ឧត្តរមានជ័យ៖ នៅថ្ងៃទី១៣ ខែឧសភា ឆ្នាំ២០២០ វេលាម៉ោង១៤និង៣០នាទី មានករណីផ្ទុះមីនតោន នៅចំណុចព្រៃស្អាក ភូមិអូរតាម៉េង ស្រុកអន្លង់វែង ខេត្តឧត្តរមានជ័យ ខាងលិចផ្លូវជាតិលេខ៦៧ ប្រហែល ៤០០ម៉ែត្រ បណ្តាលឲ្យអ្នកបើកត្រាក់ទ័រម្នាក់ស្លាប់នៅហ្នឹងកន្លែង។
បើតាមអាជ្ញាធរមីនកម្ពុជា បានបញ្ជាក់ថា ជនរងគ្រោះដែលស្លាប់ ឈ្មោះ យ៉ាង ចាន់ថុល ភេទប្រុស អាយុ៣៤ឆ្នាំ រស់នៅភូមិឃុំកើតហេតុខាងលើ និងបណ្តាលឲ្យខូចខាតទាំងស្រុងត្រាក់ទ័រ១គ្រឿង ម៉ាក kubota ពណ៌ក្រហម មូលហេតុចូលភ្ជួរចំការចន្ទីជាន់មីនតោន ។
ចំណែកលោកហេង រតនា អគ្គនាយកស៊ីម៉ាក់ បានថ្លែងសារលើហ្វេសប៊ុកផ្លូវការថា មានករណីអាត្រាក់ទរ័ភ្ជួរដីជាន់មីនតោន នៅចំណុខាងលើ បណ្តាលឲ្យស្លាប់ម្នាក់ បានបើកអាត្រាក់ភ្ជួរដីចំការចន្ទីក៏ជាន់មីនតោន។ ខ្ញុំសូមចូលរួមមរណទុក្ខជាមួយគ្រួសារសព នេះជាសោកវិនាសកម្ម ក្រោយសង្គ្រាម ដោយសារសំណល់ជាតិផ្ទុះពីសង្គ្រាម៕
ដោយ៖កូឡាប