ភ្នំពេញ៖ ស្នងការនគរបាលរាជធានីភ្នំពេញ បានប្រកាសថា មន្ត្រីរូបណាធ្វើខុសពីការណែនាំរបស់ថ្នាក់ដឹកនាំ ក្នុងការអនុវត្តន៍រឹតបន្តឹងច្បាប់ចរាចរណ៍ផ្លូវគោក មិនត្រូវបានលើកលែងឡើយ នឹងត្រូវដាក់ពិន័យ និងអនុវត្តតាមនីតិវិធីច្បាប់។
នៅព្រឹកថ្ងៃទី១៤ ខែឧសភា ឆ្នាំ២០២០ ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានអញ្ជើញជួបជាមួយមន្ត្រី នៃការិយាល័យចរាចរណ៍ និងមន្ត្រីចរាចរណ៍តាមបណ្តាអធិការខណ្ឌទាំង១៤ ដែលមានមន្ត្រីចូលរួមសរុបចំនួន ៧២៨ នាក់ ( បែកចែកជា ៤ វេណផ្សេងគ្នា ) ដើម្បីផ្សព្វផ្សាយការប្រជុំ ដកពិសោធន៍នៃការអនុវត្តន៍រឹតបន្តឹងច្បាប់ចរាចរណ៍ របស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ។
ក្នុងឱកាសនោះដែរ ឯកឧត្តមស្នងការ បានកោតសរសើរដល់កម្លាំងទាំងអស់ ដែលបានខិតខំទាំងយប់ថ្ងៃ ក្នុងគោលបំណងការពារអាយុជីវិត ទ្រព្យសម្បត្តិរបស់ប្រជាពលរដ្ឋ ជាលទ្ធផល នៃការអនុវត្តន៍រឹតបន្តឹងច្បាប់ចរាចរណ៍រយ:ពេល ១៣ថ្ងៃកន្លងមកនេះ បានបង្ហាញជាលទ្ធផលវិជ្ជមាន ដោយកាត់បន្ថយគ្រោះចរាចរណ៍ បានរហូតដល់ ៤០% ជាពិសេសធ្វើឲ្យអ្នកបើកបរភាគច្រើនបានចូលរួមគោរពច្បាប់ ដោយពាក់មួកសុវត្ថិភាព ពាក់ខ្សែក្រវាត់ គោរពភ្លើង និងស្លាកសញ្ញាចរាចរណ៍ ។ ល ។
ម្យ៉ាងវិញទៀត ឯកឧត្តមស្នងការ បានណែនាំដល់មន្ត្រីអនុវត្តច្បាប់ទាំងអស់ ត្រូវតែមានការអត់ធ្មត់ខ្ពស់ មានអាកប្បកិរិយា និងសម្តីសមរម្យជាមួយប្រជាពលរដ្ឋ ។
ឯកឧត្តមស្នងការ បានសង្កត់ធ្ងន់ថា ក្នុងពេលអនុវត្តរឹតបន្តឹងច្បាប់ចរាចរណ៍នេះ បើមន្ត្រីណាប្រព្រឹត្តិខុស ពីការណែនាំរបស់ថ្នាក់ដឹកនាំ មន្ត្រីនោះនឹងត្រូវដាក់ពិន័យ ក៏ដូចជា ការអនុវត្តន៍តាមវិន័យកងកម្លាំង ។
ជាពិសេស ឯកឧត្តមស្នងការ បានបញ្ជាក់យ៉ាងច្បាស់ ដល់មន្ត្រីទាំងអស់ ត្រូវតែធ្វើជាគំរូល្អ ដល់ប្រជាពលរដ្ឋ ក្នុងការគោរពច្បាប់ចរាចរណ៍ ត្រូវតែពាក់មួកសុវត្ថិភាព មានស្លាកលេខ ពាក់ខ្សែក្រវាត់ និងកុំនិយាយទូរស័ព្ទពេលបើកបរ ( អាចនិយាយបានដោយប្រើកាស ) ។
