ភ្នំពេញ៖ ដើម្បីរួមចំណែកទប់ស្កាត់ការរីករាលដាលនៃជំងឺកូវីដ-19 ក្នុងសហគមន៍ដែលកើតឡើងដោយការសេពគ្រឿងស្រវឹងជុំគ្នា រាជរដ្ឋាភិបាលគួរចេញបទបញ្ជា ហាមឃាត់ការផ្សាយពាណិជ្ជកម្មគ្រឿងស្រវឹងគ្រប់ទម្រង់ និងហាមលក់គ្រឿងស្រវឹងគ្រប់ប្រភេទមួយរយៈ ។ នេះបើតាមសេចក្តីប្រកាសព័ត៌មាន របស់អង្គការចលនាដើម្បីសុខភាពកម្ពុជា(CMH) នៅថ្ងៃទី១៣ ខែឧសភា ឆ្នាំ២០២០។
អង្គការចលនាដើម្បីសុខភាពកម្ពុជា បានលើកឡើងថា ព្រោះការផ្សាយពាណិជ្ជកម្មគ្រឿងស្រវឹង និងភាពងាយរកបាននៃគ្រឿងស្រវឹង ជំរុញឱ្យមានការប្រើប្រាស់គ្រឿងស្រវឹងកើនឡើង។
ការសេពគ្រឿងស្រវឹងជុំគ្នា ជាកត្តាប្រឈមខ្ពស់នៃការឆ្លងជំងឺកូវីដ-19។ កត្តាប្រឈមទាំងនោះមានដូចជា មិនបានលាងដៃជាមួយអាល់កុល ឬសាប៊ូ មិនបានពាក់ម៉ាស មិនបានរក្សាគម្លាតក្នុងអំឡុងពេលសេពគ្រឿងស្រវឹងជាដើម។ លើសពីនេះ ក្នុងអំឡុងពេលសេពគ្រឿងស្រវឹង ភាពស្និទ្ធស្នាល ការស្វាគមន៍ ដូចជាចាប់ដៃ ប្រកៀកប្រកិតគ្នា ឬអោបគ្នា ជល់កែវជាមួយគ្នា ហូបគ្រឿងក្លែមជុំគ្នាសុទ្ធតែជាកត្តាប្រឈមនៃការឆ្លងជំងឺកូវីដ-19 ព្រោះយើងមិនអាចដឹងថានរណាមានផ្ទុកវីរុសនេះទេ។
លើសពីនេះទៀត អង្គការសុខភាពពិភពលោក បានលើកឡើងថា៖ “ ការសេពគ្រឿងស្រវឹងនឹងធ្វើឱ្យចុះខ្សោយប្រព័ន្ធភាពស៊ាំ និងកាត់បន្ថយសមត្ថភាពទប់ទលនឹងជំងឺឆ្លងជាច្រើន។” បើយើងក្រឡេកមើលស្ថានភាពបច្ចុប្បន្ននេះ ប្រជាពលរដ្ឋភាគច្រើនចាប់ផ្ដើម ប្រមូលផ្ដុំគ្នាផឹកស៊ី ច្រៀងសប្បាយជាហូរហែរ ដែលឥរិយាបទទាំងនេះ ប្រាសចាកទៅនឹងសេចក្ដីណែនាំ របស់ក្រសួងសុខាភិបាលទាំងស្រុង។
ក្រសួងសុខាភិបាល បានបញ្ជាក់ផងដែរថា៖ “ បញ្ហាកូវីដ-19 នៅកម្ពុជា ស្ថិតនៅភ្លើងស្ដុបពណ៌លឿងនៅឡើយទេ សុំប្រុងប្រយ័ត្នខ្ពស់មែនទែន ប្រយ័ត្នប៉ះពាល់ជាមួយវីរុសកូវីដ-19 ធ្វើឱ្យសោកាសុខភាពរបស់អ្នក។”
គួរបញ្ជាក់ផងដែរថា មកទល់ពេលនេះ មិនទាន់មានវ៉ាក់សាំងព្យាបាលជំងឺកូវីដ-19នៅឡើយទេ ហើយចំនួនអ្នកស្លាប់មាន 292.816 នាក់ អ្នកឆ្លង 4.340.058 នាក់ និងជាសះស្បើយ1.602.155 នាក់ គិតត្រឹមម៉ោង9 ព្រឹកថ្ងៃទី 13 ខែឧសភា ឆ្នាំ 2020 នៅទូទាំងពិភពលោក៕
ដោយ៖កូឡាប
