ភ្នំពេញ៖ នៅ ថ្ងៃទី១៣ ខែឧសភា ឆ្នាំ២០២០ លោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់បានបង្ហោះសារតាមសង្គមហ្វេសប៊ុក និងបានលើកឡើងដូច្នេះថា “រាជរដ្ឋាភិបាលឯកភាពនឹងការលើកឡើង របស់ប្រតិភូគណបក្សយុវជនកម្ពុជាជុំវិញ បញ្ហារបស់ប្រជាពលរដ្ឋ ស្ថិតនៅភូមិសូចាន់ខាងត្បូង និងភូមិនៀល ឃុំព្រៃស្លឹក ស្រុកទ្រាំង ខេត្តតាកែវ ហើយរដ្ឋាភិបាលកម្ពុជា បានឲ្យភាគីពាក់ព័ន្ធធ្វើរបាយការណ៍ជូនសម្តេចតេជោនាយករដ្ឋមន្ត្រីកម្ពុជា” ។
យោងទៅតាមលិខិត ស.ជ.ណ របស់រាជរដ្ឋាភិបាល តាមរយៈទីស្តីការគណៈរដ្ឋមន្ត្រី ដែលជម្រាបជូនឯកឧត្តមរដ្ឋមន្ត្រីក្រសួងធនធានទឹកឧតុនិយម ឯកឧត្តមអភិបាលនៃគណៈអភិបាលខេត្តតាកែវ ឯកឧត្តមប្រធានលេខាធិការដ្ឋានឧត្តមក្រុមប្រឹក្សាពិគ្រោះនិងផ្ដល់យោបល់ ពាក់ព័ន្ធករណីរបាយការណ៍សង្ខេប អំពីលទ្ធផលស្រាវជ្រាវរបស់ប្រតិភូគណបក្សយុវជនកម្ពុជា អំពីបញ្ហាក្រសួងធនធានទឹកនិងឧតុនិយម រារាំងមិនឲ្យធ្វើប្លង់កម្មសិទ្ធិដីស្រែ 70 ហិកតា របស់ប្រជាពលរដ្ឋ 70 គ្រួសារ ស្ថិតនៅភូមិសូចាន់ខាងត្បូង និងភូមិនៀល ឃុំព្រៃស្លឹក ស្រុកទ្រាំង ខេត្តតាកែវ។ បើតាមទីស្តីការគណៈរដ្ឋមន្ត្រីការចេញលិខិតនេះ យោងតាមចំណារដ៏ខ្ពស់បំផុត របស់សម្ដេចតេជោហ៊ុនសែននាយករដ្ឋមន្ត្រីកម្ពុជា កាលពីថ្ងៃទី ២៧ ខែមេសា ឆ្នាំ ២០២០។
ទីស្តីការគណៈរដ្ឋមន្ត្រី បានបញ្ជាក់ថា ករណីដែលលើកឡើងដោយប្រតិភូគណបក្សយុវជនកម្ពុជា អំពីក្រសួងធនធានទឹក និងឧតុនិយម រារាំងមិនឲ្យ ធ្វើប្លង់កម្មសិទ្ធិដីស្រែ៧០ហិកតា របស់ប្រជាជន៧០គ្រួសារ ស្ថិតនៅភូមិសូចាន់ខាងត្បូង និងភូមិនៀល ឃុំព្រៃស្លឹក ស្រុកទ្រាំង ខេត្តតាកែវ រាជរដ្ឋាភិបាលឯកភាពប្រគល់ជូន ក្រសួងធនធានទឹក និងឧតុនិយម និងរដ្ឋបាលតាកែវ ពិនិត្យនឹងរាយការណ៍ជូនសម្ដេចតេជោនាយករដ្ឋមន្ត្រី៕
ដោយ៖កូឡាប