាល់អត្តសញ្ញាណនៅឡើយនោះទេ ម្ចាស់រថយន្តត្រូវបានសមត្ថកិច្ចឃាត់ខ្លួន ទាំងពីរនាក់ នាំខ្លួនទៅបុស្តិ៍ផងដែរ។ ម្ចាស់រថយន្តបង្កមានឈ្មោះ ស្រេង ហុង អាយុ៤២ឆ្នាំ មុខរបរមន្ត្រីនគរបាលរស់នៅ ភូមិត្រពាំងថ្លឹង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ៕
ដោយ៖ហង់ ភក្ត្រា និងសាម៉េត