ភ្នំពេញ៖ ជាលទ្ធផល សេចក្តីព្រាងស្តីពី ការអនុម័តយល់ព្រមលើកិច្ចព្រមព្រៀងពាណិជ្ជកម្មសេវាកម្ម ក្រោមកិច្ចព្រមព្រៀងក្របខ័ណ្ឌស្តីពី កិច្ចសហប្រតិបត្តិការសេដ្ឋកិច្ចគ្រប់ជ្រុងជ្រោយរវាងសមាគមប្រជាជាតិអាស៊ីអាគ្នេយ៍ និងសាធារណរដ្ឋឥណ្ឌាត្រូវបានព្រឹទ្ធសភានៃព្រះរាជាណាចក្រកម្ពុជា ធ្វើការអនុម័តយល់ព្រមដោយឥតកែប្រែ និងចាត់ទុកជាការប្រញាប់ ក្នុងសម្លេងគាំទ្រចំនួន ៤៩ សំឡេង លើសមាជិក-សមាជិកាវត្តមានចំនួន ៥០។
នាព្រឹកថ្ងៃអង្គារ ទី២៣ ខែមករា ឆ្នាំ២០១៨ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម តំណាងរាជរដ្ឋាភិបាល បានដឹកនាំគណៈប្រតិភូក្រសួងពាណិជ្ជកម្ម ចូលរួមការពារសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេវាកម្មក្រោមកិច្ចព្រមព្រៀងក្របខ័ណ្ឌស្តីពី កិច្ចសហប្រតិបត្តិការសេដ្ឋកិច្ចគ្រប់ជ្រុងជ្រោយរវាងសមាគមប្រជាជាតិអាស៊ីអាគ្នេយ៍ និងសាធារណរដ្ឋឥណ្ឌា ក្នុងសម័យប្រជុំព្រឹទ្ធសភាលើកទី១១ នីតិកាលទី៣ ក្រោមអធិបតីភាពដ៏ខ្ពង់ខ្ពស់ សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា។
លោក ប៉ាន សូរស័ក្តិ បានថ្លែងថា កិច្ចព្រមព្រៀងពាណិជ្ជកម្មសេវាកម្មក្រោមកិច្ចព្រមព្រៀងក្របខ័ណ្ឌស្តីពី កិច្ចសហប្រតិបត្តិការសេដ្ឋកិច្ចគ្រប់ជ្រុងជ្រោយរវាងសមាគមប្រជាជាតិអាស៊ីអាគ្នេយ៍ និងសាធារណរដ្ឋឥណ្ឌានេះ ត្រូវបានរដ្ឋសភានៃព្រះរាជាណាចក្រកម្ពុជាអនុម័តព្រមចំនួន ១១៣ សំឡេង នៃចំនួនសមាជិករដ្ឋសភាទាំងមូល នៅថ្ងៃចន្ទ ១៤ ទី១៥ ខែមករា ឆ្នាំ២០១៨ នាសម័យប្រជុំរដ្ឋសភាលើកទី៩ នីតិកាលទី៥។
លោក ប៉ាន សូរស័ក្តិ បន្តថា កិច្ចព្រមព្រៀងនេះ នឹងផ្តល់អត្ថប្រយោជន៍ ដូចខាងក្រោម៖
១) បើកច្រកចូលទីផ្សារបានទូលាយជាងមុន ដល់អ្នកផ្តល់សេវាកម្មនៃប្រទេសសមាជិកហត្ថលេខីទាំងអស់ រួមទាំងកម្ពុជាផងដែរ។ ប្រទេសអភិវឌ្ឍន៍តិចតួច ដូចជា កម្ពុជា ឡាវ និងមីយ៉ាន់ម៉ា ត្រូវបានទទួលនូវប្រព្រឹត្តិកម្ម ពិសេស និងដោយឡែក ដូចជា បើកច្រកទីផ្សារផ្នែកសេវានៅក្រៅប្រទេស និងផ្តល់ភាពទន់ភ្លន់ក្នុងការធ្វើ សេរីភាវូបនីយកម្ម ជាជំហានៗ និងតាមវិស័យអាទិភាពស្របតាមកំរិតនៃការអភិវឌ្ឍជាដើម។
២) ជំរុញឲ្យមានការកើនឡើងនូវវិនិយោគទុនផ្នែកសេវា ដែលនឹងបង្កើតការងារ បង្កើនចំណូលពន្ធ ពង្រឹងគុណភាពនិងការប្រកួតប្រជែងនៃការផ្គត់ផ្គង់សេវានៅក្នុងប្រទេស។
៣) ផ្តល់ភាពទន់ភ្លន់ដល់ភាគីទាំងអស់ ដើម្បីរក្សាការពារ និងដោះស្រាយបញ្ហានៅក្នុងវិស័យសេវា ដែលមានលក្ខណៈរសើប ព្រមទាំងផ្តល់លទ្ធភាពឲ្យភាគីពាក់ព័ន្ធចរចាគ្នា ដោយឈរលើផលប្រយោជន៍ទៅវិញទៅមក។
៤) ពង្រីកពាណិជ្ជកម្មសេវាកម្មនៅក្នុងតំបន់ទាំងពីរ តាមរយៈការផ្គត់ផ្គង់ និងប្រើប្រាស់សេវាកម្ម ឆ្លងកាត់ព្រំដែនលើផ្នែកសេវាកម្មដែលមិនមានការផ្គត់ផ្គង់ក្នុងស្រុក។ កិច្ចព្រមព្រៀងនេះ នឹងលើកទឹកចិត្តឲ្យមានការ បង្កើតការិយាល័យអាជីវកម្ម ឬក្រុមហ៊ុនពាណិជ្ជកម្ម និងគ្រប់គ្រងបម្លាស់ទីរបស់រូបវន្តបុគ្គលជំនាញ។
ចំពោះអត្ថប្រយោជន៍នៃកិច្ចព្រមព្រៀងនេះ ព្រះរាជាណាចក្រកម្ពុជានឹងទទួលបានការសន្យាបន្ថែមទៀតពីភាគីឥណ្ឌា លើសពីអ្វីដែលភាគីឥណ្ឌាបានសន្យាក្នុងក្របខ័ណ្ឌអង្គការពាណិជ្ជកម្មពិភពលោកទៅលើវិស័យ និងអនុវិស័យ ដូចខាងក្រោម ៖
១៖ វិស័យធុរកិច្ច២៖ វិស័យទំនាក់ទំនង៣៖ វិស័យសំណង់ និងសេវាពាក់ព័ន្ធវិស្វកម្ម៤៖ វិស័យទេសចរណ៍ និងសេវាពាក់ព័ន្ធនឹងការធ្វើដំណើរ៕ ដោយ៖បញ្ញាស័ក្តិ