តាកែវ៖ ថ្លែងក្នុងកិច្ចប្រជុំផ្សព្វផ្សាយ វិធានការពង្រឹងការអនុវត្តច្បាប់ ស្តីពីចរាចរណ៍ផ្លូវគោកនៅរសៀលថ្ងៃទី ១៣ ខែឧសភា ឆ្នាំ២០២០នេះ ឯកឧត្តមឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ ណែនាំដល់មន្ត្រីនគរបាលចរាចរណ៍ដែលឈរក្នុងគោលដៅ ត្រូវអនុវត្តច្បាប់ ឲ្យសុក្រឹតចំពោះអ្នកប្រើប្រាស់លើទ្រូងផ្លូវដែលល្មើសច្បាប់ និងមិនត្រូវធ្វើអ្វីដែលខុស ឬផ្ទុយពីការរឹតបន្តឹងច្បាប់ចរាចរណ៍ផ្លូវគោកឡើយ ។
លោកស្នងការបានបន្តថា ក្រោយចុះរឹតបន្តឹងច្បាប់ចរាចរណ៍ផ្លូវគោក ជិត២សប្តាហ៍នេះ យើងឃើញថា មានផលវិជ្ជមាន និងអវិជ្ជមានដូចគ្នា ផលវិជ្ជមាន ក្រោយការរឹតបន្តឹងច្បាប់ យើងសង្កេតឃើញថា ករណីគ្រោះថ្នាក់ចរាចរណ៍ ដែលបណ្តាលឲ្យមនុស្សស្លាប់និងរបួស មានការថយចុះជាគំហុក ដែលនេះជាលទ្ធផលវិជ្ជមាន ក្នុងការចុះរឹតបន្តឹងច្បាប់ចរាចរណ៍ផ្លូវគោក ដើម្បីរក្សាអាយុជីវិតរបស់បងប្អូនប្រជាពលរដ្ឋ មួយវិញទៀតចំពោះផលអវិជ្ជមាន គឺមិនមានបាតុភាពអ្វីដែលគួរឲ្យកត់សម្គាល់ ក្នុងការចុះរឹតបន្តឹងច្បាប់ នៅក្នុងភូមិសាស្ត្រទឹកដីខេត្តតាកែវឡើយ តែមានក្រុមជ្រុលនិយមបានឆ្លៀតឱកាសនេះ ធ្វើការផ្សព្វផ្សាយញុះញង់ ក្នុងគោលបំណងបំពុលសង្គម លើគោលការណ៍ដែលរាជរដ្ឋាភិបាល របស់យើងកំពុងតែរឹតបន្តឹងច្បាប់ ដើម្បីការពារប្រជាពលរដ្ឋឲ្យរួចផុត ឬថយចុះពីការកើតឡើង នៅគ្រោះថ្នាក់ចរាចរណ៍ ។
លោកស្នងការបានសង្កត់ធ្ងន់ថា ចំពោះនគរបាលដែលល្មើសច្បាប់ និងត្រូវទទួលផាកពិន័យ តាមច្បាប់ចរាចរណ៍ផង និងទទួលវិន័យរបស់អង្គភាពថែមទៀត ។
លោកវរសេនីយ៍ឯក សៅ ច័ន្ទសំណាង នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តតាកែវ បានបញ្ជាក់ថា ក្រោយការចុះរឹតបន្តឹង និងអនុវត្តច្បាប់ចរាចរណ៍ផ្លូវគោកថ្មីនេះ ករណីគ្រោះថ្នាក់ចរាចរណ៍ នៅលើទ្រូងផ្លូវមានការថយចុះ ៦៧ភាគរយ នេះបើគិតរយៈពេលដូចគ្នាចំនួន ១២ថ្ងៃ ក្រោយការចុះរឹតបន្តឹងច្បាប់ ៕
ដោយ៖តាកែវ