បាត់ដំបង៖ ផ្លែត្រសក់ទ្រើង បានតម្លៃឡើងថ្លៃខ្ពស់ អាចលក់បានប្រមាណ២០លានរៀល ក្នុងទំហំដីកន្លះហិកតា សម្រាប់ទុកផ្គត់ផ្គង់ជីវភាពគ្រួសារ ខណៈដែលតម្លៃបន្លែមួយផ្សេងទៀត បានធ្លាក់តម្លៃចុះទាប ដោយសារវិបត្តិជំងឺកូវីដ១៩។
កសិករដាំបន្លែត្រសក់ទ្រើង នៅក្នុងភូមិចំការសំរោង១ បាននិយាយប្រាប់ថា ពួកគាត់ដាំបន្លែជាច្រើនឆ្នាំមកហើយ តម្លៃឡើងចុះរាល់ឆ្នាំ មិនមានការទៀងទាត់នោះទេ ភាគច្រើនតម្លៃក្រោម១០០០រៀល ក្នុងមួយគីឡូក្រាម។ ពេលខ្លះតម្លៃធ្លាក់ទាបដល់២០០រៀល ក្នុងមួយគីឡូក្រាម ក៏មានដែរ ប៉ុន្តែឆ្នាំនេះ តម្លៃតម្លៃត្រសក់ទ្រើង ឡើងថ្លៃដល់៣០០០រៀល មិនងាយជួបនោះទេ។ ការប្រមូលផលត្រសក់ នៅដើមខែឧសភា ឆ្នាំ២០២០នេះ ហាក់មានការឡើងថ្លៃ ក្នុងមួយគីឡូក្រាម អាចលក់បាន២០០០រៀល ដែលតម្លៃប៉ុណ្ណេះថ្លៃគ្រាន់បើ ហើយអាចលក់បានប្រាក់ច្រើនគួរសម សម្រាប់ទុកផ្គត់ផ្គង់ជីវភាព និងទុកធ្វើទុនដាំដុះបន្ត។
កសិករបន្ថែមថា ទោះបីបន្លែត្រសក់បានតម្លៃគួរសម ប៉ុន្តែធាតុអាកាសក្ដៅ មិនសូវប្រមូលផលបានច្រើន និងយូរថ្ងៃនោះដែរ គឺអាចបេះបានជាង២០ថ្ងៃអស់ផ្លែ ដោយទំហំដីកន្លះហិកតា អាចប្រមូលផលបានត្រឹមជិត ១០តោន ខណៈនៅខែត្រជាក់អាចប្រមូលបានដល់ជិត ២០តោន។
គួរបញ្ជាក់ផងដែរថា នៅក្នុងភូមិចំការសំរោង១ មានកសិករដាំបន្លែជាច្រើន ប្រភេទដូចជាជីគ្រប់មុខ ម្អម ស្ពៃចង្កឹះ ស្ពៃតឿ ស្ពៃក្រញ៉ាញ់ ត្រកួន ត្រសក់ ម្រះព្រៅ ត្រឡាច ននោង និងបន្លែជាច្រើនមុខទៀត ជាលក្ខណៈវិលជុំ ដោយទីផ្សារភាគច្រើន យកទៅលក់នៅផ្សារភួពុយ ស្ថិតក្នុងក្រុងបាត់ដំបង សម្រាប់ចែកចាយបន្ត ទៅរាជធានីភ្នំពេញ និងបណ្ដាខេត្តផ្សេងៗ ៕
ដោយ៖អ៊ុងសារុំ