ជាកិច្ចបញ្ចប់ ឯកឧត្តមស្នងការ បានណែនាំដល់មន្ត្រីទាំងអស់ ត្រូវតែប្រុងប្រយ័ត្ន ក្នុងការថែទាំសុខភាព ដោយពាក់ម៉ាសជាប្រចាំ លាងដៃជាមួយសាប៊ូ ឬទឹកអាល់កុលឲ្យបានញឹកញាប់ ដើម្បីបង្ការ និងទប់ស្កាត់ការឆ្លងរាលវីរុសកូវីដ១៩ ដោយអនុវត្តតាមការណែនាំ របស់រាជរដ្ឋាភិបាល និងក្រសួងសុខាភិបាល ។
សូមបញ្ជាក់ថា នៅថ្ងៃទី១៣ ខែឧសភា ឆ្នាំ២០២០នេះ ការរឹតបន្ដឹងច្បាប់ស្ដីពីចរាចរណ៍ផ្លូវគោក មានយានយន្ត ចំនួន១១៤៦គ្រឿង ល្មើសច្បាប់ ស្មើនឹង១១៤៦ ករណី ត្រូវបានផាកពិន័យតាមអនុក្រឹត្យលេខ៣៩ នៅទូទាំងប្រទេស ។
របាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានបង្ហាញថា ក្នុងចំណោមយានយន្ដទាំង១១៤៦គ្រឿងនេះ មានម៉ូតូចំនួន៧៤៦គ្រឿង ល្មើសច្បាប់ ស្មើនឹង៧៤៦ករណី និងរថយន្ដ ចំនួន៤០០គ្រឿង ល្មើសច្បាប់ ស្មើនឹង៤០០ករណី ។
ក្នុងនោះអំពើល្មើសភាគច្រើន បើកបរម៉ូតូអត់មួកសុវត្ថិភាព ដោយឡែកសម្រាប់អ្នកបើករថយន្ដ អំពើល្មើសរួមមាន មិនពាក់ខ្សែក្រវាត់, ផ្ទុកទំនិញលើស, និងករណី ផ្សេងៗជាច្រើនទៀត ។
ដោយឡែកក្នុងរយៈពេល១៣ថ្ងៃ នៃការរឹតបន្ដឹងច្បាប់ស្ដីពីចរាចរណ៍ផ្លូវគោក មានយានយន្ត ចំនួន២២.០៤២គ្រឿង ល្មើសច្បាប់ ស្មើនឹង២២.០៤២ករណី ត្រូវបានផាកពិន័យតាមអនុក្រឹត្យលេខ៣៩ នៅទូទាំងប្រទេស ។
របាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ បានបង្ហាញថា ក្នុងចំណោមយានយន្ដទាំង២២.០៤២គ្រឿងនេះ មានម៉ូតូចំនួន១៦១៣៤គ្រឿង ល្មើសច្បាប់ស្មើនឹង១៦៨៧៤ករណី និងរថយន្ដ ចំនួន៥៩០៨គ្រឿង ល្មើសច្បាប់ ស្មើនឹង៥៩៤៦ករណី ។
ក្នុងនោះអំពើល្មើសភាគច្រើន អត់មួកសុវត្ថិភាព, អត់កញ្ចក់, បញ្ច្រាស ។ ដោយឡែកសម្រាប់អ្នកបើករថយន្ដ អំពើល្មើសរួមមាន ៖ មិនពាក់ខ្សែក្រវាត់, និងផ្ទុកទំនិញលើស, ភ្លើង ។
របាយការណ៍ដដែលបានវាយតម្លៃរយៈពេល១៣ថ្ងៃនេះ ថា ការអនុវត្តតាមអនុក្រឹត្យថ្មី ក្នុងការផាកពិន័យយានយន្តល្មើស បានដំណើរការទៅយ៉ាងល្អប្រសើរ ។ អ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍ យ៉ាងល្អប្រសើរ រយៈពេល១៣ថ្ងៃនេះ ៕
ដោយ៖កូឡាប