ខេត្តស្វាយរៀង៖ ប្រជាពលរដ្ឋ និងអាជីវករ បាននាំគ្នាយករថយន្តមកឆៀកយ៉ាងច្រើន បន្តកន្ទុយគ្នា នៅក្រុងស្វាយរៀង ខណៈរយៈពេល៨ថ្ងៃ មានរថយន្តធ្វើឆៀករួច ចំនួន៩៥១គ្រឿង ទាំងយានយន្តធុនតូច ធំនិងរថយន្តដឹកកម្មករផងដែរ។
លោក ព្រំ ផូ ប្រធានការិយាល័យដឹកជញ្ជូន នៃមន្ទីរសាធារណការនិងដឹកជញ្ជូនខេត្តស្វាយរៀង បានឲ្យដឹងថា យានយន្ត ដែលមកពិនិត្យបច្ចេកទេសនេះ គឺមានមកពីខេត្តព្រៃវែង ខេត្តត្បូងឃ្មុំ និងខេត្តស្វាយរៀង ក្នុងមួយថ្ងៃជាមធ្យម ត្រួតពិនិត្យបានចាប់ពី៨០គ្រឿង ទៅ១២០គ្រឿង បើប្រព័ន្ធគ្រប់គ្រងគ្មានបញ្ហា ដោយមានរថយន្តនៅតែសម្រុក មកធ្វើឆៀកច្រើននៅឡើយ ទើបសម្រេចនៅត្រួតពិនិត្យបច្ចេកទេសយានយន្តនេះ រហូតដល់ថ្ងៃទី១៥ ឧសភា ឆ្នាំ២០២០ ទើបបញ្ចប់នៅស្វាយរៀង។
លោកបន្ថែមថា ហើយរហូតមកដល់រសៀលថ្ងៃទី១៣ឧសភានេះ មានយានយន្តតូចធំ ដែលបានត្រួតពិនិត្យបច្ចេកទេស (ឆៀក) រួចចំនួន៩៥១គ្រឿង។
យោងតាមខ្លឹមសារនៃអនុក្រឹត្យលេខ៣៩ អនក្រ. បក ត្រង់ជំពូកទី៣ មាត្រា៧ថ្មី ចំណុចទី៤ បានបញ្ជាក់ថា ត្រូវពិន័យអ្នកបើកបររថយន្តធុនស្រាល ទឹកប្រាក់ចំនួន ១៨០.០០០រៀល និងអ្នកបើកបររថយន្តធ្ងន់ធ្ងរទឹកប្រាក់ចំនួន ៣៧៥.០០០រៀល ចំពោះអំពើល្មើសបើកបរដោយគ្មានវិញ្ញាបនបត្រត្រួតពិនិត្យលក្ខណៈបច្ចេកទេសយាន ឬប្រើវិញ្ញាបនបត្រត្រួតពិនិត្យលក្ខណៈ បច្ចេកទេសហួសសុពលភាព។ ដូច្នេះសូមបងប្អូនប្រជាពលរដ្ឋទាំងអស់ ត្រូវតែគោរពច្បាប់ចរាចរណ៍ទាំងអស់គ្នា ដើម្បីការពារអាយុជីវិតខ្លួនឯង និងក្រុមគ្រួសារ។
សូមបងប្អូនប្រជាពលរដ្ឋទាំងអស់ ត្រូវតែគោរពច្បាប់ចរាចរណ៍ទាំងអស់គ្នាដូចពាក្យស្លោករបស់ប្រមុខរាជរដ្ឋាភិបាលកម្ពុជា (ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍)៕
ដោយ៖វ៉ៃកូ
