ភ្នំពេញ៖ ដូចបានដឹងហើយថា ការប្រើប្រាស់អាវុធ មិនថាជារបស់កែច្នៃនោះទេ គឺត្រូវបានចាត់ទុកថាជាទង្វើល្មើសនឹងច្បាប់រួចទៅហើយ ។ ប៉ុន្តែ សម្រាប់បុរសម្នាក់នេះវិញ ដែលគេពុំដឹងថាជាចេតនា ឬ ក៏យ៉ាងណានោះទេ បានលើកបង្ហាញសត្វដ៏កម្រមួយប្រភេទ ឬជាសត្វជិតផុតពូជដែលគេស្គាល់ថាសត្វកេងកង រួមនឹងកាំភ្លើងខ្យល់កែច្នៃ១ដើម បង្អួតគេឯងគ្រប់គ្នានៅលើបណ្តាញសង្គម ដោយពុំខ្លាចសមត្ថកិច្ចសោះឡើយ។
ក្រោយពីឃើញបែបនេះ លោកឧកញ៉ា ទៀ វិចិត្រ បានសម្តែងនូវការភ្ញាក់ផ្អើលជាខ្លាំង និងក៏បានបង្ហោះសាររៀបរាប់ទាំងការឈឺចាប់ថា៖ “ខ្ញុំខំប្រឹងអភិរក្សណាស់ តែបងខំប្រឹងបំផ្លាញសត្វកម្រៗទៅវិញ !! ខ្ញុំមិនសប្បាយចិត្តសោះ សូមបងៗសមត្ថកិច្ចជួយនាំខ្លួនគាត់យកមកធ្វើការណែនាំផងបាទទៀ វិចិត្រ” ។ បើតាមគេសន្និដ្ឋាន នោះសត្វកេងកងដែលបុរសរូបនេះបាញ់សម្លាប់ គឺអាចជាសត្វដែលលោកឧកញ៉ា ទៀ វិចិត្រ ទើបតែធ្វើការព្រលែងកាលពីពេលកន្លងទៅថ្មីៗនេះ។
នេះបើយោងតាមគណនីហ្វេសប៊ុកឈ្មោះ Dola Doung Kpc បាន Comment រូបភាពលោកឧកញ៉ា ទៀ វិចិត្រ ព្រលែងសត្វកេងកង និងសរសេរបញ្ជាក់ថា៖ “ខ្ញុំមានអារម្មណ៍ថាសោកស្តាយណាស់ មិនគួរណាគាត់ចេះធ្វើទៅកើត បើខ្ញុំចាំមិនខុសទេ នេះហើយជាសត្វដែលខ្ញុំបានប្រគល់វាទៅអោយបងឧកញ៉ាយកទៅប្រលែង ព្រោះវាអត់មានកន្ទុយទេ”។
ក្នុងនោះផងដែរ លោកឧត្តមសេនីយ៏ឯក ហ៊ុន ជា ក៏បានប្រតិកម្មយ៉ាងដូច្នេះថា៖ “អានេះវាអត់លុយទិញម្ហូបមែន អាប៉ាកាច់សត្វស្អាតណាស់វាបាញ់កើត” ។ ក្រៅពីប្រតិកម្មរបស់ឧត្តមសេនីយ៍ឯក ហ៊ុន ជា ក្នុងនោះបងប្អូនអ្នកប្រើប្រាស់បណ្តាញសង្គមជាច្រើនទៀត ដែលជាអ្នកស្រឡាញ់ អភិរក្សសត្វដ៏កម្រនេះ ក៏បានផ្ទុះកំហឹងដោយម្នាក់ៗសូមឲ្យសមត្ថកិច្ច តាមស្វែងរកមុខជនរូបនេះ មកផ្តន្ទាទោសឲ្យខាងតែបាន៕
ដោយ៖ លឹម ហុង
