ភ្នំពេញ៖ កង្វះសារធាតុអ៊ីយ៉ូតក្នុងសារពាង្គកាយ ធ្វើឲ្យខួរក្បាលកុមារមិនអភិវឌ្ឍន៍ល្អ។ អ្នកជំនាញស្រាវជ្រាវសារធាតុអ៊ីយ៉ូត ក្នុងអំបិល បានមានប្រសាសន៍ថា សារធាតុអ៊ីយ៉ូត ត្រូវតែបញ្ចូលក្នុងអំបិល មុននឹងចរាចរណ៍លើទីផ្សារ។ អំបិលខេត្តកំពត និងកែប ត្រូវបានផលិត តែអ្វីដែលសំខាន់ ឈ្មួញលក់បន្តទៅកាន់អ្នកប្រើប្រាស់ ត្រូវបញ្ចូលជាតិអ៊ីយ៉ូត មុននឹងដាក់លក់នៅលើទីផ្សារ។
នៅក្នុងឆ្នាំ២០២០នេះ អំបិលកំពត នឹងកែប ត្រូវបានផលិតក្នុងបរិមាណច្រើនគឺជាង ៨៨.០០០តោន ដែលបរិមាណនេះ ត្រូវបានប៉ាន់ប្រមាណថា នឹងគ្រប់សម្រាប់ការប្រើប្រាស់ នៅក្នុងប្រទេសដោយមិនត្រូវការអំបិលនាំចូល។
អ្នកជំនាញ ធ្លាប់បានលើកឡើងថា កង្វះសារធាតុអ៊ីយ៉ូត ក្នុងសារពាង្គកាយ ធ្វើឲ្យខួរក្បាលកុមារមិនអភិវឌ្ឍន៍ល្អ ព្រោះវាកាត់បន្ថយដល់សមត្ថភាព នៃការគិត ឬហៅថា (IQ) ដល់ទៅ១៣កម្រិត។ អំបិលមួយចំនួនធំ ដែលដាក់លក់នៅលើទីផ្សារ មិនមានបញ្ចូលសារធាតុអ៊ីយ៉ូត។ នេះជាបញ្ហាធំដែលប៉ះពាល់ ដល់កម្រិតវាស់វែង សមត្ថភាពនៃការគិតឬហៅថាIQ។
បើយោងតាមឯកឧត្តម ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា អំបិលមិនមានបញ្ចូលជាតិអ៊ីយ៉ូត បញ្ចូលមិនគ្រប់ស្តង់ដារ៣០ទៅ៤០មីក្រូក្រាម ក្នុងមួយគីទ្បូក្រាមអំបិល ឬអំបិលមិនមានស្លាកសញ្ញា បញ្ចូលជាតិអ៊ីយ៉ូត ដែលទទួលស្គាល់ដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ ត្រូវណែនាំ ដកហូត ឬពិន័យតាមច្បាប់និងអនុក្រឹត្យ ដែលបានកំណត់រួចហើយ។
សារធាតុអ៊ីយ៉ូតក្នុងអំបិល ជួយបង្កើនការចងចាំនិងឆ្លាតវៃ ការពារជំងឺពកក ការពាជំអឺក្រិនក្រេះ និងជំងឺស្លេកស្លាំង របស់មាតានិងនិងទារកជាដើម។ ដូច្នេះសិប្បកម្ម និងកន្លែងធ្វើអំបិល ត្រូវតែបញ្ចូលជាតិអ៊ីយ៉ូត មិននឹងចរាចរណ៍លើទីផ្សារ។
លោក ប៊ុន យោង ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ខេត្តកែប បានឲ្យដឹងថា អំបិលក្នុងចំណោម១២.០០០តោន មានអំបិល៩០.០០០តោន នៅក្នុងឃ្លាំងសម្រាប់ដាក់លក់បន្ត។ លោកបានឲ្យដឹងទៀតថា អំបិលក្នុងឆ្នាំនេះ ត្រូវបានលក់បានតម្លៃថ្លៃជាងអំបិលឆ្នាំមុន ដែលមួយបាវឬ៥០គីទ្បូក្រាម មានតម្លៃចន្លោះពី១០.០០០រៀល ទៅ១៣.០០០រៀ។ ក្នុងខេត្តកែបច្ចុប្បន្ន ផ្ទៃដីផលិតអំបិល មានទំហំប្រមាណជា៧០០ហិចតា ដែលមានអ្នកផលិត១៣ក្រុម នៅក្នុងឆ្នាំ២០២០នេះ។
គួរបញ្ជាក់ថា កម្ពុជាធ្លាប់នាំចូលអំបិលពីចិននិងឥណ្ឌា នៅពេលដែលកម្ពុជា ផលិតអំបិល មិនគ្រប់តម្រូវការរបស់អ្នកប្រើប្រាស់ ដែលក្នុងមួយឆ្នាំ កម្ពុជាត្រូវការអំបិលចន្លោះពី៨០.០០០តោន ទៅ១០០.០០០តោន៕
ដោយ៖សម្ផស្ស