កីឡាករបោកចំបាប់ស៊ូម៉ូជប៉ុនវ័យ ២៨ឆ្នាំ ម្នាក់បានស្លាប់ ដោយសារវីរុសកូរ៉ូណា។ លោកគឺជាកីឡាករដំបូងបង្អស់ក្នុងកីឡានេះ ដែលបានស្លាប់ដោយសារវីរុស COVID-19។
លោក Shobushi ដែលមានឈ្មោះពិតថា Kiyotaka Suetake បានស្លាប់ដោយសារមានបញ្ហាសេរីរាង្គជាច្រើន បន្ទាប់ពីមានបញ្ហារលាកផ្លូវដង្ហើម។ នេះបើតាមការប្រកាស របស់សមាគមន៍កីឡាចំបាប់ស៊ូម៉ូ (JSA)។
កីឡាករនោះចាប់ផ្តើមមានអាការគ្រុនក្តៅខ្លាំងដំបូងនៅថ្ងៃទី ៤ ខែមេសា ប៉ុន្តែត្រូវពុះពារដើម្បីទទួលបានការព្យាបាលនៅមន្ទីរពេទ្យមួយ ដោយសារតែមានការត្អូញត្អែរពីអ្នកជំងឺផ្សេងៗ។
ក្រោយពេលមន្ទីរពេទ្យជាច្រើនបដិសេធមិនទទួលយក លោក Shobushi ត្រូវបានទទួលយកទៅព្យាបាលនៅមន្ទីរពេទ្យមួយនៅថ្ងៃទី ៨ ខែមេសា។
លោកត្រូវបានគេព្យាបាលនៅបន្ទប់សង្គ្រោះបន្ទាន់តាំងពីថ្ងៃទី ១៩ ខែមេសាមក ប៉ុន្តែស្ថានភាពរបស់គាត់កាន់តែអាក្រក់ទៅ ហើយគាត់ក៏បានស្លាប់នៅថ្ងៃពុធម្សិលមិញនេះ។
សមាគមន៍កីឡាចំបាប់ជប៉ុននិយាយក្នុងសេចក្តីប្រកាសថា “គាត់បានតស៊ូយ៉ាងស្វាហាប់ប្រឆាំងនឹងជំងឺ និងតស៊ូនឹងការឈឺចាប់អស់រយៈពេលជាងមួយខែ ដូចជាការតស៊ូរបស់កីឡាបោកចំបាប់”។
សូមបញ្ជាក់ថា លោក Kiyotaka Suetake បានបង្ហាញខ្លួនលើកដំបូងក្នុងនាមជាកីឡាករស៊ូម៉ូអាជីព ក្នុងឆ្នាំ ២០០៧ និងបានឈានដល់ចំណាត់ថ្នាក់ទី ១១ ក្នុងលីគ Sandanme ដែលជាលីគខ្ពស់បំផុតទី ៤៕
ប្រភព៖ CNN
អត្ថបទប្រែសម្រួលដោយ៖ សុភ័ក្រ