គិលានុប្បដ្ឋាយិការអាឡឺម៉ង់ម្នាក់ (អ្នកមើលថែអ្នកជំងឺ) ត្រូវបានចោទប្រកាន់ពីបទឃាតកម្មចំនួន ៩៧ករណី ព្រោះធ្វើឲ្យអ្នកជំងឺជាច្រើននាក់ស្លាប់ ដោយសារតែយកអ្នកជំងឺពិសោធន៏ជំនាញរបស់ខ្លួន និងចង់បំបាត់ភាពអផ្សុក។ នេះបើតាមការចេញផ្សាយរបស់សារព៌ត មានអាមេរិច CNN។
អ្នកមើលថែអ្នកជំងឺរូបនោះមានឈ្មោះ Niels Hoegel គាត់ត្រូវបានកាត់ទោសឲ្យជាប់គុកមួយជីវិត រួចមកហើយដោយសារបទមនុស្សឃាត និងប៉ុនប៉ងមនុស្សឃាត ៦ករណី។ គាត់ក៏ត្រូវចោទប្រកាន់បន្ថែមពីបទមនុស្សឃាត ៩៧ករណីទៀត កាលពីថ្ងៃច័ន្ទកន្លងទៅនេះ។ នេះបើតាមការបញ្ជាក់របស់ព្រះរាជអាជ្ញានៅក្នុងសេចក្តីប្រកាស។
ទណ្ឌឌិតរូបនោះ ត្រូវបានចោទប្រកាន់ពីបទប្រើប្រាស់ថ្នាំពេទ្យដែលគ្មានវេជ្ជបញ្ជាឲ្យអ្នកជំងឺលេប ក្នុងការប៉ុនប៉ងបង្អួតដល់អ្នកធ្វើការជាមួយគ្នា ពីជំនាញធ្វើឲ្យមនុស្សស្លាប់រស់ឡើងវិញរបស់គាត់ និងដើម្បីបំបាត់ភាពអផ្សុករបស់គាត់។
ព្រះរាជអាជ្ញាបញ្ជាក់ថា លោក Niels Hoegel បានដឹងច្បាស់ថា ថ្នាំដែលគាត់បានឲ្យអ្នកជំងឺលេប នៅគ្លីនិក ស្ថិតក្នុងតំបន់ Delmenhorst និង Oldenburg ក្នុងរដ្ឋ Lower Saxony គឺអាចបង្កគ្រោះថ្នាក់ដល់ជីវិតអ្នកជំងឺ។
នៅពេលអ្នកជំងឺចាប់ផ្តើមមានបញ្ហាដោយសារឥទ្ធិពលថ្នាំ លោក Niels Hoegel ត្រូវបានគេចោទប្រកាន់ថាមិនអាចជួយអ្នកជំងឺបាន ។គាត់រងការចោទប្រកាន់ពីបទសម្លាប់អ្នកជំងឺ ៩៧នាក់ នៅក្នុងគ្លីនិកទាំងពីរកន្លែងនោះ។
ក្នុងកំឡុងសវនការលើកមុន ជនស្មើសរូបនេះ បានបញ្ជាក់ថា គាត់មានអារម្មណ៏សប្បាយរីករាយ នៅពេលដែលគាត់ព្យាយាមធ្វើឲ្យអ្នកជំងឺរស់ឡើងវិញ និងមានអារម្មណ៏លំបាកខ្លាំងនៅពេលគាត់មិនអាចធ្វើបាន៕ សុភ័ក្ត្រ
