ភ្នំពេញ ៖ បុរសបុគ្គលិកក្រុមហ៊ុនឆ្នោតកោស ២នាក់ ត្រូវចាប់ប្រគល់ឲ្យនគរបាល ពាក់ព័ន្ធយកលុយក្រុមហ៊ុនជិត៥ម៉ឺនដុល្លារ កាលពីសៀលថ្ងៃទី១២ ខែឧសភា ឆ្នាំ២០២០នៅចំណុចក្រុមហ៊ុឆ្នោតកោសស៊ីន នីវ តាមផ្លូវបេតុង ក្រុម៧៨ ភូមិ១៤ សង្កាត់ទន្លេបាសាក់ ខណ្ឌចំការមន ។
ជនសង្ស័យទី១ ឈ្មោះ ប្រាក់ ជាតិ អាយុ ៣៦ឆ្នាំ បុគ្គលិកឆ្នោតក្រុមហ៊ុនឯកជន ស្នាក់នៅភូមិសាំហាន់ សង្កាត់ទួលសង្កែទី១ ខណ្ឌឫស្សីកែវ ភូមិស្រង៉ែ ឃុំបឹងនិមល ស្រុកឈូក ខេត្តកំពត ។ ទី២
ឈ្មោះ អាត់ ប៊ុនធឿន អាយុ ២១ឆ្នាំ មុខរបរបុគ្គលិកឆ្នោតក្រុមហ៊ុនឯកជន ស្នាក់នៅ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ មានស្រុកកំណើតភូមិតាមែង ឃុំកំពែង ស្រុកគីរីវង់ ខេត្តតាកែវ ។
ជនរងគ្រោះឈ្មោះ WANG HANXIANG ភេទប្រុស អាយុ៥២ឆ្នាំ ជនជាតិចិន មុខរបរនាយកក្រុមហ៊ុនឆ្នោតកោសស៊ីន នីវ ស្នាក់នៅក្នុងកោះពេជ្រ សង្កាត់ទន្លេបាសាក់ ខណ្ឌចំការមន បានដាក់ពាក្យបណ្ដឹងទៅលើបុគ្គលិកចំនួន២នាក់ យកលុយក្រុមហ៊ុនឆ្នោតកោស ស៊ីន នីវ ៣២១៥០ ដុល្លារ សងខ្លះ នៅខ្វះ២៩៧៥០ដុល្លារទៀត ។
លោក សាល សណ្ដុះ នាយប៉ុស្តិ៍នគរបាលរដ្ឋបាលទន្លេបាសាក់ បានឲ្យដឹងថា បានទទួលបុគ្គលិកឆ្នោតកោសចំនួន២នាក់ ដែលថៅកែចិនប្ដឹងថាយកលុយក្រុមហ៊ុន៣២១៥០ដុល្លារ ហើយក៏បានសួរនាំជនរងគ្រោះរៀបរាប់ថា បុរសឈ្មោះ ប្រាក់ ជាតិ យកឆ្នោតកោសដែលទឹកលុយស្មើនិង២០៥៥០ដុល្លារ តែបានសងក្រុមហ៊ុនវិញតែ១៤០០ដុល្លារ មកក្រុមហ៊ុនវិញ ។ បុរសឈ្មោះ អាត់ ប៊ុនធឿន ១១៦០០ដុល្លារ តែសងទៅក្រុមហ៊ុនតែចំនួន១០០០ដុល្លារ ជនសងស័យទាំង២នាក់ ជាបុគ្គលិកក្រុមហ៊ុន នៅខ្វះលុយចំនួន២៩៧៥០តាំងពីខែឧសភា ឆ្នាំ ២០១៩ មករហូតបច្ចុប្បន្នរយៈពេល១ឆ្នាំគត់ នៅតែគ្មានលុយសង ក៏ត្រូវក្រុមហ៊ុនសម្រេចចិត្តចាត់ការតាមផ្លូវច្បាប់ ។
ជនសង្ស័យខាងលើ នគរបាលប៉ុស្តិ៍បានកសាងសំណុំរឿង យោងតាមពាក្យបណ្ដឹងថៅកែ ក៏បានបញ្ជូលទៅ អធិការដ្ឋានខណ្ឌចំការមនដើម្បីចាត់ការតាមនីតិវិធីច្បាប់ ៕
ដោយ៖កូឡាប