ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) នៅរសៀលថ្ងៃទី២៣ ខែមករា ឆ្នាំ២០១៨នេះ បានចេញសេចក្តីប្រកាសអំពីលទ្ធផល នៃ កិច្ចប្រជុំពិគ្រោះយោបល់ លើសេចក្តីព្រាងបទបញ្ជា និងនីតិវិធី សម្រាប់ការបោះឆ្នោត ជ្រើសតាំងតំណាងរាស្ត្រ។
គណៈកម្មាធិការជាតិរៀបចំការបោះឆ្នោត (គ.ជ.ប) បានទទួលអនុសាសន៍ប្រកបដោយផ្លែផ្កាពីស្ថាប័នចំនួន៨ បន្ទាប់ពីកិច្ចប្រជុំបើកទូលាយអស់រយៈពេលពេញមួយថ្ងៃ ។ ទាក់់ទងនឹងអនុសាសន៍ដែលភាគីពាក់ព័ន្ធចំនួន១០ក្រសួង ស្ថាប័ន បានផ្តល់ជូន គ.ជ.ប. និងរាល់អនុសាសន៍ដែលបានលើកឡើងនាពេនេះ ត្រូវបានអគ្គលេខាធិការដ្ឋាន គ.ជ.ប ក៏ដូចជាគណកម្មការសម្របសម្រួលក្នុងកិច្ចប្រជុំនេះ ធ្វើការបកស្រាយបំភ្លឺជូនភាគីពាក់ព័ន្ធមួយជំហានរួចហើយ នៅក្នុងកម្រិតសមត្ថកិច្ចរបស់ខ្លួន ដើម្បីឲ្យបានជ្រាបអំពីការងារបច្ចេកទេសមួយចំនួនរបស់គ.ជ.ប។
បើតាមលោក នុត សុខុម អនុប្រធានគ.ជ.ប បានថ្លែងបញ្ជាក់ថា “រាល់បណ្តាអនុសាសន៍ដ៏ល្អៗ របស់ឯកឧត្តម លោកជំទាវ លោក លោកស្រី ដែលបានផ្តល់ជូនគ.ជ.ប នឹងធ្វើការពិនិត្យ ពិភាក្សា និងសម្រេចជាចុងក្រោយ បន្ទាប់ពីកិច្ចប្រជុំពិគ្រោះយោបល់នាថ្ងៃនេះ មុននឹង គ.ជ.ប សម្រេចដាក់ឲ្យប្រើប្រាស់បទបញ្ជា និងនីតិវិធីនេះជាផ្លូវការ។ ខ្ញុំមានជំនឿយ៉ាងមុតមាំថារាល់បណ្តាអនុសាសន៍របស់អស់លោក គឺជាធាតុចូលមួយដ៏សំខាន់ដែលអាចឲ្យ គ.ជ.ប ពិចារណា និងកែសម្រួលបន្ថែម ដើម្បីធ្វើយ៉ាងណាឲ្យដំណើរការរៀបចំការបោះឆ្នោតប្រព្រឹត្តទៅដោយសេរី ត្រឹមត្រូវ យុត្តិធម៌ និងមានតម្លាភាព”។
សូមបញ្ជាក់ថា អនុសាសន៍របស់បណ្តាស្ថាប័នចំនួន៨នោះរួមមាន ភាគីជប៉ុន អគ្គលេខាធិការដ្ឋានព្រឹទ្ធសភា អង្គការខុមហ្វ្រែល អង្គការនិកហ្វិច អង្គការជនពិការកម្ពុជា គណបក្សប្រជាធិបតេយ្យមូលដ្ឋាន គណបក្សប្រជាជនកម្ពុជា និងអង្គការអរុណរះ៕ ដោយ៖បញ្ញាស័ក្តិ
